塔門露營遊

補祝一句：中秋節快樂～

 9 月 30 日，晴，經西貢碼頭再坐 94 號巴士去到黄石碼頭，搭街渡出發往塔門。

出發前見到貝澳營區新聞，一度担心塔門唔知會唔會都好多人，好彩雖然人多，但都實揾倒位札營：



下午三點多到山頂，由於近亭既位置可以利用亭既枱櫈煮食同休息，一早坐無虛席，又怕人太多會嘈，結果向海邊進發。趣事一則，由於與朋友皆為初次露營，營本身唔難搭，但搭好個營先發覺營底好斜，所以瞓得好冇安全感....

 安頓好個營，落番碼頭去吓洗手間，遇見日落～

番到上營，開始煮飯仔，深深感受到海邊勁當風... 另一個近海邊札營學倒既野：瞓覺時好似瞓响十級風下咁，成個營吹到震晒，好誇張... 下次唔好揾咁近海邊... 同埋... 好多人鍾意半夜向住個海談心，第二朝一日又好多人鍾意對住個海傾計同做運動... 超級冇覺好瞓！！！

日落後個個開始煮飯時四圍好光，山頂影落去其實好靚～

露營後記：
1. 出門口一刻感覺攞苦黎辛，由於真係要帶好多野。雖然兩個人去已經平均左少少要野既重量，但第一次去玩，又唔知有冇下次，部份非必要物資都冇買，取而代之係响屋企攞啲可以頂吓既野，好似 YOGA MAT 做營墊咁。由於個墊好濶，打横放响背囊頂一邊下覺得不停撞倒人/野，好‘論盡’，搭車更唔駛講，自己都覺得自己阻住人... 所以下次再去既話應該買番張充氣床墊，一來冇咁麻煩，二來瞓得舒服啲。
2. 都係瞓既問題，張 YOGA MAT 太簿，瞓到周身骨痛... 可能年紀大唔捱得 ：P
3. 去之前不停諗有咩要帶，驚死拎漏野。結果係有部份物資係拎左去冇用到，得個拎字...
4. 煮食篇：買雞翼去食，但唔記得帶油，好彩好心‘鄰居’出油相助
5. 營具篇：去之前一日求其買左個營，去到先發現應該買個 3﹣4人營，因為2 人營放埋袋入去好迫... 題外話：山上發現好多人帶個好大既營去，真心佩服拎營上山既人～ 2 人營都唔輕，好多爸爸媽媽仲可以帶細路去之餘有個大營，有枱有櫈有爐有煲，唔知以為佢地長期住响山～
6. 舖好個營後朋友落山去廁所 （要行十幾分鐘一程，來回都差唔多要三十分鐘），自己於營中看守順道瞓個午覺，突然頭頂傳來牛叫，嚇到我 9 秒 9 彈出個營，原來佢只係路過.... 但响營邊十數部發現隻傳聞中既野豬....... 搞到我唔敢番入個營，驚佢衝埋黎我走唔切... 好彩全程呢啲動物都冇黎探過我...

講左咁多好似唔多好既野，其實都唔少好既部份。好似响山上瞓响海邊，四圍好多人放風箏，吹水，玩啤牌或者其他集體遊戲，真係好感受到咩叫RELAX

夜晚再次落山去廁所，路過天后廟，發現塔門居門集體做節，仲有飲啤酒比賽，佢地玩到好 HIGH，我地睇到好開心。最勁既係，佢地既配樂係 “江南 STYLE”～ 好 IN 呀

夜晚漆黑一片，崖上聽住巨浪沖岸，加上超級大風，好感受到大自然威力，曾經有一刻覺得好驚。响呢個過程當中又諗番屋企真係好舒服，所有野都唔係必然，要知福，惜福

煮飯仔係露營既重點活動，而露營鄰居有大量專業露營之仕，佢地帶好多工具之餘，簡直係煮九大笪。唔少人用手推車推一堆工具上山，包括自帶既 BBQ 爐，自製了一個全海鮮 BBQ 宴，好香架～ 另一家，大邊爐是也；仲有一堆後生仔帶晒爐具去 BBQ，搞到我已經諗定下次可以帶咩去食去玩～

露營其實真係好多學問，由 PLANNING 到去既過程其實都幾好玩，我估响天氣涼既時間，可以去玩多幾次 ^.^