好心一定做好事？

近幾日經常發夢，大多瞓醒即忘～ 唯獨有一個夢記憶尤新，與其話係夢，其實係一個幾年前發生既事...

有日大熱天時响街，行上一條上坡暗斜，見前面有個婆婆推住架小小的手推車行得好慢... 好慢，一心諗住架車仔好重，於是好快行去婆婆到，同佢講：我幫你拎上去丫.... 跟手一個箭步將手推車推到斜坡最上頭（約 100 米路程）。轉頭發現婆婆企响原地，跟手有個太太走黎鬧我：你做咩搶左阿婆架車仔呀，冇陰公，佢冇左架車仔行唔倒架！

該位太太將手推車送回婆婆手上，之後見婆婆推一步手推車先行一步，原來部手推車同時係婆婆既拐杖！當時我呆了，覺得十級 '𤓓'，自以為是，白痴，九秒九走了。

其實而家諗番呢件事無咩大不了，但唔知點解間中就會諗起。大概我當時漏了同婆婆親口講聲：對唔住？

需要計算的病假

是日如平常一樣鬧鐘準時七點响起，但其實尋晚不停瞓吓醒吓，五點幾差唔多全醒了.... 全因喉嚨痛到火燒，鼻塞到達要用口呼吸既地步。上網搜尋到睇開既家庭醫生要十點先番工，個腦自動盤算：今日有冇會開，有冇 DEADLINE 等等等等，發現是日 ‘吉日’，萬事皆無，於是安再較鬧鐘到 8:45，打番公司請病假，專心養病。

突然又會諗：今年請左幾多病假呢？公司一年得7日有薪病假.... 過左被人扣人工咪唔抵？但我又真係病到七彩，真係請突病假比人扣人工都冇計....

回想當年讀書時，少少病就請病假，幾時有諗過可唔可以放丫....

Hello 2015~

好耐好耐冇更新，仲有人睇緊呢個 BLOG 嗎？ 剛踏入 2015 年，感覺嘛.... 2014 過得好快，好快。

基本上 2014 年，托懶身體 OK，工作 OK，家人 OK，平平淡淡，尚算開心。

今年本來冇打算出遊，突擊出遊 3 次 ，但寫完沖繩後一直未落手寫第二個首爾遊。剛由高雄番黎，尚未決定唔會寫遊記，或者遲啲得閒寫吓啦～


新一年新開始，希望來年一切繼續安穩順利～

Black Sunday!

1. 電話公司篇

一大早，電話响起，陌生的來電平時唔會接，但神推鬼擁接了。電話另一邊係現在使用既電話服務公司，對方表明唔係推銷，今次來電因為我既電話合約好快到期....

Sales: S ; D = 我

S：小姐既合約 9 月到期，想通知番你新既計劃
D：哦，你講丫
S：新計劃係 ＄190一個月，包 XXXX 數據同 XXX 分鐘通話
D：其實我份約係幾時到期，同埋如果 9 月出新 iphone 我想續約出機而家續左係咪要 extend 個約？
S：你份約9月底到期，如果到時你响我地公司出機咁呢份續約會取消
D：咁我諗吓先，一係你留底電話我有需要打比你
S：其實你要諗咩？你用左我地公司好多年勒喎，呢個 PLAN 好抵架喎，舊客先有... （下刪幾百字 ），咁我下星期再打比你跟進丫，星期幾你方便？

佢未講完我已收佢線。

唔知點解聽見佢話 ‘其實你要諗咩’ 既時候已經無名火起，我要諗咩關你咩事，用開就要繼續用你個台？用夠十年終身免年費？9 月都到期，要出電話留响你公司到時做埋續約就可以，點解而家未到期要比你困住？一定要簽你公司咩？ 九唔搭八。由於剛剛瞓醒，唔記得問佢貴姓同職員編號，冇打去電話公司投訴。

2. 餐廳篇

隨即諗起本來聽晚食飯轉左後晚，要打去改 BOOKING。電話長响了 2 次，等到冇耐性，搞其他野再打去，响左好耐差唔多想收線時有人聽了，隨即講明來意...

R: 餐廳職員 ； D＝我

D：聽晚 6：30 booking 改後晚，姓 X， 3 位。
R：小姐等等，我查 booking... 姓X， 電話係咪 9XXX XXXX？
D：係，都係 6：30 三位，但改星期二。
R：好的，改時間，係咪改做後日星期二？要 8 點還枱喎，OK？
D：係，3 位 6：30。8點 OK。
R：小姐幾多位？
D：3位.....
R：幾點？
D：6：30
R：X小姐 4 位星期二 7：30 OK 架勒，要 9 點還枱喎，OK？
D：唔係4 位，係3 位......，同埋係6：30.......，8 點還枱 OK.,..

