菲傭變港人？？

前幾日有個 friend 無端端 msn 問我點睇菲傭居港權問題，well...... 呢位朋友一向只對 shopping 同番工有興趣，當時我反而想知佢點解突然間關心起時事問題。

原來呢位朋友早一晚去 clubbing, 席間有人講起呢個話題，我呢位朋友隨口講左句 ‘梗係唔比得啦，佢一個帶晒成家黎，分分鐘搞到幾十萬人黎香港，點算。到時個個唔做野去攞綜援，咪又係我地呢啲納稅人比錢’ 。之後引發起連串爭論，我朋友同其中一個 'club' 友講到面紅耳熱，但因為佢平時冇咩留意新聞詳情，佢之前講既  ‘會帶幾十萬家人黎香港...’ 都係某日聽電視新聞講咁，講完再冇任何支持理句。而辯方另一邊，都只係講得出 ‘住七年就有權’ 呢個大道理。

呢班 ‘朋友’ 咁有興趣討論呢個題目，並唔係突然間關心起呢個社會，只係佢地唔少人屋企都有工人，响到諗萬一真係做七年就變港人，佢地要比最低工資咪 PK ..... 另一方面，工人做幾年就要換，想教死人咩，好工人可遇不可求呀... see, 呢個就係現實！

唔知係咪讀書時讀政治，雖然覺得香港政治無藥可救，睇報紙都係睇 ‘副刊’ 比較多，但呢單菲傭事件成日比人搬出黎辯論，多少都對正反雙方意見都有啲理解。正既不外乎人權，住七年就應該有 ’權‘ 申請做港人，而成件事確實係响呢個 ‘權’ 字上糾纏不清，點介定呢個權。有人搶住出黎話要人大釋法，但咁容易就叫人大釋法，又會引起另一波問題，好多隱憂。

最誇既一個反對論點係，舊年菲律賓人質事件，菲律賓個總統仲未道歉，國仇家恨點可以比菲律賓人做香港人？！而 ‘港府敗訴將會有超過四十萬人來港’，其實又有咩數據支持呢？人講就係？講嗰個咩句心？純粹挑起港人反對既神經？又有冇人比較過 ‘每年’ 大陸用結婚，來港生仔，港人內地出生子女，家庭團聚等等唔同名義黎香港既中國人有幾多？佢地又冇對香港造成負擔咩？

其實我對於呢個題目冇咩立場，當然我一直都覺得香港已經太多人，仲多人班菲人黎，香港應該好快出街冇地方行。而最終，想講既只係我地呢啲市民諗咩講咩又有咩用？唔通香港政府代表律師可以話：因為大部份市民唔想，所以冇可能咁就算數？？

無論首判結果係點，輸方都係不斷上訴，有排搞，咪又係浪費公帑囉。可惜浪費公帑係香港政府最叻做既野..... 真無奈。