Movie: 逆戰 The Viral Factor

逆戰，聰明地响馬來西亞取景，周街可以做爆破，放三架直升機亂飛，成街車任撞，相信响香港都好難做到。

故事其實幾好簡單，周杰倫飾演既國際安全局探員 Jon 响中東出任務其間意外受傷，子彈入腦隨時死亡，同事兼女朋友於同一任務中死亡。Jon 知自己時日無多，決定回家陪行動不便既媽媽 （金燕玲），此時媽媽先講出當年係佢帶住 Jon 離家出走，而家想見番 Jon 既老豆（廖啓智）同阿哥 (謝霆峰）。Jon 擔心自己如果死左媽媽冇人照顧，所以專程去馬來西亞諗住帶老豆同阿哥番去見亞媽，點知阿哥剛剛逃獄被通輯，重要帶住個老豆同個女逃亡。Jon 為左保護阿哥一家，決定瞓身幫佢...

成套戲完左，都覺得周杰倫得一個樣，唔多覺佢識做戲，但身手都幾好 ； 雖然謝霆峰殘左好多，但佢做周杰倫大佬好多唔多似囉，但謝生確實做到七情上面；安志杰由頭 chok 到尾，由頭講英文講到尾，係咪想靠佢將套戲升級扮荷里活西片？成套戲好落本做特技，爆破同打鬥，可惜太誇張，兩個主角不停中槍都打不死，次次比人追次次都走得甩，個細路女最後比人注射病毒變晒樣，焗响個袋入面咁耐，最後疫苗都未出倒，但最後都冇死？馬來西亞重犯霆峰點解最後可以去見完北京阿媽先去自首？朋友話齋，講故唔好駁故，唔好帶腦去思考睇吓套戲都 OK 既。

戲中廖啓智同金燕玲戲份唔多，但好搶！尤其係金燕玲，好鍾意聽佢講國語，由宋家皇朝開始已經覺得佢講國語超好聽～劇既尾段佢演譯比謝霆峰既錄音一場，好正....