天呀，我係咪打錯去精神病院呀！ 講講吓我都差啲搞錯時間同人數... 只記得8點要還枱囉。

3. Shopping 篇

去某小店想買碎粉，店員好好咁問我揾咩，我講左要咩後見佢去左攞，由於當時有位大客仔買好多野，睇黎冇咁快搞掂，於是睇吓舖頭其他貨。見差唔多，再去排隊比錢，等佢 check 貨比錢，差唔多到我時另一店員問我要咩，講完後該店員表示冇貨，要留電話，番貨再通知。可能因為今日全日都病病哋加上處於忟忟哋狀態同天口熱（whatever)，本來行到出門口諗住算數，越諗越慶，突然失控地行番轉頭問職員攞投訴電話。

職員不停話叫我留電話，番貨第一時間通知我，但我再次表明唔係個碎粉有冇貨既問題，呢個世界大把碎粉，就算佢唔再出我都可以買其他牌子，係個店員知道我要個粉，冇貨，見我响到排隊做咩都唔話我知？浪費時間。身為投訴專員（經常性去投訴），機械性問左店員名同職員編號，另一店員不停表示：唔好意思，呢位係新同事。唔知點解佢越講我越慶，佢新唔新同佢點處事有關係嗎？冇貨唔駛話人知？你明知佢新唔睇住佢？ 最後另一店員比左張咭片同個 email address 我。

反正一行出店我就用電話 email 左去投訴，氣消了，但坦白說換轉係平時我應該係 “哦，咁尤得佢啦” 就走左去，只能話呢位店員黑仔，遇正我谷左一日既怨氣...

好耐冇試過咁燥底，自己都唔知點解... 睇黎要認真揾方法提升日漸下降既 EQ...

中國上 FB/ Apple Daily 秘技： "OpenDoor" app (iphone & ipad only)

OpenDoor 並唔係一個遊戲，可以話係其一個翻牆軟件，一個 browser。若果你身處中國，或者使用公用無網絡，而該網絡限制進入某特定網址，打開 OpenDoor app, 輸入相關網址，就可以成功翻牆。目前係免費下載，限用 ios 系統，可能突然下架或者 disable。

OpenDoor 界面比用原 app (e.g. facebook, appledaily) 稍遜，但都叫可以一解 ‘相思之苦’。

其實另一選擇係每日比幾十蚊於香港電訊公司開通服務，可以用原本既 app 上任何網站，一分錢一分貨嘛。

Download link: https://itunes.apple.com/us/app/opendoor/id543808008?mt=8

動土

數年前有線電線邀請蘇民峰做風水節目，成日聽佢話屋企對住動土要用五行化動土局化解。早幾年買 X 年運程書間中都會講呢個局，查實佢講完都唔太知佢講咩。

家中師奶媽媽當年都聽佢講買左一堆野回家自行 ‘組裝’呢個局。早幾日响書局發現好識做生意既蘇師傅直頭做套裝出埋書，勁！

Iron Panda @ K11

K11 以藝術為題，間中有主題擺設。近期主題 Iron Panda，大型型仔响中庭入口，場內尚有迷你版，Kawaii 呢～

世界盡頭的電影院

夏日炎炎睇電影，涼冷氣簡直夏日最佳娛樂。如果免費請你睇戲，但要去沙漠睇你去嗎？原來世界有個如此之電影院，你要去嗎？

世界盡頭的電影院

From 《攝影札記》(Photoblog.hk)

吉卜力工作室場面設計手稿展

沙田香港文化博物館至8 月31日之吉卜力工作室場面設計手稿展至今去左 2 次，第一次剛好係博物館日，人山人海，見人多過見畫。於是上7 月初某 WEEKDAY 請假去多次！星期三成人HKD10/ 位，其他日子HKD20/ 位。

行 SHOW 攻略，首先一早十點幾要到，人比較少。

入館先去客服部取導聽器，一共 40 個錄音介紹，去到某啲有數字既手稿前選取相應號碼，就可以聽有關解說，唔係既就要自行憑想像欣賞了～ 租機 HKD10 一部，可駁 2 個 EARPHONES， 但租時只有一個 EARPHONE， 建議自帶。

