Dor's Talk: 10/01/2011

10/29/2011

AppNavi: An Uninspired Man 無聊的男人（Free.... again....?)

AppNavi apps 上方小框顯示 “An Uninspired Man 無聊的男人”免費下載.... 但唔係一向都免費咩？？好謎....

攻略： http://dorstalk.blogspot.com/2011/08/appnavi-escape-game-uninspired-man-free.html

數字油畫

第一幅完成作品，唔知會唔會係最後一幅呢？

數字油畫，其實據講係比小朋友玩既油畫，係一種填色遊戲，打開見倒咁多數字真係有啲頭暈.... 回到一切之初：

但係只要一種種顏色咁油....

油呀油.... 每油多一種色就見倒越多線條...

唔經唔覺開始見倒立體效果....

每一條線條，顏色組合出黎變左一個

到差唔多油完，覺得終點在望勒....

呢幅 40x50cm 既畫，一共需時約二十小時完成... 油完晒好開心，但有啲腰酸背痛：P

P.S.: 上網 search 數字油畫都見香港好多地方有得賣，呢幅香港約 HKD128﹣148 一幅，入面已經包晒油畫布（有晒數字同線）連木框（已釘好），畫筆同所需既所有顏料。我同朋友一齊淘寶，價錢就平香港好多勒。

另外，油錯唔緊要，乾左用另一種顏色蓋上就可以。線太幼好難油既，可以連埋兩條線一種色油晒，咁大幅畫唔覺既。

10/27/2011

AppNavi: The Locked Up Girl 幽閉的少女 (Free)

新 game，再次係一個 good & bad ending 既遊戲... 好結局方法見本文最底, enjoy~

取鎖匙後開大門前，去化粧枱用鐵鎚打爛玻璃鏡，見鏡後有紙，離開就是好結局～

10/25/2011

那些年，我們一起追的女孩

話說星期天路過 APM, 一張 A 仔 poster 吸引住我既目光，原來係憑戲票＋ 30 蚊可以換購一套三個 A 仔主題既 clear folder，為左 A 仔，身為 GH 同 UA fans 常客既我，第一次响 Palace APM 睇戲，睇左呢套城中話題之作：那一年，我們一起追的女孩

影評話唔錯，好多人話好得，睇完後我反而覺只係好笑。可能戲中既 ‘共鳴’ 男生比較易感受，可能讀書時代萬人迷既女生先會勾起回憶，會心微笑，好可惜，我兩類人都唔係，我只能當係輕鬆笑片睇。劇情某啲橋段比較誇，搞笑為主，睇完覺得結論係 Right People, Wrong Timing...

反而戲中輕輕帶過既 “平行時空” 吸引左我既注意，呢個係 Fringe 既主要概念，莫非係出下集既伏線？男女主角會响另一時空大團圓？

據聞套戲係九把刀自己既故事，女主角真有其人，亦係靚女教師一名。因套戲大賣而請假一年與老公避走內地 ~

雖然呢套戲 not my cup of tea, 但係，睇完片頭我已經覺得值回票價 ^O^

事源我為左 A 仔睇戲，而電影播放前例牌提示短片... OMG.... A 仔動畫是也 ^O^ 真係好有衝動去偷拍.... 當然我冇做到，網上揾唔倒條片，只 google 左幾張圖:

Images captured from: http://blog.asiaclassified.com/b-wing-x-broadway

AppNavi: Special Cleaning -The Old Man Madness 特殊的掃除~瘋癲老人~ (USD1.99)

微博見有新 game, 响 apps store 揾左好耐先揾倒....

再次係有 good ending & bad ending 既遊戲，答啱走去報警，答錯就.... 遊戲最後要答關於一個古老皇朝既事，房內既書要先睇晒，一個字講晒 ﹣ 煩！最憎温書。

唔難玩既一個，十幾分鐘玩完，咁又十幾蚊，係咪應該留番黎食左佢呢？

最後答案： C, A, A

10/24/2011

鬼故：學校幽靈

多謝 Agnes 提供既鬼故

＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿

話說當年我留學英國，我所就讀既寄宿學校係一個好有歷史既女校，有位師姐同我講過，我地學校曾經有位師姐唔知發生咩事，有一晚喺所住既房間跳樓自殺。我地校舍唔係好高，最高只係得4層樓高，而個位自殺既師姐所住既房正正位於最高樓層。當時佢係半夜自殺，但係我地校舍係好似"堡壘"咁，10點左右刪左大門就無人會入到去，所以並無"看更"會巡校舍。到大概5點左右，有修女早起經過見到個位師姐喺地下淹淹一息，地下已流到一大灘血，送院途中已不幸離世.....

