套戲基本上都係講 Johnny English 自以為天下無敵，亂打亂撞成功化解國家危機。劇情响呢套戲黎講唔緊要，重點係套戲相當多笑位，睇得輕鬆又開心。有啲同場觀眾好搞笑，無端端都笑餐死，到左某啲真係搞笑既位，聽倒有啲人笑到拍櫈又大聲，一早笑定先，自己响屋企睇碟既話就唔會有呢啲氣氛。
有幾場好好笑，包括 English 响香港追殺手要拎番條鎖匙，個殺手身手敏捷再閃右避，English 他他條條追倒佢之餘又打低埋佢 （呢個 concept 幾好，唔夠人打就用腦）； 另外當然係同首相開會，一張不停升升降降既櫈，簡簡單單又好好笑；揸住直升機唔識去醫院，低飛跟住車路路牌行，最後跟埋 ＋ 停上救傷車頂就去到醫院 ；重有就係吸塵機殺手婆婆，每次都好型咁出場搞掂目標。
呢套戲完左之後，字幕出晒，再次有一段片 ﹣ 戇 J 音樂煮飯，記住睇埋先走～
P.S.: 同場加映：我左邊對男女竟然拎左個榴連入戲院，邊睇邊食！！！