取機後第一站，必去地下樓層既 'photo shop' 排隊影 3D 龍貓。第二次去新加了示範教學，地面有個腳印位，企上去，儘量跪低就可以影倒示範教學既效果！

影完龍貓同房可以影埋波兒的，與及房中有好多 POSTERS， 個人對此興趣不大。

影完龍貓上二樓，展廳外有不少巨形影相位同可以自畫煤炭屎鬼，建議先快攝先入展廳睇手稿。

館內不準攝影，好多一家大細去，但大概小朋友對宮崎峻都唔太熟，大部份應該係‘被陪’ 父母親大人去朝聖～原來一套動畫要好多好多畫稿，原來一幅畫稿包含好多意思，一個燈光，畫面移動方向。個人最鍾意天空之城同龍貓既手稿。第二次去聽住導聽器行，發現明多好多喔。

番地下一層，記得入精品店。第一次去排足一個鐘，第二次去時好好多，約十五分鍾。手稿 PRINT FOLDER 同畫最受歡迎，特別係一幅千與千尋湯屋正門畫，好靚～

買滿一百蚊送一個特制膠袋，幾靚架。

PS： 同場有免費李小龍館，有時間不妨一睇。李小龍其實幾 CHARM，可以順道了解吓呢位武術哲學家～

3D 畫筆

路過某 LOGON 發現早前電視介紹過之3D立體畫筆，好似好好玩但好貴喔，唔捨得買黎試...

  

新人唔易請！

今年年初，其中一個同事仔因個人理由離職了，被迫又開始一輪煩厭既請人 ＋ TRAINING CYCLE。見左十幾個人，忍唔住要用 ‘光怪陸離’ 黎形容。

其中一個斯斯文文，但無端端戴副豹紋隱形眼鏡.....

另一個，見完例牌問佢有冇問題，佢問：我幾錢人工？點出糧？ .... 查實重點係，我都冇話請佢。

有一個話好急進既：我知剛出黎做野係要濕碎野多，但都要有野學，同埋幾耐左右可以升職？係咪過試用期會加人工？加幾多？

仲有好多問非所答，九唔答八，例如叫其中一個用英文介紹自己，佢答 ‘可唔可以用國語？’

有幾個番左一段短時間就被炒，原因都好奇怪：今時今日都有人唔識响 excel insert row, 唔識用 MS Word 加 table... 冇錯，係自己大意, interview test 冇考，但我實在冇時間同冇耐性由電腦初班教起... 請人既時間亦真係冇諗過會有人唔識架嘛.... 如果咁都要 test, 一個 interview 就要半日...

仲有既人係 interview 時正正常常，但番到工就古古怪怪，例如唔識基本聽電話既技巧，會拎住個電話，唔 mute 就問人：我唔明佢問咩，點答 .....

好不容易請倒個正正常常既人，希望可以做得耐啦，教個新人真係好辛苦，教完佢做仲要 CHECK，唔啱再做再CHECK， 沒完沒了... 慘過自己做。

剛出黎做野，要抱住唔怕蝕底既心態，咩位做咩野，唔好以為濕碎野，簡單野就可以 HEA 做，好多時你既上級見你少少事都用心做，揾個更好既方法做，會對你另眼相看，升職都快啲。相反簡單野都做唔倒，點比其他野你做？但今時今日更多人係抱住趕收工既心態夠鐘即閃...

現實版明日之後：零下50 度極寒天氣

鍾意睇電影，因為好多情景冇可能親身體驗。而電影中好多 '題材' 往往好似 deja vu 彷如如魔法水晶球，預視一切。明日之後既冰封世界活現美國，睇圖可能覺得好 amazing 同得意，但難以想像如活在其中.....

Link:  http://travel.fanpiece.com/m/globalsavors/c1113020.html

香港半島酒店 85 週年 The Moment 動畫滙演

香港半島酒店於 2013 年12 月12 至14 日為慶祝酒店 85 週年，於晚上7:30, 8:30, 9:39 利用酒店外牆投映了為時約 5 分鐘的燈光動畫。14 號晚有去太空館門外睇 7:30 場次，幾得意，可惜落雨，好難影相或者錄影留念，剛剛於 youtube 揾倒由酒店提供片段， let's share~

旺角街頭

好少出旺角，出去買 XBOX GAME 時發現成條西洋菜街除了電訊同上網公司滿佈外，而家尚有唔少即影 Polarid, 小賣攤檔同街頭表演，短短幾條街各自各精彩呢～

Shoe Dictionary

鐘意買鞋，大概知唔同鞋款有唔同叫法，但唔知會有幾十個叫法，唔係 Shoe 咁簡單... 我只識入面唔到一半呢...

