日式放題

個人食量唔算好大，食一至兩轉已經開始飽，所以覺得飽。但有時同朋友食，唔駛就住就住，其中只要有幾個食得之人，睇佢人家狂點狂食其實都好開心～

食過隊長，大瀛喜同極尚大喜屋日式放題，幾間差別唔太，差幾都係二百多一位，由入座起計 2 小時。呢幾間既食物種類都好多，每次放放題都有一個問題係唔知到左既食物份量幾多，等幾耐？以尋日食既大瀛喜為例，上菜速度係.... 一窩峰，2 個人，張枱唔大，但食物不停到；同為炸物都分幾碟，結果自己要七手八腳不停將幾碟食物倒埋一碟... 食得相當 '忙'。

食物質素嘛... 目前為止未食倒一間覺得好好味既放題，但只可以話，一般都坐得太迫，好有壓迫感（好怕明明唔識隔離枱，偏偏好似坐埋一齊食咁），放題確實唔係我杯茶～

大瀛喜無聊花絮：
1) 落單紙用一本簿夾晒，插埋一枝筆。原來，本薄後有磁石，可以成本痴响個枱腳... 好 Hong Kong Style 又貼心喔～
2) 尋晚隔離兩枱 6個人左右既食客共處於一個小區域內，由於餐廳飲品，我地住後面就已經係一個雪櫃，大家不停去拎飲品。到一半，其中一枱 6 人家庭組唔知响邊揾啲雪條/ 雪榚番黎，另一枱 6 人師奶兵團見倒，四出搜尋，好似揾倒拎左一堆番黎，成枱都好高興～  另外，師奶兵團基本上見我地同隔離枱食咩，都話：咩黎架佢地嗰啲，不如叫黎試吓... 差在冇出口問我地嗰啲係咩...
3）估佢唔倒地，成晚最好食既係黄金蝦.... 香口又脆，但完全唔係日本野

牧羊少年咖啡．茶．酒館 Cafe Bistro The Alchemist

以旅遊為題之餐廳，感覺似上樓 cafe， 佈置格局都走輕鬆格調，中午時段去太子店等了大半個鐘，部份座位少少迫，食物尚可，份量略細。試了玫瑰味咖啡.... 下次都係飲番 Latte 好了！隔離位既窩夫睇落唔錯但實在太飽冇試埋。

與朋友聯誼都相當唔錯。

開飯連姞： http://www.openrice.com/restaurant/sr2.htm?shopid=115150&tc=sr1

譚仔雲南米線

傳聞譚仔有分正宗 譚仔‘三哥’ 雲南米線 與就咁譚仔雲南米線。日前再次幫襯了 ‘三哥’ 非尖東舖，面底真的一般，配菜唔太揀得落手。冇我鍾意既南記類既豬腩肉同春卷，唯有叫個淨粉底加比較 OK 既小食，今次叫了土匪雞翼同皮蛋，過得去啦，尖沙咀黎講都算平咁。

今次比較想講食物質素以外既事。先黎係呢張告示：






























好似係大半年前有個女子拎個名牌袋去三哥舖食野，比湯／汁整污糟，要求賠償後佢地所有舖都貼左張 ‘温馨提示’。勁～

另外呢間舖一大特色：亂中有序
有次叫左碗粉，阿姐行開左先醒起唔記得叫飲品。於是叫左個阿且想加杯凍檸茶，阿姐話：你張單未比你唔加得，你遲啲加，飲野好快有。轉頭，單黎左，再叫阿姐加飲品就真係即可以加，一分鐘唔駛送到。