自始我地房間既窗全部封到只可以開到約15cm高，而出事個間房己經封左無再比人入住。我地學校每一個學季都會轉1次房，點知有季好不幸地我轉左去事發房間既隔離間房！

我係同另外一個女仔一間房，大家初初入住個陣都有d驚，住左一排都無異樣，大家都無再為意呢件事。學校每晚大約10點鐘都會有修女巡一次房幫我地熄燈訓覺確保每位學生都返左房。我地間房個窗係望到修女回程必經既對面個橦宿舍，臨近考試我地想開夜車溫書，我地都會喺熄燈後企係窗邊見到修女返左去我地會開盞小檯燈溫習。

有一晚我地如常喺窗前等修女返房，見到修女返左房，咁我就拎轉頭諗住同我室友講可以開燈，點知當我一拎過去個下，我見到有對半身白袍既腳令空喺我室友個頭既左邊飄下飄下..........我當時即刻呆左！我室友見我呆左問我咩事，我當時驚到唔敢講，又驚嚇親佢，我只係同佢講今晚開檯燈我同佢一齊訓 (其實我當時既反應，我室友應該估到咩事)，結果大家齊齊縮係張床度成晚唔敢訓！到第二日我地同一個師姐講發生既事，佢同我地講自殺個位師姐好似係0個個月去世，為左確認日期，我地去左學校其中一個花園，個度為左記念個位師姐種左一棵小樹，上面有寫佢既名，出生日期及死亡日期。去到結果發現，我見到野個晚正正係佢既死忌..............

之後我地將屋企人比我地既玉呀，十字架呀，念珠呀，所有保平安既野帶晒係身，過左一排，我地終於捱到轉房，遠離事發房間了........

鬼故：看不見的同屋 II

看不見的同屋 I 後篇，其實中間應該仲有幾段小插曲但我唔太記得詳情，所以 skip 左，只寫我記得既部份.....
______________________________________

朋友雖然見手上有紅印，但回想成件事，佢覺得成件事都似發夢咁，天性樂觀既佢話啲紅印可能佢瞓覺唔知點整倒，過幾日就冇事，但佢醒左之後就即刻出街～

事隔幾日，佢家姐番左工得佢一個响屋企，佢响廳睇睇吓電視瞓左。佢瞓瞓吓隱約聽倒有一男一女傾計，起初以為係電視聲，但聽唔倒談話內容。突然佢好清楚咁聽倒把女聲話：煲乾水勒，仲瞓

朋友即醒，聞倒一陣濃味先記得廚房煲緊湯，佢立即去睇，發現啲水真係煲乾晒，就黎火燭咁滯，煲報銷了。

嗰晚，朋友等家姐番屋企就同佢家姐講番呢兩件事，點知佢家姐話：我知呀，有一晚我瞓瞓吓，轉身見倒個著唐裝衫既男人背向佢，瞓左响佢隔離。仲有一晚佢半夜放工番屋企，入屋見個長髮女‘影’入左佢房。佢家姐話响到住左幾個月都相安無事，佢今日仲提你煲乾水，多個人照顧你個大頭蝦都幾好丫，大家各自生活咪算囉。

朋友聽完，話佢家姐做咩唔話佢知，家姐只答佢：層樓住得好好哋，唔通咁快搬咩，上屋搬下屋唔見一籮殻呀.... 總之，家姐覺得一啲問題都冇。

之後，有一晚，朋友瞓瞓吓，聽見一男一女一小朋友對話 ﹣
男：原來佢見倒我
女：你做咩瞓人張床
男：有床唔瞓唔通瞓地下
小朋友：難得有人陪我玩，唔好嚇走佢呀
男：係喎，我未同細妹打招呼...