轉發自 facebook:

K11

尖沙咀近年好多新商場，包括 iSquare, The One 等，其中最鍾意行 K11。當然，與眾多商場冇分別，都係大型連鎖店為主，但商場既設置好人性化，好似頂層有十數張枱櫈比人座之餘仲有各式免費充電器。

休息夠了，商場地面經場有唔同 FUNCTION， 上周六就有 LIVE BAND 表演，仲有免費 Red Bull 飲呢～ 氣氛好輕鬆，商場職員個個打扮又 IN 又醒神，最重要係好多個都笑容滿面，難得有誠意既商場～

同場加映：之前心動過既 DYSON 吸塵機於 K11 做 PROMOTION， 見人試機，部機真係幾型仔呢....

夏天來了！！！

年度最憎既夏天鬼鬼崇崇就到左，好似濕立立既回南天今天冇黎過咁，一黎就成三十幾度，想點呀！熱到好似個人就黎溶，就黎暈咁... 咁熱去露營唔知會唔會熱死呢？身痕想去添....

出差後在公司渡過的一天

出差十多日，雖然休息左一個周末，精神同肉體依然處於行屍走肉狀態，魂魄好似尚未歸位。一早起身唔記得晒 CREAM 同防晒放左响邊；番到公司先發現唔記得帶公司咭；公司電腦唔記得 login password ; 臨出發時唔記得揾人幫手淋“草”，枱上唯一植物尚幸未死。反正感覺諸事不順，決定過一個唔用腦既星期一：瘋狂清垃圾～

多月來積聚出來超多文件同雜物，塞滿一個又一個垃圾桶，感覺好爽，就好似自己個腦都在同時清空中。與此同時，揾番多月前買落又未睇過既雜誌，加上一份又一份買雜誌送既記念品，決定拎番屋企當新書慢慢睇。

執到差唔多，LOGIN 一下久違既 MSN，一直以為已經唔可以用，點知尚有大量朋友 LOGIN 中，紛紛彈出黎話好耐冇見我上線，所以逐一聚舊一番，互相 update 近況，吹吹水。時間飛逝，轉眼夠鐘放工，久違了天未黑就番到屋企既感覺，打從心底感恩～

非人生活

出差歸來，離港十幾日，連續做足10﹣12 個鐘，每日都揹住做NOTEBOOK 同一大叠文件不停走來走去，電話費都打左成千蚊，番到屋企感覺個人散晒，精神體力都嚴重透支，把聲都沙晒。

以前成日出差，訓練出極出完成 PACK 行李，但至今都極之討厭要番黎要清喼呢個動作，特別係攰到死左既時候。尋晚唔到 9 點就去左瞓，但今朝七點唔夠就自動醒左，大概因為出差咁多日都係要七點起身，証明個人仲未完全放鬆。

整體黎講，忙左咁多個月，完左場 SHOW，感覺雖然好 X 攰，但都幾滿足，亦表示黎緊我可以享受大半年既悠閒生活了～

Dor's Back~

好耐冇寫 blog 了，原因只有兩個：忙，懶！

公事上好忙，keep 住 OT，大慨要到 5 月底先可以告一段落 ; 番屋企精神上減壓法 ：candy crush! 自己玩到 345 關，間中仲要忙上癮既媽媽過關。

依然 keep 住睇戲，今日睇完 “攻完 2077"，個結局都 OK，有少少拖長黎做，依然大 Tom Cruise 主義。仲有浪費左個戲情既 Mama, 超拖時間既 “白宮淪陷"，比較適合小朋友既 “魔境仙踪”，OK 既黄秋生版 “葉問”，好配合近來世界政局既  "GI Joe II"， 同近期比較鍾意睇既係 ‘北京遇上西雅圖”， like 戲里戲外既湯唯，仲有幾套但唔記得戲名了...

呢幾個月都去左幾次露營，入門版嗰隻，‘傢餐’ 越買越多... 大鑊...

停寫 blog 既同時，都好耐冇玩 gotmail escape game。仲有冇人 keep 住玩緊？有冇邊個好正我又 miss 左既呢？ 近期有咩發生？

PS: 阿澤，thanks for your email, 係你呢個 email 提醒我好耐冇寫 blog 呢：P 關於旺角既 real escape game，我呢期勁忙，冇時間去玩，你有冇去玩?