丁太 ﹣ 楊千嬅

讀書時期剛好楊千嬅出道既時代，感覺同佢一齊長大。都幾鐘意聽佢既狼來了，姐妹， 愛人， 等等等等既歌，解釋唔倒原因，只係 ‘鍾意聽’，或者作曲作詞人好似林夕實在太錫佢，好多歌都好似度身訂做比佢唱。楊小姐出道可以話頭十年唱現場水準都唔太好，亦如佢自己當年所講佢冇幾千萬做宣傳，梗加唔係 sell 樣， 所以以前覺得既星途應該都係一直咁上下唔上唔落。佢早期拍既電影例如煎釀三寶，乾柴烈火，花好月圓等等，套套都係狂笑，梗加覺得佢戲裏戲外都係做自己，係好笑，但無咩演技可言。

近幾年開始改觀...由志明與春嬌開始.....

當日入場睇戲全因星期二平飛，同期又冇咩戲好睇。志明與春嬌中，我見倒既係一個 ‘春嬌’，唔再係楊千嬅做楊千嬅。之後既抱抱俏佳人，都感覺倒佢係投入左個角色，畢竟對住個成日 CHOK 樣既林先佢都忍倒笑，真係好大進步。

自從佢嫁左做丁太，佢越來越靚，可能識打扮左，又或者真係幸福左。一次路經旺角既唱片舖正播緊佢同丁子高响演唱會尾段合唱 ‘世界將我包圍，誓死都一齊’，丁生雖然唱得有啲誇張，但嗰刻有少少感動... 所以真金白銀買左佢演唱會 VCD番屋企睇。演唱會中千嬅唱得好穩定，走來走去唱都無咩走音。

YOUTUBE 無意睇倒千嬅客串黄韻玲音樂會唱 ‘心動’ ，一個大胆既選擇，因為林䁱培版本實在太 attractive，但都唱出佢既味道：

微博有關注佢，先發現藝人既生活極知忙碌，為演唱會日日操練，冇餐好食，仲成日東奔西跑做宣傳，佩服！但丁生同佢間中既 ‘微博’ 傳情，好 sweet, 好 warm。

原來，努力真係有回報。原來，付出係會有收獲。原來，只要信，幸福終有一日會黎。呢啲好似消失左响香港好耐既 ‘傳說’，响千嬅身上見倒。

衷心祝福佢繼續幸福，愉快。加油！