人家婚禮後記....

尋晚參加左一個相當混亂既婚禮....

十個兄弟姐妹 (包伴娘伴郎），女既基本上顧住扮靚，影相同埋吹水，男既主要不停研究點玩新娘新郎同埋同姐妹吹水... 新郎開始前亦全程主要係坐响到陪屋企人, 少少覺得佢係來賓之一。

新娘一晚決定換五套衫，一開始換套紫色晚裝出場，先知原來要斟茶比長輩，所以趕頭趕命又換番套褂，影左成個鐘先再換晚裝。第一套晚裝著左唔夠半個鐘又話要換婚紗入場，誰知成班姐妹冇影，結果係個化粧師同個剛好路過既我幫手換衫。由於個新娘房超細，入得三個人，負責搬野入新娘房既各位又各自求其亂放，所以個房亂到癲左，揾倒衫又揾唔倒首飾，揾倒首飾再要揾鞋.... 間房入面除左有新娘子既五套衫 ，仲有新娘女家家人幾套衫，新郎一套西裝，全部掛响兩個鐵架同五個大袋入面，每個大袋入面又有好多細袋，好似尋寶遊戲....唯有發揮平時玩 escape games 既小宇宙，四圍摷！

臨開席，先發現要加兩圍枱，响之前亂摷途中其實見倒一大袋 ‘小禮物’，中途行出新娘房，就有個侍應黎問：知唔知小禮物响邊？加左兩圍未放，冇人知响邊。於是入房再摷，成袋拎比個侍應叫佢分，十幾二十分鐘後先有個兄弟瞓醒，走去新娘房問‘新加兩枱要放小禮物，見唔見响邊呀’...

新娘換緊婚紗，一個兄弟好趕咁走去催新娘話 MC 要佢出場，叫佢快啲 （師兄，未著好點出場，用吓腦啦）化粧師話要多十分鐘，傳話比兄弟話十分鐘 OK。位兄弟可愛地話：唔得呀，MC 話要而家出場。忍唔住醒左佢一句：你話比 MC 知十至十五分鐘啦，叫佢地自己搞掂佢，唔好再黎催，唔通換好衫唔出黎咩，新娘緊張過你地啦... 兄弟無奈走去傳話比 MC... 老實，做得 MC 就幫吓手搞掂啦，你話照傳，阿兄弟你駛咩同佢担心。

新娘換好婚紗，等 march in, 新郎問：係咪門口等入場... 大佬，suppose 佢自己同場地一早夾好晒，何解佢會番轉頭問人呢？而且唔响門口入，唔通你自己响台後面上去？新娘要人幫手拉婚紗尾出場，新郎叫：揾伴娘.. 一問之下，伴娘响台上做緊司儀, 臨急幫佢揾左個小妹妹幫手....  响呢個混亂時候班兄弟姐妹做緊咩呢？

場內正播放 VCD，姐妹們眾精匯神睇片；兄弟們响場內企埋一堆安排邊個企咩位拉花砲，執野中途，响新娘房門口既雜物堆中揾倒四個大拉砲，拎去比啲兄弟，竟然有人話：一人一個架喎，多左點算呀.... 師兄，是但揾個 ‘現場觀眾’ 幫手咪得囉，有咩咁大件事呀，要成村人一齊研究！ 要番去睇住新娘，叫佢地自己揾人幫手搞掂。誰知轉頭番去，見佢地仲係 ‘保持原狀’响到開會，唯有快速幫佢地揾左幾個小朋友幫手，佢地仲敢死話：小朋友拉細花砲啦，再將佢地手上既細花砲同小朋友 ‘交換’ 了....

到左玩新郎新娘既時間 （我一直都覺得呢部份根本唔需要存在），有我最討厭既 ‘扮三級’ 遊戲，明顯係得班兄弟姐妹玩得好開心，台下冇咩反應，繼續食野同吹水，唔知新郎新娘係咪真係玩得 enjoy。

坦白講，自己做過好多次姐妹/伴娘，都未見過一班咁 hea 爆既兄弟姐妹，各自各精彩，唔會自動波走位幫手。

仲有，亞新郎哥好似被迫參加自己既婚禮，成晚夢遊咁。大佬，一世人難得結次婚，可能個婚禮只係新娘想搞，但你娶得人，都交戲配合丫。

其實仲有好多小插曲，當然唔會話比新娘知，等佢有個美好記憶。

一切順利結束，祝願新人百年好合，開開心心～