朋友開頭都以為發夢，但當佢聽到最尾一句，佢極速著番件衫，衝左落街，打比家姐話佢知件事，佢家姐答應佢聽日揾個 ‘師傅’ 睇吓間屋。之後，師傅睇完既答案係，屋入面有幾個 ‘舊住客’，住左响到幾十年，啲‘住客’都冇惡意，只係同佢兩姐妹玩吓。師傅幫佢地做左少少儀式，臨走時講左句：冇事架勒，間屋風水幾好，仲好旺桃花架，安心住啦

最後，兩姐妹一年內先後結婚，家姐仍然住响嗰間屋，但再冇見倒呢幾個 ‘住客’了。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
看不見的同屋 I： http://dorstalk.blogspot.com/2011/10/i.html

內地孕婦

剛剛電視新聞提及一班本港孕婦為了反對大量內地孕婦來港產子而上街遊行，畫面所見好多媽媽抱住小朋友或者推住嬰兒車上街去。今日天氣雖然唔算太熱，但間中客串照顧小朋友既我都明白咁做都幾辛苦。

我有一個朋友，剛剛於上個月生了個小朋友，佢知道預產期馬上去政府醫院排期，要第三間醫院先有位。佢响政府醫院有做檢查之餘都有揾私家醫生，因為佢話政府醫院可能人太多，檢查有時好求奇，亦要等好耐，另外係佢要番工，有時約食飯前後產檢佢就基本上要請一日假。

每次佢去到政府醫院做產檢都以為自己番左內地，四周圍都係講國語或地道方言既媽媽，有次佢做完檢驗去比錢，前面排左個國語媽媽話冇港紙，要比人民幣，醫院職員叫佢去提款再番黎，但個國語媽媽講左一大輪話人民幣你一兌一收你有著數啦，港紙唔值錢架而家。醫院職員話用廣東話回應話佢唔識國語，總之醫院唔可以收人民幣... 結果我朋友被迫排左成半個鐘就等佢地解決件事。

到朋友生仔當日，因為唔想因為佢打針止痛令 BB 一出世又要打支針（咁上下，我都唔知原因），佢選擇左吸止痛氣。當佢生得之際，醫院通知佢止痛氣冇貨.... 朋友被迫响冇止痛情況下生左個 B，佢話永世難忘。後來同其他生過小朋友既人仕講開，原來話由於太多孕婦生仔，醫院基本上止痛氣既存貨係兩個孕婦預備一個，可以話同時間生仔既就手快有手慢冇（傳聞，不能確實）。又因床位緊張，佢生完第二日就比踢出醫院回家去。朋友出院後感慨地話：又話照顧本地孕婦優先既？

冇歧視內地孕婦，反正我冇打算生仔，只係香港醫院根本就 support 唔倒咁多人黎生仔。而且香港就黎八百萬人勒，再黎咁多人，香港就黎填埋條維港，將港九新界同離島連埋晒都唔夠地方住.... 未填之前又炒到啲樓幾萬蚊一尺..... 唉... 做香港人有時都幾灰!!!!

10/23/2011

Intelligent Nutrients Shampoo & Conditioner

我係一個好敏感既人，皮膚尤其差。先講手，一定唔可以掂洗潔精，掂親都會勁甩皮，萬試萬寧。天氣乾燥手指會裂到流血，所以一到冬天有幾支指定牌子 hand-cream 一定要常伴我左右，梗有 ‘幾支’ 响左近。試過有次冬天出 trip 唔記得帶用 hand-cream，對手爛到痛，要包晒膠布，十隻手指冇隻好，一邊打字手指都會痛。

塊面就每當壓力太大，唔夠瞓等等因素，可以勁爆瘡之餘塊面會一撻撻紅腫，好彩咁多年黎終於揾倒一系列啱用護膚品，病發情況少左好多 (touch wood)。最樣衰一次係其中一隻眼，番番吓工唔知點解眼皮腫到好似比蚊咬腫到隻眼打唔開咁，要幾日先好番，之後嗰幾日番工日日都要同人解釋一大輪。

