先要推介前幾個月追既有線睇左 “最佳愛情”，呢套真係好得。劇情講天王巨星獨孤真（車勝元）與奀星具愛貞（孔孝真），由最初鬧氣寃家變成後來之恩愛夫婦，中途殺出兩個情敵：與具愛真以前係同一女子組合而家係一線女星既姜世莉，同完美中醫情人尹必周。例牌地中間有好多誤會，好多問題，中間過程好笑之餘都好多感動位。獨孤真成日紓尊降貴去愛具愛貞勁好笑又好感動，劇中一首 ‘扑扑心跳’ 仲越聽越鍾意。
間中睇 J2睇過兩套戲，後尾上網揾從頭睇到尾，包括呢套《散工買樓夢》，又稱《打工仔買房記》（日語：フリーター、家を買う。），又譯《飛特族、買個家》。二宮和也飾演長期打散工，不務正業既武誠治為左個比鄰居‘蝦’到變嚴重抑鬱症既媽媽努力揾錢，目標想搬屋令媽媽早日康復。最好睇係二宮和也同佢老豆（竹中直人）成日頂咀，誠治個爽朗家姐亞矢子，同最後做左誠治女友既真奈美 （香里奈）... 雖然佢地外形唔多襯。
另一套 J2 播過既日劇就係題材特別既 “愛母罪”，講代課老師奈緒（松雪泰子，之前做過白鳥麗子）睇唔過眼七歲既 ‘怜南’ 被生母虐待，天寒地凍佢媽竟然放佢响垃圾袋中放左响街，毅然決定帶怜南番佢自己屋企當自己女咁照顧佢。小怜南超可愛，真係好好戲。小怜南 ＋ 奈緒，奈緒＋養母，奈緒＋親生媽咪 （田中裕子，即係少年版阿信的故事），三條親情線，令淚點向來唔高既我都睇到好感動，特別係奈緒寫左封比十幾年後既憐南既信...
較近期 ‘線上觀看‘ 既劇，戲中三個對戀愛既目標，態度，期望都唔同既女主角，同為高中話劇社校友，偶然機會下一齊同居做起室友來。香里奈，即係散工買樓夢中二宮和也既女友，戲中做燈光師，無論職業，性格，行為都好 'man'，有佢既戲都 OK，當初都係見有佢做所以睇吓... 整體嘛，全劇十集，得閒可以睇吓咁啦，老實講無咩特別，我都拖左成個月先睇完... （鍾意睇既通常幾日就可以 KO 完）
最後一套近期睇既日戲，就係 ’家政婦三田‘ 。呢套係朋友大力推介，話日本近年難得低成本高收視既戲集，由於担正既菜菜子都係我鍾意睇既日劇女星，所以... 又去煲了。菜菜子戲中飾演’三田 燈‘，戲中勁 cool，唔賣靚樣, 煮飯，家務，帶細路做功課無一不精。劇情好簡單，阿須田家女主人因老公有外遇想同佢離婚，走去自殺，淨低老公阿須田同四個仔女，阿須田於是經介紹所請左三田幫手照顧屋企。三田全劇 99.9% 目無表情，行動尤如機器人，全劇基本上用肢體同眼神交戲。你叫佢殺人放火，只要吩咐佢都會幫你做，只因為佢自己覺得生無可戀... 口頭禪：這是你自己該決定的事情，睇到最後一集，呢句野已經入左腦。
雖然三田唔笑，但中間唔少對白都相當引人發笑。好似大女懷疑老豆有外遇，叫三田跟踪老豆，三田答佢：唔得，因為我聽日放假 ； 四兄妹既亞姨麗子，越幫越忙既性格都幾搞笑既，只係有時想打鑊佢；細女希衣唔想一家四分五裂，出錢請三田去綁架自己，而三田打電話去通知阿須田自己綁架佢細女時其實講左係希衣比錢請佢綁架自己.... 家政婦介紹所所長都好吸引，佢每次出場我都睇得好開心。
順帶一提：三田戲中既有咩有咩百寶醫生袋，竟然索價 65,000 日圓.... 但應該都已經賣晒！！
No comments:
Post a Comment