好多日冇寫 blog 了，繼續：
第二日行程，一早影左張全個行程最滿意既一張民宿境相，如相中所見，所謂民宿其實只係民營旅舍，由於响山上，酒店水準當然與一般飯店／酒店有差別。首先係冇冷氣的，但由於山上天氣相當涼，所以都唔覺得熱﹣
行完相，食個早餐
食完早餐，出發行山去。今日行程冇租車，全程用腳，見倒相中紅色 ’現在位置‘ 嗎？就响呢到一直行去地圖右上角既 ’青青草原‘～
雖則天氣都涼，行左個幾鐘其實都出晒汗，但沿途望吓風景，一班人講吓行吓睇吓景，路程都相當舒服：
中途路過水果舖，全部係時令水果，7 月盛產水蜜桃，我地買左一盒 TWN800 既 8 個裝 （原價 TWN180 一個），真係好清甜又多水，好得～
好多間生果舖我地幫襯呢間，全因呢個特別店員
經過生果店後，經過幾百級樓梯先可以去到目的地。據說呢條路秋天係一片紅葉，好靚的
進入青青草原觀山木區附近，頗多木馬裝飾同風車
園內不少指示均以 ‘羊’ 為主題：
清景 7 月7 日開始一年一度既風車節 （至 9 月2 日），見滿山風車
要去今次主要目的地 ‘綿羊堡’，先要出左觀山牧區，由於門票包左綿羊堡，要免費再入番綿羊堡必須於出閘前於手上蓋章
離開觀山牧區後經後一段熟食及水果店就進入綿羊堡，再行過綿羊 SHOW 場地 （可以比錢騎馬，TWN100 行幾分鐘，其實都幾呃錢），開始見倒好多羊：
行行重行行，終於到左 ‘清境綿羊城堡’， 城堡內其實係紀念品舖：
城堡前白欄內就係 BB 羊，到達時剛好開賣 TWN20 一支既奶可以餵羊，但十數支，售完即止
離開了綿羊堡，走向一大片草地，草地上都係成年羊：
行了一段路，回望綿羊堡，好似响外國喔：
羊區內有糧食售賣機，TWN10 一份，一見有人行過羊咩就會走埋黎：
眺望落行上黎一段既山路，so amazing, 好耐冇行咁多路.... 中間就係周末綿羊秀既地點，即係剃羊毛，查實以前睇過，一路睇一路都覺得隻羊其實好辛苦同好慘，比人剃完毛既羊仲好似想 ‘厘’ 埋唔比人見咁... 有機會都唔打算再睇...
行完清清草原，沿路落山覓食醫肚，食完後團友們都話好攰，決定番民宿休息。於是去 7 仔買左啲糧草，再番民宿食落山時買既水蜜桃，吹吓水咁又過幾個鐘。
第一晚 check in 時見有人食晚餐，望落好得，所以我地今晚都選擇留响酒店食。住客每住 TWN600，外客 TWN660，包一個主菜及任食沙律吧；只要沙律吧的話就只需 TWN300。我地 8 個人叫了 6 個餐 加 2 個淨要沙律吧，好夠食，因為個沙律吧有勁好味白汁意粉，飯，紫薑手斯雞，南瓜湯等，淨係食沙律吧已經好飽， 呢個係其中三個主菜：
其中一個豬手好多，大家對呢個晚餐都評價極高。食完飯，又吹一大輪水，回房執行李準備第二朝番台中市中心～
No comments:
Post a Comment