講番無端端做咩講洗頭水... 其實我既頭皮都係好敏感，呢期天氣又開始乾，頭痕頭皮不斷，頭皮多到個情況係令我唔敢著黑色衫，因為頭皮多到由出門口至番屋企不停拍都冇用，多年黎不停轉洗頭水同睇醫生都改善不大。Intelligent Nutrients 呢個品牌其實近期好多 blog 或者媒體都有介紹，我亦睇左唔少資料睇吓佢係咩，但一直冇衝動真係走去買。直到幾日前睇 Winifred Lai 's blog, 黎小姐呢句好 hit 倒我： IN的洗髮水不是生髮水，但因為是certified organic，九成幾有機材料，所以改善甩頭髮的情況，丟少了，頭髮自然多了

人年紀大左，頭髮生長慢左，頭髮無可避免繼續甩，頭髮天生稀薄，又幼又無力既我，每次洗完頭見倒甩出黎既頭髮都好驚會變光頭。剛啱對上支洗頭水差唔多用完，good timing, 走去買黎試。連續用左幾日，只想講：amazing, 頭皮大幅少左，洗完頭無可避免既脫髮都少左。Sales 姐姐警告話起初用既幾星期會好 ‘鞋’ 我都感受唔倒，可能本身頭髮已經傷無可傷 (高峰期一條頭髮可以開 8 個叉，我認真數過的）....

呢隻 product 賣點係"有機"產品，以前我覺得"有機"只係賣貴啲既藉口，但近幾年發現我用 ‘有機’ 野真係令各式各樣敏感情況改善... 而且呢隻洗頭水同護髮素有薄荷成份，用落有少少涼浸浸又幫我舒緩頭痕，味道都好舒服。雖然二百幾各一支，但都相當大支，最重要係好用同幫我去頭皮。

Product Information: http://www.intelligentnutrients.com/cart/

http://www.intelligentnutrients.com/cart/categories.php?category=Hair-Care/Cleanse

iphone game: Haunted Halloween Escape (Free)

易玩應節免費逃走 game, download Link: http://itunes.apple.com/hk/app/haunted-halloween-escape/id473596157?mt=8

AppNavi: Strange House - Free for a Day 是日免費

Download Link: http://itunes.apple.com/hk/app/escape-game-strange-house/id470829370?mt=8

多謝 Agnes 通知，今日 Strange House 免費喔～ 3D 畫面係我覺得目前 AppNavi 出過最細緻最靚既一個，只係不停上上落落都幾煩同幾攰：P

攻略： http://dorstalk.blogspot.com/2011/10/appnavi-strange-house-usd199.html

10/21/2011

鬼故：看不見的同屋 I

下畫出左個冇料到既故事，而家補番個真人真事，但因為故事太長，會斬件兩集出的。

朋友家姐職業係白衣天使，早年自行置業，邀請佢個妹（我朋友）一齊住。朋友同呢個家姐感情一向好好，唔駛錢又有地方住當然搬左去。

姐妹倆都係冇宗教同比較隨心既人，入伙冇做拜四角儀式，家中亦冇任何神像或者裝香。入伙後不久某個星期六，朋友於家中午睡，佢張床係上格做床下格書枱＋衣柜，當佢瞓瞓吓，覺得有人搖張床，越搖越大力，好似地震... 但佢大小姐依然唔肯起身，照瞓可也。突然間，佢好似聽倒把細路聲，重覆幾次講：姐姐起身同我玩丫，跟住，有隻好凍既手捉住我朋友隻手，佢即刻醒左，但係唔見有人，佢以為係佢家姐玩野，但成屋揾過都只得佢一個响屋企。佢望吓隻手，見幾個細細既紅印... 好似比人好大力捉住留底既....

待續： http://dorstalk.blogspot.com/2011/10/ii.html

女人多自在 4

Youtube 偶然睇倒女人多自在 4 既第一集:

故事內容簡單講係姐弟戀加未婚懷孕，happy ending 的。導演麥曦茵既編﹠導一向都係 my cup of tea，好似志明與春嬌，而呢套港台短片一輯五集，youtube 睇左第一集畫面拍得好靚，好多位拍得好 sweet 同好 warm, 女男主角都做得好自然，都幾好睇架。

sweet sweet 又好笑內容節錄（大概對白）....

