元氣壽司

一向鍾意食壽司，壽司廣好得，但偏貴，連鎖壽司既話近幾年基本上都係去元氣或者千両，又因為有 VIP 咭，8 成時間都係去元氣，一個月都幫襯佢4﹣5 次。自從出左 9 蚊碟之後，已經發覺佢靜悄悄加價，漸漸連濕紙巾都要問先有，每次換 menu 除左加少少時令食材外，價格都 ‘有所調整’。以前兩個人食 HKD 280 - 300 左右，對上幾次去已經要 HKD35X 埋單，而食既野次次都差唔多架咋。

上星期收倒元氣 SMS 話要指定時間前食滿六百蚊方可續會，但係以往生日月份一次 8 折，每次都有 9 折既模式將會取消，變左 10 蚊 1 分回贈，每十分變十蚊用，積分下次先可以用，零頭數就冇得計勒.... 理智上好明白通漲，食材加等等等等，但我冇左即時 9 折，之後食咪兩個人要 HKD400 咁滯。係咁我寧願去食其他野，起碼唔駛等位等到痴左，又要比咁多錢。

至於今年續唔續會，隨緣啦。有咩理由我今日食左四百幾，你第二日先 SMS 我話要六百蚊續會，呢四百幾蚊一蚊都唔計.... 擺明叫我唔好食啦 >.<

其他壽司舖最慘間間水準都唔同，想轉間方便又穩定既都唔易。好似我鍾意 TST 千両因為唔駛點等位，食物都幾平均 OK，但啲侍應就有待進步；沙田間峰壽司既大條三文魚腩壽司，同特長海鰻，燒鵝肝 ；荃灣間北海道活壽司燒牛舌等等，最可惜間間都唔近我，要去開嗰頭先會食 （仲要撞啱唔駛等太耐位），試過同名店舖其他分店，但總係好似總係差少少咁，可能先入為主.... 寫寫吓有啲肚餓添..... 

單張來源：http://www.genkisushi.com.hk/Genki/brand/html/tc/news_detail_20111003.cfm