雲頂高原鬼故事

前日番工途中入商台個 apps 聽早霸王 jingle，近日森美出去拍戲，間中由雲海頂更，剛啱個 Jingle 係雲海講雲頂鬼故。自己好多年前同朋友去雲頂都遇過怪事，對雲頂既 ‘故事’ 比較有興趣，所以就 click 入去聽。由於係 Jingle 關係，聽到大半就停了要比錢做會員先可以足本重温...

尋晚半夜忽然想起呢個 ‘未完的故事’，上網搜尋 ‘雲海雲頂恐怖傳聞’，copy & paste 如下分享一下：




＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊


馬來西亞人都知道的恐怖真實故事 
文： 陳雲海 14/08/2005 

以前在當地有一對年輕夫婦,妻從未去過雲頂高原

他們帶著些許現金上雲頂高原玩去,說也奇怪

夫的手氣本來一直很好 從一開始就沒輸過

沒想到直過了半夜十二點時

反而開始大把大把的輸 直至半夜兩三點時

就把一整天贏下來的錢全都輸光了

由於輸到連住一晚飯店的錢都沒有

夫妻倆只好開夜車下山就開到半山腰的時候

車子突然沒油了 那時已是三更半夜,往來幾乎無車,四周也沒住家

夫就叫妻好好待在車上 絕對不準下車,夫自己則下車去找救兵

妻正好覺得睏 便小睡片刻 也不知道睡了多久

醒來時夫竟爾尚未回來

雖然驚慌 卻也不敢下車 便一直待在車上 良久

妻突然覺得有一件事情很奇怪:

她坐在車上 偶爾還是會遠遠的看到有車開下來

但每一輛偶爾經過的車 在遠遠的時

都還是用很正常的速度行駛,卻在經過她這輛車時

就會用很快的速度衝過去 ?

然後再用正常的速度繼續行駛 妻越想越怕

而且夫也不知去了多久 卻還未回來 .爾後 突有一輛警車出現

隔著一段距離的向妻用擴音器廣播

要妻速速下車 到他們這輛警車來

且絕對不能回頭看一眼,妻很害怕 不知道是發生了什麼事

連警車都來向她廣播,當下下了車 往警車走去,並依言不回頭看 

到了警車一名警員神色慌亂的用力將她拉上車來

妻順勢回頭望了一眼 警車快速的疾駛而去

就降望了一眼,妻還是看到了..一名身著白衣的青面遼牙的女鬼

正坐在妻那輛車頂上,啃咬著一枚人頭...

隔天警局去尋夫 在離妻那輛車約兩百公尺處

發現了夫的屍體,一具沒有人頭的屍體...

這件事在當時似乎鬧的很大,報上還有登出黑白照片

好像是其中一名警員拍的,馬來西亞幾乎每一個導遊都知道這個故事

也都有著那份刊著黑白照片的剪報.
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊


試圖 search 過有關既 ‘新聞’ 同 ‘相’，係揾唔倒既；同埋，如果係女鬼點解係人都見倒？同埋仲會比人咁清楚影倒？所以當睇故事好了～

鬼故：學校幽靈

多謝 Agnes 提供既鬼故

＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿

話說當年我留學英國，我所就讀既寄宿學校係一個好有歷史既女校，有位師姐同我講過，我地學校曾經有位師姐唔知發生咩事，有一晚喺所住既房間跳樓自殺。我地校舍唔係好高，最高只係得4層樓高，而個位自殺既師姐所住既房正正位於最高樓層。當時佢係半夜自殺，但係我地校舍係好似"堡壘"咁，10點左右刪左大門就無人會入到去，所以並無"看更"會巡校舍。到大概5點左右，有修女早起經過見到個位師姐喺地下淹淹一息，地下已流到一大灘血，送院途中已不幸離世.....

自始我地房間既窗全部封到只可以開到約15cm高，而出事個間房己經封左無再比人入住。我地學校每一個學季都會轉1次房，點知有季好不幸地我轉左去事發房間既隔離間房！

我係同另外一個女仔一間房，大家初初入住個陣都有d驚，住左一排都無異樣，大家都無再為意呢件事。學校每晚大約10點鐘都會有修女巡一次房幫我地熄燈訓覺確保每位學生都返左房。我地間房個窗係望到修女回程必經既對面個橦宿舍，臨近考試我地想開夜車溫書，我地都會喺熄燈後企係窗邊見到修女返左去我地會開盞小檯燈溫習。

