日式放題

個人食量唔算好大，食一至兩轉已經開始飽，所以覺得飽。但有時同朋友食，唔駛就住就住，其中只要有幾個食得之人，睇佢人家狂點狂食其實都好開心～

食過隊長，大瀛喜同極尚大喜屋日式放題，幾間差別唔太，差幾都係二百多一位，由入座起計 2 小時。呢幾間既食物種類都好多，每次放放題都有一個問題係唔知到左既食物份量幾多，等幾耐？以尋日食既大瀛喜為例，上菜速度係.... 一窩峰，2 個人，張枱唔大，但食物不停到；同為炸物都分幾碟，結果自己要七手八腳不停將幾碟食物倒埋一碟... 食得相當 '忙'。

食物質素嘛... 目前為止未食倒一間覺得好好味既放題，但只可以話，一般都坐得太迫，好有壓迫感（好怕明明唔識隔離枱，偏偏好似坐埋一齊食咁），放題確實唔係我杯茶～

大瀛喜無聊花絮：
1) 落單紙用一本簿夾晒，插埋一枝筆。原來，本薄後有磁石，可以成本痴响個枱腳... 好 Hong Kong Style 又貼心喔～
2) 尋晚隔離兩枱 6個人左右既食客共處於一個小區域內，由於餐廳飲品，我地住後面就已經係一個雪櫃，大家不停去拎飲品。到一半，其中一枱 6 人家庭組唔知响邊揾啲雪條/ 雪榚番黎，另一枱 6 人師奶兵團見倒，四出搜尋，好似揾倒拎左一堆番黎，成枱都好高興～  另外，師奶兵團基本上見我地同隔離枱食咩，都話：咩黎架佢地嗰啲，不如叫黎試吓... 差在冇出口問我地嗰啲係咩...
3）估佢唔倒地，成晚最好食既係黄金蝦.... 香口又脆，但完全唔係日本野

Movie: Inside Out 玩轉腦朋友

每個人都有五個 '腦朋友'負責日常生活中既情緒，包括樂、愁驚、燥、憎，其中樂主導主角 Riley 既情緒，大概因為小朋友好似都應該 '快樂'。Riley 因為老豆工作需要突然搬家去，同時因為一次意外，阿樂同阿愁離開總部，迷失於 Riley 各記憶小島中, Riley 情緒得番驚燥同憎，由快樂女孩變成反叛女孩。最後當然樂同愁成功番到總部，Riley 恢愎正常，腦朋友們亦終於發現阿愁既存在價值。

電影於香港上影後一致好評，大概都係話套戲有深度，帶黎好多反思，睇到喊.... 平時好少去戲院睇動畫的，亦由於今年暑假檔期新戲唔多，結果亦罕有地入場睇左。同樣選擇 2D 中文配音版。

個人感覺：同意呢套係比大人睇既動畫，因為當中好多涉及 '回憶'，小朋友好難明。冇悶場，但未至於睇到喊。不得一讚配音出色，包括分別配林二汶同王菀之，以及配老豆阿媽既張國強同譚玉瑛～

Inside Out extra：
1) 套戲一開始有兩個火山對唱，男火山 Uku 孤獨生活了百萬年，隨住時間過去，將慢慢完全沈入海底.... 海底深處有座女火山 Lele, 聽 Uku 唱左好多年歌，响Uku 沈入海既之前引發火山爆發，升上水面... 但，方向剛好背向 Uku，相知而不相見。Uku 心死，沈入海中，Lele 唱出 Uku 一直唱既歌，刺激 Uku 爆發，再次升上水面... 今次，剛好與 Lele 並肩而存。Uku + lele, 咪就係夏威夷四弦結他... 而英文版兩位歌手都來自夏威夷喔 (From Wikipedia)

2）Riley's First Date，最後冰場對 Riley 一見鍾情既男仔去揾Riley, 今次主打老豆同阿媽既腦朋友反應～

好心一定做好事？

近幾日經常發夢，大多瞓醒即忘～ 唯獨有一個夢記憶尤新，與其話係夢，其實係一個幾年前發生既事...

