Being Alone...

鍾意一個人去行街，尤其真係想買野既時侯特別鍾意自己去 shopping，有時放工或者放假响屋企突然想去行街，都會自己死出去行幾個鐘，就算咩都買唔倒都好開心，好 relax。

有時自己遊盪中朋友打黎，知我自己一個話要黎陪我，我都會推左，享受自己一個人既時間...

一個人去睇戲，唔駛等其他人等閒或者對同一套戲有興趣先睇 ；一個人去旅行，唔駛同其他人夾時間，夾 budget， 夾興趣... 當然好多時會比二人同行價貴；一個人留响屋企，可以靜靜哋睇書，睇歌，睇收音機，打機，鍾意瞓幾個鐘，瞓醒覺再揾食，咁樣過一日其實好 relax ; 一個人去行街, 唔駛人等我我等人，睇啱鐘意留幾耐試幾耐都得；一個人食飯, 好多時都唔駛等位，就算等都係等一陣，特別係日日都咁旺場既壽司舖。

當然自己都鍾意同朋友一齊吹水食飯行街，但有時太多呢啲 gathering 同 function 既時侯，會特別掛住一個人獨處既時間。

曾經有朋友話覺得我好怪，又有朋友話點解唔約佢，我只能答一句 ﹣ 我係自閉宅女囉～

點解突然寫篇咁既野？因為上星期有一日放工自己走左去行街，中途走左去食壽司做晚餐，隔離座左對年青拖友，女既用一把自以為好細聲既卡通聲（但我都聽倒既音量）同佢男友講：個女仔（即係我）自己一個人食野好慘呀，好彩我有你陪咋.... 聽佢講野真係聽到毛管戙，堅想回佢一句：同你食我寧願自己一個人食...