天梯 - 主唱：C AllStar

無無聊聊睇超級巨聲，參賽者得一個唱王力宏歌嗰位叫 OK， 其他都唔係太得。今晚係同歌星合唱，其中一位合唱單位係 C AllStar。前一排响 903 （電台）播歌時聽過呢首歌好多次，但冇留意細聽歌詞。今晚同個參賽者合唱， C AllStar 突然 sharp 晒，睇完我想聽原唱，於是上 youtube 揾 MV，發現首歌背後有個真人真事既愛情故事。首歌本身已經好聽，睇埋個故事，再睇番歌詞，不停狂 loop 呢首歌，like x n times~

故事：四十年代重慶真人真事六歲的時候他認識了比他大十歲的她。 縱使受盡白眼和閒言閒語，在十六歲那一年他跟她說：「讓我照顧你一生一世好嗎？」 為了避開俗世，他們遠離塵世到深山定居，過著艱苦但快樂的生活。 上山下山步步艱難，為了怕妻子受傷，他決定用雙手開墾石級。 結果用了五十多年的時間，鑿了一條六千多級的石梯。 終於在02 年一隊登山隊發現了這條偉大的天梯和這個驚世的愛情故事。 故事主人翁劉國江先生在07 年與世長辭，她的妻子決定留在深山，終生與天梯廝守。 謹把此曲獻給建造這偉大的愛情天梯的劉國江先生。

《天梯》
主唱：釗峰@C AllStar 

作曲：賴映彤@groovision 

填詞：鍾晴

編曲：Adrian Chan@Sense &賴映彤@groovision

監製：簡@groovision

如可　找個荒島 
向未來避開生活中那些苦惱
如冬天欠電爐　雙手擁抱　可跟天對賭

無論有幾高　就如絕路
隔絕塵俗只想要跟你可終老
來跨出那地圖　不需好報　都只想你好

能共你　沿途來爬天梯　不用忌諱
中傷流言全悍衛
留住你　旁人如何話過不可一世
問我亦無愧　有你可失去我一切

幾多對　持續愛到幾多歲
當生命　仍能為你豁出去 
千夫所指裡　誰理登不登對　
仍挽手歷盡在世間興衰
幾多對　能悟到幾多精髓 能撐　下去　
竭力也要為愛盡瘁 抱緊一生未覺累

前方　仍然大霧
到懸崖或海邊也許永不知道
能相擁到白頭　一起偕老　不跟天鬥高

前面有幾高　一片荒土
每步隨著攀登叫雙手都粗糙
從崎嶇這路途　開墾給你　可走得更好

能共你　沿途來爬天梯　黑夜亦亮麗
於山頭同盟洪海中發誓
留住你　旁人如何　話過不可一世
問我亦無愧　有你可以　拆破這天際

幾多對　持續愛到幾多歲
當生命　仍能為你豁出去 
千夫所指裡　誰理登不登對　
仍挽手歷盡在世間興衰
幾多對　能悟到幾多精髓 能撐　下去　
竭力也要為愛盡瘁 抱緊一生未覺累

握著手　而幸福包圍泥牆簡陋
牽著走　懷著勇氣至愛得永久

幾多對　持續愛到幾多歲
不轟烈 如何做世界之最
千夫所指裡　誰理登不登對
仍挽手歷盡在世間興衰
幾多對　能悟到幾多精髓 能撐　下去　
竭力也要為愛盡瘁 抱緊一生未覺累

幾多對　持續愛到幾多歲
當生命　仍能為你豁出去

3 Idiots 作死不離三兄弟

朋友睇完極力推介，但實在冇意欲去戲院睇呢套兩小時四十五分鐘既印度戲 - 作死不離三兄弟。老實，睇倒個中文戲名都冇諗過會去睇。上 PPS 見有呢套戲，睇左，比想像中好。

印度片當然唔少得中間穿插既 bollywood 歌舞，除此之外故事其實唔少輕鬆笑位，一套帶出 messages 既戲，兩個幾鐘都唔覺悶。重點係，其中一個主角幾靚仔，有少少吳彥祖既感覺, 睇吓似唔似丫～

P.S.: PPS 中譯名為 “三傻大鬧寶萊塢”

Harry Potter in 99 Seconds

99 秒講完咁多集 Harry Potter 故事，好多人話其實 video 中係一人分演兩角，都有人話係 twins, 我都唔知答案，但確實唱得唔錯。

Anyone know is there the same guy or twins in the video?

Contagion 世紀戰疫

內有劇情，不喜勿看

＿＿＿＿＿＿＿＿＿＿＿＿＿＿＿

今次冇做功課 （睇影評）就去左睇，只知有 Kate  Winslet 同講傳染病。睇完係.....唔鍾意呢套戲。

套戲係話 Gwyneth Paltow （桂莉芙柏德露）出差黎香港，感染左一種好勁既變種新病毒，透過接觸感染，潛伏期好短，死亡率極高。片尾最後交代病源係一隻蝙蝠响樹林食左一粒果實，去到一個豬棚，豬棚一隻豬食左粒果實，隻豬比個香港廚師買左，個廚師唔係咁衞生掂過隻豬後冇洗手，之後見倒 Gwyneth  同佢握手同合照。就係咁，病毒隨住 Gwyneth 去澳門玩同好多人接觸，响賭場傳染左比好多人，病毒再跟住佢中途飛左去芝加哥 （同前男友幽會），最後跟佢番去佢住既鹽湖城，傳染埋比個仔令佢死埋。又因為佢搭機途中遇倒其他人，病毒以幾何級數速度，四周擴散。