1）男主角接女主角去做檢查，要搭的士...
女主角話：揾錢好辛苦架，你夠錢駛拿，慳啲啦，去搭巴士咪得
男主角：係架，唔夠架，但你腳痛丫嘛

2）最後男主角說服女主角唔好落仔....
女主角：啲奶粉咁貴
男主角：我戒煙囉，啲煙咁貴成五十蚊包，買少幾包夠買奶粉啦
女主角：電視話養個 B 要四百萬，兩個咪要八百萬，我地揾成世都未揾倒啦
男主角：呢啲基金佬講黎呃你買基金啫

仲有好多，自己睇啦～

播映時間：TVB 星期日 7：05PM

港台網在線收看＋每集劇情：第一集《幸褔的旁邊》

夜半電話

其實呢個唔算鬼故，算係怪事多啲....

一向都唔會熄電話，可以話電話係二十四小時全天候開住，冇特別原因，只係習慣。有一晚，半夜三更自己一個响廳睇鬼故，啱啱十二點，電話响響，我嚇一嚇之餘九秒九去聽，驚嘈醒屋企人。拎起電話隨手就聽，喂左幾聲冇人應，打算收線，突然有把唔男唔女，好輕好似冇用氣講野既聲音傳出，講左句：我呀

對方電話背景好靜，好似响個好空洞但有少少回音既地方講電話咁，我睇番電話，發現係個冇來電顯示既電話。我回佢一句：邊個，唔好咁無聊半夜三更玩電話

對方答：我呀，你唔記得我拿，我專登番黎揾你呀

背景加上對方語氣，令我覺得毛管戙，於是我冇答佢，極速收線。收線後不停收倒幾個冇來電顯示既電話，我冇聽，到第三次再响，我熄埋個電話。電視套鬼片我都冇睇埋，就走左去瞓覺。

第二日，又係搭正半夜十二點，電話再響，又係冇來電顯示，呢次我唔敢聽，順手熄電話。之後落黎既幾日我都响十一點左右就關機.... 唔想再比個電話嚇親。

隔左一日，中午，我响街，又收倒個冇來電顯示既電話，由於唔肯定係咪長途，所以聽左，又係把唔男唔女既聲，第一句又係：我呀

呢次我都費事答佢，立即收線，但佢死唔斷氣，不停打比我。我再次熄左個電話，隔左半個鐘左右先開番，因為約左朋友要揾佢。之後我去左睇戲，响戲院睇緊套泰國鬼片之際，電話又响，又冇來電顯示，第一次我冇聽，轉頭又打黎幾次。我之前都同同行既朋友講過呢件事，我話佢知又係個冇來電顯示電話不停打黎，朋友叫我比個電話佢聽。朋友拎起電話，喂左幾聲，對方冇反應但冇收線，朋友收線前講左句：再打黎我會報警。

以為件事就咁結束？仲未... 戲院後一星期左右，又係半夜十二點左右（因為隔左幾日以為冇事，電話又繼續維持長期開機狀態）。當時都唔為意又會係呢個唔男唔女，隨手拎起電話‘喂’ 左一聲，對方第一句又係：我呀

堅覺得個電話好煩，隨口一輪咀咁話：你你你你好煩呀，堅識我有野講就 email/ whatsapp/ facebook/ msn 我，唔好成日半夜三更打黎，你唔瞓人地都要瞓。唔識我要玩電話既就過主，你係人又好係鬼又好，唔好再揾我，我幫唔倒你做任何野，你悶過頭揾人陪就去玩 line.... 咁上下啦，講左都分幾鐘左右掛，第一次，對方主動收綫了。呢次亦係最後一次（希望係）收倒呢‘位’人兄/姐既電話.....

10/20/2011

鬼故：間房有‘人’ ？？

有一次出差，入住酒店。去到房門口發現係尾房，我都冇所謂，但開門入到房先發現間房大到離譜！除左兩張單人床，一張書枱，床尾中間根本可以放張 ping pong 波枱，入到去未開電視我仲耳鳴，去睇個廁所.... 雖然話係長條形，門口去到浴缸都要十幾步.... 雖然平時出差都習慣自己一間房，但咁大一間總覺得好唔自在，但酒店聲稱冇房換，叫我第二日再去問有冇房換。但以我早出晚歸既 schedule, 番到去仲邊有精神攪轉房，唯有照住。