有日大熱天時响街，行上一條上坡暗斜，見前面有個婆婆推住架小小的手推車行得好慢... 好慢，一心諗住架車仔好重，於是好快行去婆婆到，同佢講：我幫你拎上去丫.... 跟手一個箭步將手推車推到斜坡最上頭（約 100 米路程）。轉頭發現婆婆企响原地，跟手有個太太走黎鬧我：你做咩搶左阿婆架車仔呀，冇陰公，佢冇左架車仔行唔倒架！

該位太太將手推車送回婆婆手上，之後見婆婆推一步手推車先行一步，原來部手推車同時係婆婆既拐杖！當時我呆了，覺得十級 '𤓓'，自以為是，白痴，九秒九走了。

其實而家諗番呢件事無咩大不了，但唔知點解間中就會諗起。大概我當時漏了同婆婆親口講聲：對唔住？

需要計算的病假

是日如平常一樣鬧鐘準時七點响起，但其實尋晚不停瞓吓醒吓，五點幾差唔多全醒了.... 全因喉嚨痛到火燒，鼻塞到達要用口呼吸既地步。上網搜尋到睇開既家庭醫生要十點先番工，個腦自動盤算：今日有冇會開，有冇 DEADLINE 等等等等，發現是日 ‘吉日’，萬事皆無，於是安再較鬧鐘到 8:45，打番公司請病假，專心養病。

突然又會諗：今年請左幾多病假呢？公司一年得7日有薪病假.... 過左被人扣人工咪唔抵？但我又真係病到七彩，真係請突病假比人扣人工都冇計....

回想當年讀書時，少少病就請病假，幾時有諗過可唔可以放丫....

2014 年12 月高雄墾丁跨年遊 （半自駕）

機票篇：

話說，Christmas ＋ 新年請 4 日假可以放足11 日，EGL package 又好抵，於是 12 月頭決定月底再飛一轉去過年。

酒店篇：

買 package 後發現1月1號同2 號異常爆滿，原來台灣1﹣4/1 四連休日。。。訂機票時比左 3 間佢排， 3 間都 full, 最後 EGL 反建議了一間終於有房，但只係高雄頭尾各一晚，中間 3 晚住墾丁尚未有著落...

悠遊墾丁網連 agoda，問左幾十間民宿都爆晒，灰爆之際其中一間話可以問 AN 民宿，呢間尚有空房，但第三晚要換房。响呢個情況下有房就住啦，價錢平均七百幾蚊一晚都 OK ，先付一平訂金去民宿香港滙豐賬號做按金。初時對民宿已經冇期望，特別係住過首爾間房之後。出奇地間房同 website 九成似，貨好對辦喎，勁開心～ 

交通篇：
高雄交通以地鐵為主，極之方便。頭一日去台南，搭火車 “自強號”，半個鐘就到。火車同鐵都可以用一咭通，每程車都有折，既方便又抵用 ～

高雄去墾丁，請民宿安排併車，其實係的士。四百台幣一位，與其他人 SHARE 車，2 個鐘先到。

墾丁交通嘛，不管閣下住响墾丁大街或者南灣，要四圍遊墾丁一係包車（多人既話），一係租車。租車又分三種：私家車，機車同電動車。

電動車唔需要車牌，用到冇電據說可以打比租車舖做流動充電。據朋友仔話，有朋友租過，一日充幾次電，好煩同要等。

今次租了機車，其實即係電單車，由於我同朋友都只有私家車牌而冇電單車牌，車舖只肯租最細碼力既車比我地，叫做好過冇啦。但 12 月既墾丁極之大風，開車時手都凍都冰左，日頭又晒到燶左.....  朋友仔吹到病左... 但堅平，台幣 350 可以租一日！租左 3 日車都只係入左 300 台幣。

