美容院奇遇記

今日新聞有一單僱客被逼簽約既新聞，詳文： http://hk.news.yahoo.com/舒適堡涉逼簽約-擅取卡連碌16次-214630892.html

好多大型美容院同健身中心都成日用呢啲技両呃人，點解呃極都有人中招，古語有云：便宜莫貪，真係有佢道理。

呢單新聞令我諗起大概十年前，有次陪朋友去 ‘現 X 美容’ 試做個 HKD38 facial，去到職員話優惠只適用於新客戶，為左核實身份要我地比身份證佢，當時亦無懷疑乖乖交出身份證然後入房試做。職員初時極力游說我同朋友分房做，話單人房會比較舒服，我倆堅持一齊，之後被帶入一間雙人房中。入到房換件袍，好快有兩位美容師入黎，一瞓低開始，兩位美容師不斷 sell 各式各樣既 treatment, 想我地改做幾百蚊既 facial, 由於我地係貪佢 HKD38 夠平先黎，要做幾百蚊駛咩黎呢到，所以我地十分堅持唔改做其他項目，美容師都話無問題。

針清途中，美容師對我地講呢個 HKD38 係個基本 facial, 蒸完 ＋ 針清就冇，但蒸完毛孔大左最好做個 mask, 而加之精華先做 mask 效果就最好，但咁樣一加要 HKD150 (咁上下），我同朋友都拒絕左，一來覺得呃錢，二來覺得個美容師手勢好求其，唔值得再比百幾蚊响到，於是唔駛半個鐘就做完左個 facial, 只覺得黎洗左個面。以為比錢走得？ 冇咁易。

試做完，兩位美容師响門口等我地換番好衫，帶我地去左一間房，中間一張辦公枱，對面係一個著 suit 既高級職員，而兩位美容師就企左响我地後面，封住左個門口。

一入到房坐底，高級職員四萬咁口，問我地個 facial 好唔好，我地話 ‘唔係好得’ 之後，佢仍然笑騎騎咁話：唔緊要，我地下次安排啲好有經驗既美容師幫你地做，包你地滿意。而家 promotion, 你地買 100 次平均每次都係 HKD2XX, 好抵架，你地兩個可以 share 一個 course, 見係你地先比呢個 offer。

我地堅持話唔駛，試做完都唔覺好，點會買，高級職員之後就响到促銷，由 100 次減到 50 次， 30 次，15 次， 10 次... 我同朋友都堅拒，成個過程差唔多三十分鐘，同我地做個 HKD38 facial 時間差唔多。而我實在比佢煩到堅忟，拎左八十蚊出黎就諗住走 （兩個試做夾埋都係HKD76），點知兩個美容師封住度門唔比我地出去！！！

個高級職員之後話，我同你地講左咁耐你地唔係十次都唔買呀嘛... 聽倒呢句火都黎，係佢自己响到狂 sell, 我地一早都話左唔會 join！ 我朋友係 ‘和氣派’， 不停話算啦唔好嘈，佢地人多呀，不如我買十次算啦... 但嗰刻我邊聽得入耳丫，淨係叫我朋友唔好出聲。嘈嘈吓之際朋友問左一句：係喎，我地個身份證仲响佢地到....

講完呢句，呀高級職員拎左出單出黎，叫我地簽十次，我就嘈佢：簽咩呀，你都痴痴地，要我地買幾多就幾多？你再唔比番個身份證我我轉頭就出去報警，上埋報紙雜誌爆呢單野出黎睇吓以後仲有冇人敢黎。 （嗰個年代尚未流行手機，唔係實拍片。而且我地兩個為左驚失控走去買 course, 都冇帶信用卡去，用手指簽咩！）

我地再嘈左一輪之際，有個類似 ‘經理’ 既人入黎打圓場，拎番我地兩張身份證黎，話今次唔收我地錢，一場誤會啫，唔好咁勞氣。我地拎番身份證都決定早走早著，唔再入呢間黑店！

除左呢單其實仲有好多，忽然想呢單先寫佢.... 但間 ‘黑店’ 今時今日都好似未執～