有一晚我地如常喺窗前等修女返房，見到修女返左房，咁我就拎轉頭諗住同我室友講可以開燈，點知當我一拎過去個下，我見到有對半身白袍既腳令空喺我室友個頭既左邊飄下飄下..........我當時即刻呆左！我室友見我呆左問我咩事，我當時驚到唔敢講，又驚嚇親佢，我只係同佢講今晚開檯燈我同佢一齊訓 (其實我當時既反應，我室友應該估到咩事)，結果大家齊齊縮係張床度成晚唔敢訓！到第二日我地同一個師姐講發生既事，佢同我地講自殺個位師姐好似係0個個月去世，為左確認日期，我地去左學校其中一個花園，個度為左記念個位師姐種左一棵小樹，上面有寫佢既名，出生日期及死亡日期。去到結果發現，我見到野個晚正正係佢既死忌..............

之後我地將屋企人比我地既玉呀，十字架呀，念珠呀，所有保平安既野帶晒係身，過左一排，我地終於捱到轉房，遠離事發房間了........

鬼故：看不見的同屋 II

看不見的同屋 I 後篇，其實中間應該仲有幾段小插曲但我唔太記得詳情，所以 skip 左，只寫我記得既部份..... 
______________________________________


朋友雖然見手上有紅印，但回想成件事，佢覺得成件事都似發夢咁，天性樂觀既佢話啲紅印可能佢瞓覺唔知點整倒，過幾日就冇事，但佢醒左之後就即刻出街 ～


事隔幾日，佢家姐番左工得佢一個响屋企，佢响廳睇睇吓電視瞓左。佢瞓瞓吓隱約聽倒有一男一女傾計，起初以為係電視聲，但聽唔倒談話內容。突然佢好清楚咁聽倒把女聲話：煲乾水勒，仲瞓


朋友即醒，聞倒一陣濃味先記得廚房煲緊湯，佢立即去睇，發現啲水真係煲乾晒，就黎火燭咁滯，煲報銷了。


嗰晚，朋友等家姐番屋企就同佢家姐講番呢兩件事，點知佢家姐話：我知呀，有一晚我瞓瞓吓，轉身見倒個著唐裝衫既男人背向佢，瞓左响佢隔離。仲有一晚佢半夜放工番屋企，入屋見個長髮女‘影’入左佢房。佢家姐話响到住左幾個月都相安無事，佢今日仲提你煲乾水，多個人照顧你個大頭蝦都幾好丫，大家各自生活咪算囉。


朋友聽完，話佢家姐做咩唔話佢知，家姐只答佢：層樓住得好好哋，唔通咁快搬咩，上屋搬下屋唔見一籮殻呀.... 總之，家姐覺得一啲問題都冇。


之後，有一晚，朋友瞓瞓吓，聽見一男一女一小朋友對話 ﹣
男：原來佢見倒我
女：你做咩瞓人張床
男：有床唔瞓唔通瞓地下
小朋友：難得有人陪我玩，唔好嚇走佢呀
男：係喎，我未同細妹打招呼...


朋友開頭都以為發夢，但當佢聽到最尾一句，佢極速著番件衫，衝左落街，打比家姐話佢知件事，佢家姐答應佢聽日揾個 ‘師傅’ 睇吓間屋。之後，師傅睇完既答案係，屋入面有幾個 ‘舊住客’，住左响到幾十年，啲‘住客’都冇惡意，只係同佢兩姐妹玩吓。師傅幫佢地做左少少儀式，臨走時講左句：冇事架勒，間屋風水幾好，仲好旺桃花架，安心住啦


最後，兩姐妹一年內先後結婚，家姐仍然住响嗰間屋，但再冇見倒呢幾個 ‘住客’了。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
看不見的同屋 I： http://dorstalk.blogspot.com/2011/10/i.html

鬼故：看不見的同屋 I

下畫出左個冇料到既故事，而家補番個真人真事，但因為故事太長，會斬件兩集出的。

朋友家姐職業係白衣天使，早年自行置業，邀請佢個妹 （我朋友）一齊住。朋友同呢個家姐感情一向好好，唔駛錢又有地方住當然搬左去。

姐妹倆都係冇宗教同比較隨心既人，入伙冇做拜四角儀式，家中亦冇任何神像或者裝香。入伙後不久某個星期六，朋友於家中午睡，佢張床係上格做床下格書枱＋衣柜，當佢瞓瞓吓，覺得有人搖張床，越搖越大力，好似地震... 但佢大小姐依然唔肯起身，照瞓可也。突然間，佢好似聽倒把細路聲，重覆幾次講：姐姐起身同我玩丫，跟住，有隻好凍既手捉住我朋友隻手，佢即刻醒左，但係唔見有人，佢以為係佢家姐玩野，但成屋揾過都只得佢一個响屋企。佢望吓隻手，見幾個細細既紅印... 好似比人好大力捉住留底既....

