海洋公園 ﹣ 生日免費之旅

母親大人為左享用海洋公園一年一度既生日免費入場優惠，召喚左全家陪佢去 ‘行’，冇錯，只係行，因為同行六人除左我冇人玩機動遊戲或者坐吊車.....

生日優惠除左生日既本人免費之外，同行其中一人都有半價 (優惠至2012年8月31日)，仲有幾張 coupon 園內食野有一次性八折，購物滿 200 平少少咁。

入到樂園，一望地圖覺得比記憶中大左好多，中間個大水池係咪好多年前已經有呢？真係唔記得。但呢個熱氣球應該我細個時未有：

至於大門前呢個水池，夜晚多左個燈光滙演，係咪 ‘參照’ 迪士尼呢？

海洋公園當然唔少得去睇熊貓啦：

新出機動遊戲，排長龍，成村人得我一個想玩，冇理由叫佢地咁多個等我一個... 所以冇玩 >.< 行過聽見啲人嗌到癲左，好想玩呀～～～～

比起充滿好多奇怪史前大魚同生物既海洋館，我比較鐘意呢個七彩繽紛既水母館～

可能剛過聖誕，園內仲有唔少聖誕裝飾，每到正點正門同 x'mas photo spot 都有人造飄雪添... 但只限幾分鐘，只影要快快快。

重臨多年冇去既海洋公園，感覺比記憶中既大左，多左設施。而家多左個火車仔，唔駛排餐死搭吊車上山之餘仲快好多。

最大分別，應該係我細個時去過幾次，都係人煙疏落，而家就成個園都係人，當然強國同胞佔大多數 ； 最重要係我上次去，daddy 都有同行... 但唔經唔覺佢已經過身三年幾... 

其實一家人輕輕鬆鬆玩一日，已經好難得，當然正價 HKD280 一個人入場，都唔可成日去啦。