JRE TEST

上星期六參加左一個政府工既考試，其實都係玩吓既心態去，事前毫無準備，應該話唔知點準備就去左。地點係九龍灣展貿，3：15 分前應該要開考，考生要提前五分鐘到達試場，預設時間三小時三十分鐘完成完成試題。考試題目都係一條好長既英文題目包括好多資料，再做一篇分析作答，中文題目就係按一個指定題目寫出個人見解。開考時覺得時光倒流，好似番左去中學會考同 A-Level， 只係冇担心既感覺。一如以往，我都唔會留到最後倒數，做完就走。英文答了三頁半紙，中文三整頁，好耐冇見過自己手寫咁多字，如果唔係話明唔比開電話，我大概會影張相留念一下 ：P 而考試結果一個月後通知。

同之前考 CRE 一樣，去到試場所見都係一班 fresh grad 既朋友居多，好多都拎住 notes 响到温書，其實我都幾好奇到底呢種試有咩可以準備。當中唔少都有考生有男／女朋友謢送陪去應考，更有數個係由父母陪同應考... 對於父母陪去考試，感覺有少少怪異，冇記錯既 JRE 試考生起碼都大學畢業，應該過二十啦，雖然當日只係去考試，但都係見工既一部份，唔通見工都帶父母去？

有關座既位置，其實幾個門口各自有張好清楚既座位圖，睇完入到試場好易就揾倒自己個位。但係唔知點解，在場所見好多考生當各監考員好似帶位員咁，不停問人自己座邊....

到三點十五分，準時開始，大門關上，監考員宣讀各項規則後，突然... 試場大門打了，有十幾二十個考生入場，再次揾左一輪位置後，監考員再重覆宣讀各項考試規則，及比時間各遲到考生填寫考生編號等等，考試先正式開始。老實，要其他準時到既考生浪費時間重新陪遲到既人等開考，咁做其實唔太公平。如果一開始就預左會有一班遲到考生既，何不延遲十五分鐘開考，一次過先做所有指定程序？真係相當莫名其妙。

而開考後十多分鐘，已經有考生離場，相信該時段離場既人都冇可能答晒先走，因為我當時連題目都未睇晒！

另外，考試規則响英文答題簿上寫住要每行書寫，唔好隔行，考試前監考員亦比左成分鐘各考生睇嗰幾行規則... 言而在下左邊考生，好快就開筆書寫，而佢就係隔晒行咁.... 當然距離問題我睇唔倒佢寫咩，只見佢係隔晒行咁寫得好快... 到底係佢做人有原則定漠視規則呢？真係好謎....

得閒去考個試 train 吓自己之餘仲可以見吓人生百態，花一日時間都值得！