待續： http://dorstalk.blogspot.com/2011/10/ii.html

夜半電話

其實呢個唔算鬼故，算係怪事多啲....

一向都唔會熄電話，可以話電話係二十四小時全天候開住，冇特別原因，只係習慣。有一晚，半夜三更自己一個响廳睇鬼故，啱啱十二點，電話响響，我嚇一嚇之餘九秒九去聽，驚嘈醒屋企人。拎起電話隨手就聽，喂左幾聲冇人應，打算收線，突然有把唔男唔女，好輕好似冇用氣講野既聲音傳出，講左句：我呀

對方電話背景好靜，好似响個好空洞但有少少回音既地方講電話咁，我睇番電話，發現係個冇來電顯示既電話。我回佢一句：邊個，唔好咁無聊半夜三更玩電話

對方答：我呀，你唔記得我拿，我專登番黎揾你呀

背景加上對方語氣，令我覺得毛管戙，於是我冇答佢，極速收線。收線後不停收倒幾個冇來電顯示既電話，我冇聽，到第三次再响，我熄埋個電話。電視套鬼片我都冇睇埋，就走左去瞓覺。

第二日，又係搭正半夜十二點，電話再響，又係冇來電顯示，呢次我唔敢聽，順手熄電話。之後落黎既幾日我都响十一點左右就關機.... 唔想再比個電話嚇親。

隔左一日，中午，我响街，又收倒個冇來電顯示既電話，由於唔肯定係咪長途，所以聽左，又係把唔男唔女既聲，第一句又係：我呀

呢次我都費事答佢，立即收線，但佢死唔斷氣，不停打比我。我再次熄左個電話，隔左半個鐘左右先開番，因為約左朋友要揾佢。之後我去左睇戲，响戲院睇緊套泰國鬼片之際，電話又响，又冇來電顯示，第一次我冇聽，轉頭又打黎幾次。我之前都同同行既朋友講過呢件事，我話佢知又係個冇來電顯示電話不停打黎，朋友叫我比個電話佢聽。朋友拎起電話，喂左幾聲，對方冇反應但冇收線，朋友收線前講左句：再打黎我會報警。

以為件事就咁結束？ 仲未... 戲院後一星期左右，又係半夜十二點左右 （因為隔左幾日以為冇事，電話又繼續維持長期開機狀態）。當時都唔為意又會係呢個唔男唔女，隨手拎起電話‘喂’ 左一聲，對方第一句又係：我呀

堅覺得個電話好煩，隨口一輪咀咁話：你你你你好煩呀，堅識我有野講就 email/ whatsapp/ facebook/ msn 我，唔好成日半夜三更打黎，你唔瞓人地都要瞓。唔識我要玩電話既就過主，你係人又好係鬼又好，唔好再揾我，我幫唔倒你做任何野，你悶過頭揾人陪就去玩 line.... 咁上下啦，講左都分幾鐘左右掛，第一次，對方主動收綫了。呢次亦係最後一次（希望係）收倒呢‘位’人兄/姐既電話.....

鬼故：間房有‘人’ ？？

有一次出差，入住酒店。去到房門口發現係尾房，我都冇所謂，但開門入到房先發現間房大到離譜！除左兩張單人床，一張書枱，床尾中間根本可以放張 ping pong 波枱，入到去未開電視我仲耳鳴，去睇個廁所.... 雖然話係長條形，門口去到浴缸都要十幾步.... 雖然平時出差都習慣自己一間房，但咁大一間總覺得好唔自在，但酒店聲稱冇房換，叫我第二日再去問有冇房換。但以我早出晚歸既 schedule, 番到去仲邊有精神攪轉房，唯有照住。

同行其實有兩個男同事，佢兩個間房係正常雙人房，唔會好似我間咁大到恐佈，但兩個死仔打死都唔肯同我轉房, 人善被人欺  >.<

講番間房，個人習慣夜晚會將第二日要拎出街同著既野晒舖响另一張床，感覺好似安心啲 （見倒隔離床有野可以同自己講係衫啫），第二日又方便唔駛再揾餐死。

可能間房太大，第一晚瞓得好差，成日聽倒廁所滴水聲 （我自己睇過好多次，唔係我間房既廁所），唯有成晚開住個電話播歌，濛瀧中瞓著左。第二朝起身，去完廁所出黎，先發覺另一張床既衣物好似比人推埋一邊。感覺似有人瞓半邊床，所以推啲衫去另一邊。嗰刻心打左個突。打電話去 reception 問佢有冇得換房，結果當然係冇啦。