同行其實有兩個男同事，佢兩個間房係正常雙人房，唔會好似我間咁大到恐佈，但兩個死仔打死都唔肯同我轉房, 人善被人欺 >.<

講番間房，個人習慣夜晚會將第二日要拎出街同著既野晒舖响另一張床，感覺好似安心啲（見倒隔離床有野可以同自己講係衫啫），第二日又方便唔駛再揾餐死。

可能間房太大，第一晚瞓得好差，成日聽倒廁所滴水聲（我自己睇過好多次，唔係我間房既廁所），唯有成晚開住個電話播歌，濛瀧中瞓著左。第二朝起身，去完廁所出黎，先發覺另一張床既衣物好似比人推埋一邊。感覺似有人瞓半邊床，所以推啲衫去另一邊。嗰刻心打左個突。打電話去 reception 問佢有冇得換房，結果當然係冇啦。

第二晚，瞓到半夜，聽倒電視聲，發現房內電視打開左.... 我十分極之肯定個搖控响床頭柜上，我冇可能唔覺意開倒。都冇可能係預校開機，因為部電視係好舊式既大牛龜電視。再次，我極速開大個電話 mp3，熄電視，再瞓... 因為真係好很攰。

第三晚，冇錯，又係半夜，瞓瞓吓好凍，今次發現係個窗開左.... 請注意，當時室外氣温得幾度，咩人會開窗瞓覺呢？

之後，冇第四晚勒，因為我頂唔順，去 reception 勁嘈要轉房，講明冇房轉我轉酒店。搞左一輪佢地換左間房比我，但話明住三日又要再轉房。嗰一刻我有房就轉啦，仲邊理得佢咁多。

鬼故：半夜訪客

朋友於家中親身經歷....

瞓到半夜札醒，突然間好想去廁所。深近視的她，冇戴住眼鏡去廁所，當佢經過必經之路 “廳” 既時候，‘覺得’梳化有個影。由於佢同老豆同住，直覺係佢老豆瞓唔著座响到，正當佢想問‘老豆’做咩唔瞓坐响到之際，個影消... 失... 左...

佢個腦未識反應，個人好快就衝左入廁所，入到去腳軟坐左响地下。佢一邊說服自己係幻覺，其實由始至終都冇 ‘影’ 响廳，但個腦好明確話佢知：真係有架。

留左响廁所都唔知幾耐，驚一開門個 ‘影’ 响門口等佢，但第二朝要番工，唔通要响廁所瞓通宵... 正當佢思考中既時候，突然有人拍廁所門，開頭好輕咁拍，之後越拍越快，越拍越大力.......

朋友驚到忍唔住大嗌一聲，跟住聽倒門外傳來一句：你瞓入面瞓左呀？快啲出黎啦，我好急呀！！

原來... 係佢老豆，嗰一刻佢突然醒起自己好急但未去廁所，解決完之後開門，夾硬拉住佢老頭送佢番入房，鎖好門先比佢老豆番去廁所。佢嗰晚係眼光光望天光，邊敢瞓丫。

AppNavi: A Strange Invitation 奇怪的邀請函 (Free)

AppNavi 今個星期好豪，連續兩日出兩個 free game... 印象中係第一次喔～

故事係話，貪心沒有好結果。一心以為中左個温泉之旅既主角，去到發現被困，走出發現自己撞鬼，温泉旅館變廢屋。呢期 AppNavi 好鐘意講鬼喎～～～

遊戲有少少覆雜，唔可以用常理解釋。其實，點解唔可以用刀拆件衫出黎，一定要用劍，點解水可以溶膠水，點解埋電池响鐘，點解唔一個工具箱好好地放晒所有工具，次次都要四圍揾，如果主角好矮，組合好工具都唔夠高點算？如果主角好高唔駛工具，伸高手就開鎖咪唔駛將啲劍同木棒砌砌痴痴咁....

有時諗，鍾意玩 escape game 既人係咪都有少少被虐狂因子？打機都要打啲搞到自己神經緊張既遊戲 : P 。

Antirm Escape facebook page 有人問一個好好既問題，大家比錢買 game 應該要慢慢 enjoy 解謎過程。個個趕住走，睇提示問答案，係咪失去遊戲意思呢？我寫攻略係咪破壞左大家自己解謎既機會？（Keep Thinking....)