私家車：比我再揀一次我一次會揀租私家車，問過係 台幣 2000 一日，但唔駛日晒風吹咁囉！

高雄行程篇：只留左 3 日唔夠，去既地方唔多喔
﹣夕張出遊所：位於台南，為左個出生彩鹽去了一敞。一卡通用 六十幾蚊可以搭程九十幾蚊既自強號去台南，30 分鐘不停站就到。但買飛既會劃左位，所以架車到開車一刻先知坐緊個位會唔會有人買左飛會坐囉。建議等人坐晒，開車時先揾位坐就唔駛煩！
﹣六合夜市：一條直街，出名美食比較多，最愛木瓜奶，其他嘛。。。。一試無妨但唔會專登去食咁啦
﹣瑞豐夜市：周一休息，似大排檔 FEEL， 焗山蠔正，非力牛扒意四十幾蚊有一份，又抵又好味，好多射槍等遊戲，人流比六合多好多喔！
﹣駁二藝術特區：有火車頭，有大個大黄峰像，人爆多，好多藝術品，好多風箏，好多人吹皂泡波，好大個草地，好舒服，好 LIKE～
﹣台糖廠：好大地方，真係有既停業左既糖廠可以參觀，建議租單車四圍走 （100 蚊台幣），都 LIKE 既一個地方～

墾丁行程篇：留足3 日多～
﹣墾丁大街：去足 3 次，日頭大部份店舖休息，黄昏先似香港廟街，全街都係小食，一定食得飽！但住墾丁大街既話感覺似住長洲咁，民宿質素感覺比較差，到一定嘈到爆！
﹣南灣：如果我去多次墾丁相信會揀住南灣，方便，對出就係沙灘
﹣風吹沙，最南點，鵝蠻鼻等等等等景點：有車既去到影吓相都 OK 既，個個景點3 分鐘走得！
﹣出火：少少呃錢，兩堆火由地下氣體供氣不停着火咁....
﹣恒春市：必去食小杜包子，好味呀！
﹣車城：有個大廟，廟前有一排食舖，好多好多蛋賣，皮蛋鹹蛋都好好味呀！
﹣後壁湖：响今次住既民宿附近，三分鐘車程， 去左。。。。好多次，魚生片好抵食，其他一般啦

總括黎講：一世人去一次就好了....

2014 HEA 住秋遊首爾 （5 日4 夜）

機票篇：
2014 年10 月，朋友仔响國泰 Funfares 見二千幾蚊來回平機票，剛好請倒假，所以於 11 月中飛左轉首爾。

酒店篇：
本來打算延續平機票，想揾個平酒店令成個首爾 TRIP 變得經濟實惠。最後，agoda 揾倒間五百幾蚊响明洞既 '酒店'，位置滿分，但間房細到呢..... black list! 但住明洞的確好方便，就算住其他地方都 prefer 近地鐵站。

飲食篇：
都係食炸雞，人參鷄，烤肉等基本韓式食物，隨便入一間基本上都 OK 的，最最最回味係個醬油蟹，必試！

天氣篇：
十一月中既首爾.... 凍到日日著羽絨，有冇搞錯！

交通篇：
首爾行主要靠地鐵，而首爾地鐵.... 十分覆雜。建議下載 ‘Subway Korea' App, 教你幾時邊到轉車要幾耐。記得買張類似八達通咭，唔係下下買飛都好煩，離開時可以响機場便利店退款喔。

行程篇：
機票 confirm 了，要計劃行程。行程其實唔難，除左可以買旅遊書，揾啲啱食啱玩地方照去之外，尚可上網 search 人家既行程做參考。特別係食，網友介紹通常都比旅遊書推介好好多。

當初有打算學人去睇紅葉，但十月底見唔少人剛番黎話已經所 ‘紅’無幾，本來都打定輸數，好彩响唔少地方都偶遇些少紅葉，開心～

今次話明 hea 遊，5 日內景點唔多，只去了以下景點，順手以 10 分最鍾意做滿分做評分：

﹣吉卜力創作室 3D 立體展（8 分）：宮崎峻動畫以一比一實景比例，約十個場景，當中最愛無面人場景，個無面人仲高過我呀～ 最最最重要，人少，任影任行，比著响香港，一早迫爆人！









