Immortals 天魔戰神 (3D)

賣點係戰狼300班底，1億1500萬美元打做.... 但係我覺得除左某啲視覺效果有戰狼 300 影子外，奉勸一句：唔好嘥時間～

一向鍾意神話故事，怪力亂神既野都好吸引倒我，但呢套野只可以當作一套用幾個天神名做角色做既戲睇，同神話故事其實冇大關連。男主角 Thesus (提修斯）除左靚仔好打之外，成套戲佢都係行行企企，打交好多場面都好似就快比人打死咁滯，亦唔太知佢有咩吸引力連女先知 Phaedra 都自動獻身... 個神弓被搶，何解冇人想去搶番，就咁隨得反派 King Hyperion 拎黎放班 Titans （上次天神大戰敗方） 出黎？既然連個女先知都知把神弓可以放班 Titans 出黎亂世，點解班天神唔一早毀左個神弓？

最後一場，五個天神 （包括宙斯 Zeus) 着到成班金色聖鬥士聖矢咁打 Titans , 天神唔係應該有法力或者用魔法對打，何解都係打埋啲爛仔交？天神點解得五個？其他去晒瞓？ 一早知拉倒個山封住 Titans 就打完，一就就封山咪得，駛咩死淨 Zeus 先咁做。Thesus 做左咩最後可以變做天神？仲有... 好多唔通既地方....

套戲女主角應該係女先知 Phaedra (一千零一夜女主角），但我反而覺得飾演 Athena （雅典娜女神）既 Isabel Lucas 好搶 （其實睇完呢段 youtube 差唔多睇晒 Isabel 戲中既戲份)：

P.S.: 呢套係 3D, 我响 Mega Box UA 睇，但冇 3D 眼鏡派，係咪 UA 都取消左免費借用而必須自備？