最後解謎乃根據枱底提示：

﹣得道之人得真理不變，最近天，所以僧人形態不變，置頂

﹣左邊紅色係夜，右邊藍色係日

﹣BB會變妖精, 最後只有人變鬼（但係，點解係男仔變女鬼呢？？）

A Strange Invitation 奇怪的邀請函

10/19/2011

碟仙銀仙筆仙手指仙

筆仙個 escape game 令我諗起讀書時代，校內曾經有一段時間極奇流行各式各樣既 ‘仙’。身邊有朋友十分沉迷，但自己一直無參與。所謂既 ‘仙’其實係靈體，傳說好多規則，例如唔可以問名，唔可以問佢點死，問完要 ‘請’ 走佢先可以放手。嗰一期學校每到 break 或者 lunch 時間，好多人就自己埋堆‘問問題’。開頭都覺幾好笑，後來學校氣氛越黎越恐佈咁....

傳聞有人問仙後上堂中突然嘔到七彩＋抽筋，話係請仙後冇送仙走。

仲有，一位 A 小姐，精通各式仙家，甚至話有個 ‘仙’ 留响佢隻左手，唔需要次次請 ‘仙‘。想問事可以問完，手指會比答案，當然只有當事人明白，大家都半信半疑。當時人話個‘仙’考試測驗都會比提示佢，所以佢唔駛再温書，由於佢成績一向都唔錯，到底係有‘仙’ 幫定靠佢自己聰明才智就不得而知。唯一肯定既係以前經常笑得好開朗既佢，與 ‘仙’ 為伴後個人變得好陰沉，就算笑都似係皮笑肉不笑咁.... 番學時經常見佢自己座响位，自言自語，好似同人有講有笑.... 但附近係冇人既...

有一次，有個代課老師出現，佢一入班房，A 小姐發癲，响班房內四圍走，叫代課老師離開，個老師唔知咩事，即時離開班房（其實好多同學都出晒班房），附近班房幾個老師可能見咁嘈都過黎睇咩事。老師們合力送左 A小姐去醫療室，再揾家長接佢番屋企，之後佢一直冇番學。隔左一段時間， A 小姐退學了，傳聞家人送佢去澳州讀書；亦有人話佢思覺失調，其實比人送左去醫病。

至於點解代課老師出現 A 小姐會咁大反應，有人話該名代課老師係虔誠基督徒，所以 A 小姐對佢有咁大反應，真正答案就冇人知勒。

而嗰一期既 ‘仙’ 潮，印象中好快就冇咩人再玩了。

AppNavi: An Odd Game 筆仙 (Free)

Apps 上方 banner 出現之遊戲，以為是收戲 game, click 入發現免費是也～

主角與同學玩筆仙，中途瞓著了，夢中疑似見鬼要幫 ‘人’ 揾仔，成功逃出發現仍然筆仙中，即走... 簡單遊戲，提示非常明顯，一次過完成～～

Happy Escape~~~

Download link: http://itunes.apple.com/hk/app/escape-game-an-odd-game/id473211285?mt=8

10/18/2011

續：有關張貼攻略事宜

繼 ‘有關張貼攻略事宜’ post: http://dorstalk.blogspot.com/2011/10/blog-post_10.html

投票結果， 45 票一面倒 JPG format 勝出！暫時會保持用呢個方法出攻略。但我發現間中唔少人成張 JPG copy 走 (在線人數顯示可見被 copy 了既紀錄）... 似乎未能杜絕問題呢～

P.S.: 多謝各位提議，而家成篇文章比人 COPY 既情況已經好好多了，JPG 比人 COPY 走都唔係多，冇所謂啦，暫時我安於現狀，好滿足了。咁多人關心，感動 ING T^T

AppNavi: Special Cleaning Silent Grudge 無聲的怨恨 (USD1.99)

Download link : Special Cleaning Silent Grudge 無聲的怨恨

遊戲十分簡單，但我鐘意個設定，今次真係有隻鬼，仲有樣睇好搞笑。遊戲最後係要玩 ‘猜猜誰是真兇’，有兩個結果：

猜中 - good ending: 主角報警，真兇落網，女鬼多謝你，升天去也
錯了- bad ending. 主角同樣報警，但疑兇不是真兇，而此後主角女鬼纒身

唔知點解總覺得個模式好似 Ellie help me out please......

真兇寫於本文末段，非攻略內，自己先估估誰是真兇啦～