同一次，食物黎左，發現我要酸菜佢比生菜我，阿姐表示：你係咪要酸菜？我話係，以為佢要拎碗粉去廚房轉單，點知轉頭阿姐拎左一大碗酸菜出黎比我解決，碗中生菜當送比我喎。

最後就係，間舖既職員互相溝通唔係廣東話又唔係國語，佢地自己溝通得好好之餘又唔駛驚比客聽倒佢地講咩，幾好喎～

峰壽司

愛食壽司，壹，板長，板前，元氣，北海道等等都食過，偏好沙田新城市既峰壽司，當然每間舖都有好同唔好既食物：

前幾日再去，有新野出，墨魚都 OK 既，難咬開啲咁：

三味三文魚，左至右係蒜蓉/ 面鼓/ 沙律醬... 個人比較保守，都係傳統啲好：

TOP 2 最愛之一：峰鰻魚，又滑又香，但唔知點解一次叫兩客，四件一齊上到眼前會走晒樣，所以寧願一次 ORDER 畫一份，咁就最 PERFECT 勒：

我的最愛：鵝肝壽司，外脆內滑，充滿油香

相片均由 IPHONE 5 拍攝～

＿＿＿＿＿＿＿＿＿＿＿＿＿＿＿＿＿＿＿＿＿

後記：

一次過叫兩件峰鰻魚，結果會變左咁 ﹣ 總有一份好似營養不良，萬試萬寧

自家製麻醬肥牛烏冬

鍾意食吉野家牛肉鍋，主要鍾意食佢個麻醬。閒時有心情响屋企其實都會整吓，十分鐘唔駛有得食，懶人如我最愛：

材料：

﹣肥牛 (佳寶 ＄32 磅，可以用保鮮袋分裝至4-5包，放入冰格，每餐煮一包唔駛等解凍）

﹣烏冬 (超市有售，約10 蚊 4 個）

﹣丘比麻醬 (＄25.9/  200 ml, 惠康有售，相對於响 city super 等日式/ 高級超市買既麻醬，呢個最得黎係最好味）

方法：

﹣水沸，加入烏冬 （鍾意可以加多幾條菜），再水沸，加入肥牛，冚蓋熄火

﹣約一分鐘後，倒出煲內所有水，只淨下烏冬及肥牛

﹣倒入適量麻醬即可

平均一餐約 $17 一餐，唔算好平，但好味 ﹠ 方便～

 十分鐘內有得食：

蘭香麵家

某日偶然於電視上見倒個節目介紹呢間麵家，馳名雞腸同牛柏葉。幾毎月後的一天偶然路過，剛好食飯時間，決定一試。試了雞腸同牛柏葉，唔錯但唔係想要 encore 再食咁，反而牛腩好好得，加埋豉油＋辣椒油好好味～

南記

從前响灣仔番工，成日幫襯地鐵站通去會展天橋下既南記粉面，機本上只會叫 3 號（豬腩肉小窩米線）加春卷＋豆漿，當年（大概 4/5 年前）係 ＄23 一碗粉，另一豆漿一杯 ＄5，即係三十蚊唔駛就有一個餐，個粉仲好大碗，食完一定飽。

自從轉工了，好少機會食倒，雖然銅鑼灣都有幾間分店，但總覺得灣仔食開嗰間最好食。但上星期去會展附近，專登走去食，人依然好多，好了個阿姐 ‘指揮人流’，排隊﹣比錢﹣等叫號碼（已經唔駛再比飛水吧～），等了十多分鐘，春卷依然好好味，但份量好似細左，味道比記憶中差左，同埋貴左好多，依舊三號餐＋春卷＋豆漿要成四十幾蚊～ 

Kraze Burger American Dining Gourmet

六月某日於 isquare 行到攰攰地，走左入 Kraze 食下午茶，由於重點係揾地方休息，只叫了一個 burger + 2 杯飲品。餐廳連我地得三枱客，order 時 menu 中好多種 burger，對漢堡冇咩研究既我倆叫左侍應妹妹推介既最受歡迎 KB漢堡後專心休息。等食時上網研究吓，先知呢間係韓式既漢堡包店，但我到食完都唔知同美式有咩分別～

無聊時見枱上巨型 Tabasco （平日都係 mini size)，隨手影吓 ：

Order 後約十分鐘先上飲品 ﹣ 兩杯咖啡，無論凍定熱都係冇咩味的，凍咖啡仲超甜

之後，K.B. Burger 出場，份量唔算特別大，材料好多同埋都新鮮，芝士有少少溶夾埋有肉汁既漢堡扒都 OK好味，但個包卻略硬。

坐了差唔多一個鐘，埋單好似 HKD150 左右，比 BLT 平，但又唔覺得值。我會寧願番 Triple O's or MOS Burger 食。

是日好食：Linguini Fini

十二月飯局中其中一間幾得，應該會再番食既就係呢間 Linguini Fini

Photo from Open Rice

Linguini Fini ，一間意大利主打‘有機食材‘既餐廳，雖然响中環，但唔貴，服務好好之餘坐得都相當舒服

頭盤：一坐低就送上一客包，凱薩沙律 OK 好食，Mussel 好得，細隻但肥美。

Bread

菜湯：OK

主菜：芝士意大利雲吞配蕃茄汁, yummy yummy ; Carbonara 同街外食既唔同，意粉本身比較 ’煙軔’，味道偏濃，反而令我諗番起响意大利小餐廳食既意粉


甜品：蘋果批，本身有一片片蘋果，好香蘋果味，批上面一個 yogurt 雪榚球，配起黎食好夾

  