第二晚，瞓到半夜，聽倒電視聲，發現房內電視打開左.... 我十分極之肯定個搖控响床頭柜上，我冇可能唔覺意開倒。都冇可能係預校開機，因為部電視係好舊式既大牛龜電視。再次，我極速開大個電話 mp3，熄電視，再瞓... 因為真係好很攰。

第三晚，冇錯，又係半夜，瞓瞓吓好凍，今次發現係個窗開左.... 請注意，當時室外氣温得幾度，咩人會開窗瞓覺呢？

之後，冇第四晚勒，因為我頂唔順，去 reception 勁嘈要轉房，講明冇房轉我轉酒店。搞左一輪佢地換左間房比我，但話明住三日又要再轉房。嗰一刻我有房就轉啦，仲邊理得佢咁多。

鬼故：半夜訪客

朋友於家中親身經歷....

瞓到半夜札醒，突然間好想去廁所。深近視的她，冇戴住眼鏡去廁所，當佢經過必經之路 “廳” 既時候，‘覺得’梳化有個影。由於佢同老豆同住，直覺係佢老豆瞓唔著座响到，正當佢想問‘老豆’做咩唔瞓坐响到之際，個影消... 失... 左...

佢個腦未識反應，個人好快就衝左入廁所，入到去腳軟坐左响地下。佢一邊說服自己係幻覺，其實由始至終都冇 ‘影’ 响廳，但個腦好明確話佢知：真係有架。

留左响廁所都唔知幾耐，驚一開門個 ‘影’ 响門口等佢，但第二朝要番工，唔通要响廁所瞓通宵... 正當佢思考中既時候，突然有人拍廁所門，開頭好輕咁拍，之後越拍越快，越拍越大力.......

朋友驚到忍唔住大嗌一聲，跟住聽倒門外傳來一句：你瞓入面瞓左呀？快啲出黎啦，我好急呀！！

原來... 係佢老豆，嗰一刻佢突然醒起自己好急但未去廁所，解決完之後開門，夾硬拉住佢老頭送佢番入房，鎖好門先比佢老豆番去廁所。佢嗰晚係眼光光望天光，邊敢瞓丫。

碟仙 銀仙 筆仙 手指仙

筆仙個 escape game 令我諗起讀書時代，校內曾經有一段時間極奇流行各式各樣既 ‘仙’。身邊有朋友十分沉迷，但自己一直無參與。所謂既 ‘仙’其實係靈體，傳說好多規則，例如唔可以問名，唔可以問佢點死，問完要 ‘請’ 走佢先可以放手。嗰一期學校每到 break 或者 lunch 時間，好多人就自己埋堆‘問問題’。開頭都覺幾好笑，後來學校氣氛越黎越恐佈咁....

傳聞有人問仙後上堂中突然嘔到七彩 ＋抽筋，話係請仙後冇送仙走。

仲有，一位 A 小姐，精通各式仙家，甚至話有個 ‘仙’ 留响佢隻左手，唔需要次次請 ‘仙‘。想問事可以問完，手指會比答案，當然只有當事人明白，大家都半信半疑。當時人話個‘仙’考試測驗都會比提示佢，所以佢唔駛再温書，由於佢成績一向都唔錯，到底係有‘仙’ 幫定靠佢自己聰明才智就不得而知。唯一肯定既係以前經常笑得好開朗既佢，與 ‘仙’ 為伴後個人變得好陰沉，就算笑都似係皮笑肉不笑咁.... 番學時經常見佢自己座响位，自言自語，好似同人有講有笑.... 但附近係冇人既...

有一次，有個代課老師出現，佢一入班房，A 小姐發癲，响班房內四圍走，叫代課老師離開，個老師唔知咩事，即時離開班房 （其實好多同學都出晒班房），附近班房幾個老師可能見咁嘈都過黎睇咩事。老師們合力送左 A小姐去醫療室，再揾家長接佢番屋企，之後佢一直冇番學。隔左一段時間， A 小姐退學了，傳聞家人送佢去澳州讀書；亦有人話佢思覺失調，其實比人送左去醫病。

至於點解代課老師出現 A 小姐會咁大反應，有人話該名代課老師係虔誠基督徒，所以 A 小姐對佢有咁大反應，真正答案就冇人知勒。

而嗰一期既 ‘仙’ 潮，印象中好快就冇咩人再玩了。