Movie: 金陵十三釵 The Flowers Of War

19 號已經睇左呢套金陵十三釵，但一直唔知點開始寫，因為呢套係一套相當沉重既戲，查實唔太應該响新年檔期上。


成套戲既語言主要係用南京腔既國語同英文，明符其實係一個國產外語片，唯一認識既演員係 Christian Bale, 同導演張藝謀，睇完既感覺係套戲節奏算快，唔悶，戰爭部份好寫實，人性描寫得好清晰，但最後十二釵加埋個男扮女裝既小男生代替十二個女生去赴會既下場冇交待到令人覺得套戲好似唔完整咁。


套戲應該係用中國背景但主要比美國市場既戲，南京大屠殺呢條橋已經唔新，市場上亦一直不乏戰爭戲，而呢套十三釵中戰爭場面其實唔多，但都成功令人睇到心寒同心痛。戲中既玉墨有樣有身裁，做戲唔錯，好大機會繼鞏琍同章子怡之後殺入荷里活既中國女星。

套戲做到一半，朋友話明明十四個妓女死左兩個，得番十二個，點解會係十三釵，我仲話佢數錯，到最後先發現原來朋友是對的... 輸左餐飯 >.<

Movie: Journey 2 The Mysterious Island 地心探險記 2 世外秘島

年廿九深夜去左 Mega Box IMAX 睇呢套戲，去完黄大仙，行完花市，兩點幾就到左戲院，但套戲要三點三十五分先開始....

去到 Mega Box, 所有樓層都封晒，得番戲電梯直上戲院樓層，打吓機，吹吓水，好不容易等到夠鐘入場...

套戲既內容其實好簡單，主角之一尚恩阿爺揾倒金銀島，小人國等等既小說內提及既世外秘島，發個電訊叫尚恩去南太平洋既一個島揾佢。尚恩個大隻佬繼父為左討好尚恩，決定帶佢去再証實比尚恩知一切都係假既。去到之後發現個島確實存在，但好快就會沉於海底....

故事好多位其實都幾奇，好似騎密蜂，點解可以控制隻密蜂飛邊個方向？個百四年前既潛艇點解會咁先進呢？之前要穿過個暴風先可以到既小島，點解用潛艇就可以離開？當然，睇故唔好駁故，去除幾個奇點，大隻佬繼父震胸彈結他唱歌其實都相當有笑點，加上袖珍象都好可愛～

之前去過 IMAX 院睇幾次戲，但都唔係 3D 版本，原本帶去既私伙 3D 眼鏡去到 IMAX 院都冇咩用，最終都要用番戲院派既眼鏡。IMAX 院既 3D效果好得，超大屏幕，真正既 3D 感受。

AppNavi: Prank House - 3D (USD1.99) ～ 1月22日起限時免費～

11 January 2012

AppNavi 一日出左兩個 paid apps, 呢個又係 3D， 再次決定等佢免費！

Download link: http://itunes.apple.com/hk/app/escape-game-prank-house/id490957243?mt=8

23 January 2012

兩星期唔夠就免費了， yeah~ AppNavi 農曆年送禮～

3D 畫面唔錯，場境都算多，有兩組呃人提示擾亂視線之外，其實尚算合情合理，唔錯既一個遊戲～

主角自駕遊迷路，見一間屋打算入去問路，點知一入去就被困，要自救逃出。走出後見一對年老夫婦，主角仲敢死收人禮物，番到去睇倒原來該對夫婦係著名建築師，整間屋出黎自娛娛賓～

龍年行大運

年廿八洗邋遢，今日都有執吓野，主要係換晒上次我淘寶番黎既植絨衣架，換左既一截衣櫃變得好整齊，之前掛到變形既衫而家都可以掛起後有番個形，開心～可惜，嗰一百個衣架只夠掛我三分一掛响到既衫.....

每年慣例都會用鼠尾草薰吓間屋

仲有半個鐘就係年廿九，剛剛去完旺角行花市，人山人海，迫迫吓推推吓就行完，冇買到野。本身想買盤花，但响咁多人既情況下行都唔太行倒，實在唔敢再托多盤花走。行完花市差唔多十點幾，仲有好多人剛剛先開始去，雖然人多，但好有過年氣氛 ＝）

話咁快就到龍年，先同大家拜個早年，祝大家：

心想事成   身體健康   笑口常開

“等”過馬路要小心

有個低級 IQ 題，係問呢個世界最細既島係咩，答案係“安全島”，但又因為個島太細，其實都有潛在危險，安全島都唔係真係咁安全。

話說日前經放工，見屋企附近有段馬路圍左唔少人，重有救傷車同警察响到，由於回家之路一定要經呢段路，唯有左穿右插咁行過去。去到中間安全島，見有架私家車‘停’左响安全島側邊，其中四分一個車頭同一個車肽都剷左上安全島，唔見地上有血，傷者都應該送走晒。

四周既路人個個都好似目擊事發經過咁討論，大概係架私家車高速轉彎失控上左安全島，撞倒幾個人。

另一次係食晏時，目擊有架小巴左轉時左邊兩個車肽前後都碌左上個行人路，好彩冇人受傷。小巴快速開走左，行人路上差少少被撞既人不停鬧個司機... 當然司機已經唔知去左邊。

最離譜既係上幾星期我坐車由九龍城去觀塘方向，塞左個幾鐘，原來係有架紅色小巴剷上巴士站，報紙都有賣，架車爛到變形之餘，據說幾個巴士站等車既人都被撞倒，而個巴士站其實係由行人路入口開始剷入去，老實講係冇得走。

有個朋友成日叫我巴士站唔好排响欄位入面，架車撞埋黎冇得走；行馬路唔好行路邊，費事啲發瘟車剷上路邊 ；如果馬路分兩截過唔倒就等對面開始閃先開始過第一截，唔係中間前後夾擊出事睇唔切... 一直我都話佢唔好咁怕死，而佢都係答：比車撞, 撞得死就好，撞到半身不遂，斷手斷腳就生不如死... 可能由於呢期見唔少咁既交通事故，佢呢啲說話近黎經常响我腦中出現...

AppNavi: The Single Room Murder 密室殺人事件 (Free)

New Free Game~

主角宿醉醒來，被困陌生房間中，以為自己非法入左人地屋企，設法逃走...

逃走中發現死屍，並發現屋主從事電影行業同預知會被殺，最後唔知主角點解會被果呢間屋同幫屋主破左案報仇，令真兇被警察捉倒。

倒咖啡的位置：

Iphone game: Temple Run (Free)

Download link: http://itunes.apple.com/hk/app/temple-run/id420009108?mt=8

簡單直接既遊戲，身為冒險家既玩家探險遇惡靈追殺，為左保命不停跑之餘要左閃右避，要逃過樹幹崖邊，滑動穿過石排同火把，一路傾斜裝置去收集金幣，再用金幣不停自我增值，墜崖撞樹等等死左就結束要重玩。

遊戲本身好簡單，但我幾日內不停狂玩，頗上癮既一個遊戲。

目前最好成績：
Highest Score: 954,510
Longest Run: 6,398m
Most Coins: 2,261