Apple Pei

除左餐牌上既菜式, 仲有是日精選，熱心既侍應們會逐一介紹。部份菜式有內臟好似肝，心咁，朋友唔食，所以冇叫，下次再試過～




餐廳不設加一，希望客人滿意服務自行比貼士。

添好運點心專門店

尋日去深水埗，行行吓見好大個白底綠字招牌寫住添好運，見冇咩人等，又餓餓地，攞籌後等左唔駛十分鐘就有位座。

Openrice 介紹： http://www.openrice.com/restaurant/sr2.htm?shopid=45662

openrice 介紹既 ‘豬潤腸粉’， 平時都食得吓豬潤既我都唔太鐘意，但個皮好滑，早之叫蝦腸； 蘿蔔榚太濕唔鐘意

牛肉球都 OK， 粉果好脆，唔錯

好好味既脆皮叉燒包，但一份有三個，我地食唔落，拎走左一個，但食嗰時發覺要整好即食先好味

仲有個馬拉榚好好味，但一到就被我分屍食左.... 冇相

其實我地食既時間係下午茶時段，平時去富臨，我又覺得富臨點心整體好味啲又抵食啲喎，重點係... 唔駛點等位

要等位既話，我應該唔會再食呢間

＿＿＿＿＿＿＿＿＿＿＿＿＿＿＿＿

同場加映 ‘隔離飯香’ 趣事：隔離枱一男一女食客，同我地差唔多時間坐底，聽佢地對話都係第一次食，男既可能好餓，叫女既求其點食物。我地就無聊 openrice 睇食評有咩好食，慢慢揀。結果我地未入單，隔離枱已經放到成枱食物。

佢地一邊食一邊品評，呢樣一般，呢樣嘛嘛... 到我地既食物上枱，可能係 ‘隔離飯香’ 既道理，聽見男既不停話：不如點馬拉榚丫 （唔知係咪因為我係咁話好味），我想食粉果呀... 結果，隔離位成枱滿佈食物，我地食完走時聽見佢問侍應攞盒裝野走... 佢地實在叫得太多勒.....

鳴門日本料理

尋日約了九龍灣番工既朋友食番，去左試 鳴門日本料理，剛好有個壽司定食做特價，原價 HKD128 減到 HKD85，所以我地叫兩個。呢個定食優惠好似係每個月最後兩個星期一都有，全場大部份人都係叫呢個餐。由於太多人叫既關係，司傅跟本做唔切， 我地13：10坐底，等到13：56 先有得食。周圍不停有人催單，但你有你催，大家依然要繼續等。

由於朋友趕住番工，我地以極速十分鐘內食完個餐，但其實啲壽司好好味，魚生好生鮮，飯剛剛好，有時間慢慢食就 perfect。個餐有十件壽司左右， 有三文魚，吞拿魚，油甘魚，玉子各一件，三件吞拿魚腩卷，仲有幾件唔記得係咩，面鼓湯，前菜兩小碟，同甜品 （雪榚）。 減價後其實真係好抵，唔怪得咁多人食。

P.S.: 昨日食完飯諗住行吓 Mega Box, 搭條超長電梯其間，不停聽倒落電梯既人高談闊論一單新聞...

路人甲：你十四歲發緊夢，人地已經做緊野，所以人地可以廿幾歲就退休....
路人乙：唔好話三十億，比一億我都願...
路人丙：冇亞媽有咩所謂丫，有錢就得啦...
路人丁：你估係咪一早協議左生完分手丫拿...

路人甲乙丙丁係四堆唔同既人，有男有女，有老有少，睇黎大家關心名人分手多過個垃圾財政預算

打邊爐

喜歡打邊爐， 喜歡打邊爐時加大量醬料。一向偏好沙爹窩底， 近年愛上麻辣窩， 但一食完第二日就喉嚨痛， 萬試萬寧。寧記麻辣窩同譚魚頭番茄窩都好味， 但價錢唔平。小肥羊近年都有百幾蚊既任食打邊爐， 但食過幾次都少少趕客。

去年朋友介紹去尖沙咀德興火窩任食邊爐， 百三蚊個左右 （唔計另加醬及飲品）。食物幾新鮮， 好少漏單 （出面好多間都會寫十樣上少幾樣）， 同唔會趕人走。雖然食物來來去去都係基本既野，冇咩特別， 但唔會有人催你走， 同朋友一齊食， 吹吓水，玩吓笑吓， 輕輕鬆鬆又一晚。

P.S.： 試過其他分店德興， 得尖沙咀呢間坐得舒服啲同好似食物新鮮啲。推介蘋果湯底， 佢既麻辣窩底就初時唔夠辣， 但越食只係越鹹， 唔係好得。