套戲開初十幾分鐘尚算節奏緊湊，但之後就變左敍事形式，平舖直敍，好慢，好悶。重點係超睇超唔舒服，點解？

戲入面有唔少場境取自香港，其中有何超儀同徐天佑。徐天佑係賭場職員，掂過 Gwyneth 隻杯（咁就死得）超儀係佢老婆之類受感染死埋。佢兩個出場冇幾多次就死左，好似冇對白，但都叫做令人記得‘出現過既角色’ 。最離譜係做香港負責接待世衞醫生個人 （唔知咩人）敢死話佢條村好多人，包括佢媽都病死左，佢為左死淨左既村民，竟然拐帶個世衞醫生，要世衞一出疫苗先比一百支比地條村。九唔搭八，當香港人白痴！ 後尾個被拐既醫生响個鐵蓬入面教小朋友畫畫，呢啲地方我淨係响電視大陸偏遠山區既探訪片先見過，香港邊到有呢啲呀.... 仲成村人响間大木屋到避，不如你話番比我知條村响邊我得閒去見識吓。仲有，响香港開會，咁大單野有咩理由小猫三兩隻圍住張枱仔講完就得？ 無端端又廣東話又國語，你到底知唔知自己去邊到拍戲呀導演，做吓資料搜集啦。搞到香港好似第三世界未發展咁...

最後想講，套戲好浪費演員，除左之前講既 Gwyneth Paltrow, 套戲仲有 Kate Winslet (疾病防護中心去前線調查既醫生，中途都染病死左），Marion Cotillard (世衞醫生，比人拐帶嗰個，但後尾好似有斯得哥爾摩症候群咁），Matt Damon (Gwyneth 老公，但唔知點解有抗體咩事都冇），Jude Law (freelance 記者，借件事揾錢，no good....，呢套戲拍得佢唔靚仔)，同幾個眼熟又講唔出咩名既演員。咁多好演員，個個都唔太知做咩咁，冇咩對手戲，超嘥料～ 但如果唔揾呢班人拍，大概都冇咩人會去睇，包括我.....

咖啡奶茶

至愛港式奶茶，飲開走糖少奶，咁先飲得出茶既香味。好多時叫走糖，茶餐廳會將淡奶轉做練奶，其實咁會多左一陣奶香同甜，但健康角度就唔係咁好。

咖啡嘛... expresso, 沖出黎既香味令人舒服又放鬆，但入口就太濃，飲咖啡都係鐘意 Latte。晚餐食西餐後飲一杯齋啡，感覺一餐完滿結束～

好耐好耐以前，開始每日一杯奶茶或者咖啡，讀書時自己住，更加沖定一公升裝熱咖啡，放涼放入雪柜，日日飲一支咁滯。個樽入唔晒，仲倒埋入冰格，飲既時候加埋咖啡冰，超正，消暑特飲。

一般講咖啡有提神作用，但有時夜晚食完飯同朋友飲杯咖啡，轉頭番屋企都瞓得著，所以呢個作用大概對我冇效。

唔知係咪咁多年黎咖啡因已經入血，一日唔飲一杯咖啡奶茶，中午過後就頭痛都死。唔好以為飲番冇事，開始痛既話飲左都係減輕痛既程度，要瞓醒第二朝先冇事。睇黎已經中毒太深，冇藥醫勒 >.<

一年前要續會... 點解？ 因為公司規定喎

兩年前參加了 ‘＋洲’ 健身中心，會藉應該於 2012年9 月9 日到期。

星期一，有一位職員打來提醒我會藉 ’就快’ 到期，提我續約，而家打黎同我講細節。我問職員合約應該係 2012 年先到期喎...

職員答：係呀，到期一年前要續約.....  (我聽完之後心諗：係咪痴線架)
但我好平和咁同職員講：咁一年後你先打比我續約啦

跟住連續幾日都有人打黎 ‘提’ 我續約，我都係叫佢地一年後再打黎。到今日，有位哥哥仔，一打黎就命令式同我話： X小姐，你會藉到期我打黎同你續約。我答佢：一年後到期丫嘛，你日日都有同事打黎提我，我咪話左一年後先同我講囉。點知位哥哥仔話：唔得架喎，公司規定要到期前一年續約架喎。

首先，呢位人兄語氣好似稅局追稅咁，而家我一定要續你個會？？ 香港好多健身中心，你憑咩我一定要續你。第二，你公司規定關我咩事，我唔係你公司職員，何解要遵守你公司所謂既‘規定’ 呢？？ 第三，一年後我要續會，唔通你會唔比我續？

電話中我 ‘醒’ 完哥哥仔之後，我冇再聽佢講野，只講左句：唔該落記錄唔駛再提我續會，我到期都唔會再續架勒。

好心啲公司 train 過啲 staff 先好比佢地做野啦，跟本就亂黎，得罪人多稱呼人少咪呢啲囉！！！

C4N U R3AD 7H15?

Original Source: Facebook sharing post