深水埗一日遊

計劃十一月初再去露營，朋友話見上次塔門露營時見另一個營好似用 LED 燈條做燈，都 OK 光之餘又靚，於時我地出發去鴨寮街揾燈去。出發前揾食，上西九龍中心行左一轉。老實講，住响香港咁多年好少去深水埗，次數可能十隻手指都數得晒。西九龍中心應該去過 1﹣2 次... 好多年前... 今次再去，發現呢個西九龍中心與記憶中的一個大不同了：

首先係個 FOOD COURT， 雖然唔算好大，但係舖量好多（起碼三十間），仲要係小舖家庭式經營為主，仲有十幾蚊個飯，去邊到揾：

行行下見一間 ‘梁蘇記’ 遮舖，唔知係咪好耐之前個舞台劇做既賣遮家族梁蘇記既真身呢？

 仲有個好多宅男响入面既 AKB48 OFFICIAL SHOP，賣好多呢個組合既精品... （查實我唔知佢地係咩）:

5﹣7 樓左右，其中兩層有一邊變左劏舖，即場中所叫既 ‘蘋果商場’，行响裏面好似番左大陸，類似羅湖城咁既舖，細細間，有賣假髮，做指甲，精品，水晶，手工藝舖，勞作舖，衣服鞋襪咩都有得賣。人流都唔少，但似乎旺丁不旺財：

 西九大概 8 樓仲有一層好多盲人按摩店，收費好似唔太貴，但人太多，我驚比人打唔敢影相 ：P 西九比記憶中人多了，舖多了，旺了，唔似大商場咁來來去去都係嗰幾間舖，相對地多元化，但舖頭似乎又太細，一間舖入幾個人已經爆場，可能閒日行會好少少。

行左一輪西九，再行鴨寮街揾燈。想要既 LED 燈條揾倒了，但問過幾家店員有關駁電蕊盒通電既問題，一個話可以用兩日，一個話四個鐘，都係唔敢博... 冇賣就走了。

離開深水埗時，路經一間好大既紙品舖，日曆月曆咩都有，好壯觀。响咩都電子化既年代，估唔到佢地仲可以做到咁大，佩服：

仲有，露過間好熟口面既餐廳.... 咪係 ‘怒火街頭’ 鄭喜穎成日去嗰間囉：

呢個角度可能清楚啲：

仲途經一間軍用舖，但基本上都係賣氣槍同配件咁：

相信係長期使用既 ‘臨時槍靶’：

氣槍好真之餘確係唔平喎：

再來係是日平民晚餐，山東餃子館，抵食之餘味道都 OK 的。先來 ＄12 串的燒羊肉串，幾得：

再來主角：水餃，包括另加兩蚊既煎較同湯餃，個人比較喜愛湯餃點醋：

食飽飯，時間尚早，決定行路去.... 旺角... 話近唔近話遠唔遠，今次行人少既塘尾道直穿過旺角，中途好多舊式店舖，仲有已經改建既雷生春堂。相對於改建前成間鬼屋咁，而家確係好好多，可惜冇得入去睇：

藥店雷生春堂改建成中醫藥學院，主題切合，I LIKE IT：

行吓行吓，行左去... 油蔴地... 係咪好勁呢～ 最後行到去佐敦搭車番歸，全程個半鐘，配合涼涼既天氣，邊散步邊傾計，查實都相當舒服架～

得閒可以再揾啲少去既地方遊盪吓，發掘個不一樣的香港都唔錯～