﹣首爾塔（5 分）：要搭 cable car 上山，幾分鐘就到，上到山頂行幾分鐘就到首爾塔。四

圍皆鎖，唔知掛滿欄杆既架有冇倒塌危機呢？當中最鍾意 'V 字斷櫈'，影相一流。






﹣東大門（3分）：或者我唔識窿路，睇衫又睇唔啱，人又多，似旺中，得個行字，可免則免
﹣鷺梁津水產市場（5分）：朋友仔唔想食，去到行左一陣，無緣一試，但試過朋友皆大讚喔
﹣普羅旺斯（3分）：搭完火車搭巴士，落車又行十幾分鐘先到，地方唔大，冇咩野睇，真係冇地方去先去啦
﹣明洞汗蒸幕（7分）：韓式 sauna，羊角巾夠得意，只識講 5 MINS 既姨姨，蒸 5 MINS， 休息 5 MINS，濕水池 5 MINS，好好笑。有益力多飲，有雞蛋食。全裸比韓國婆婆當死屍咁猝老泥，人生中第一次發現自己老泥如此多。完成汗蒸幕後，倒身好滑喔～
﹣南怡島（8分）：一個大島，好多樹境，尚餘少少紅葉，影相位多，唯遊客仲多！
﹣小王子村（6分）：去到南怡島，順道去埋小王子村是常識吧。地方細細，個人覺得能影相位比普羅旺斯多好多
﹣梨大壁畫村（7 分）：特色壁畫，影相一流.... 如果少咁啲人就好勒
﹣北村韓屋村（7分）：尚有人住既實景韓屋，唔少兼做民宿，斜路多，人超多，影相有難度
﹣南山谷韓屋村（7分）：似個博物館既韓屋搭景，影相黎講相當易取景，特別下午近黄昏去，陽光好靚喔
﹣弘大區（7 分）：勁多小食同小攤檔，慢慢行，開心又舒服
﹣天空花園（8分）：花園位於山頂，山下景色一流

天空花園山下

天空花園其實係個芒草園（即係二東山上既芒草），陣陣涼風極之舒服～

天空花園

難忘事：
1. 周街都係自拍神器，平均 5個人就有一部咁，周街都有得賣，多到呢....
2. 好多媽媽級既自由行團
3. 感覺廣東話人比國語人多好多～

總括黎講幾 LIKE 首爾呢個地方，可以去多次喔～ 濟州等地方都想去吓～

Hello 2015~

好耐好耐冇更新，仲有人睇緊呢個 BLOG 嗎？ 剛踏入 2015 年，感覺嘛.... 2014 過得好快，好快。

基本上 2014 年，托懶身體 OK，工作 OK，家人 OK，平平淡淡，尚算開心。

今年本來冇打算出遊，突擊出遊 3 次 ，但寫完沖繩後一直未落手寫第二個首爾遊。剛由高雄番黎，尚未決定唔會寫遊記，或者遲啲得閒寫吓啦～


新一年新開始，希望來年一切繼續安穩順利～

Black Sunday!

1. 電話公司篇

一大早，電話响起，陌生的來電平時唔會接，但神推鬼擁接了。電話另一邊係現在使用既電話服務公司，對方表明唔係推銷，今次來電因為我既電話合約好快到期....

Sales: S ; D = 我

S：小姐既合約 9 月到期，想通知番你新既計劃
D：哦，你講丫
S：新計劃係 ＄190一個月，包 XXXX 數據同 XXX 分鐘通話
D：其實我份約係幾時到期，同埋如果 9 月出新 iphone 我想續約出機而家續左係咪要 extend 個約？
S：你份約9月底到期，如果到時你响我地公司出機咁呢份續約會取消
D：咁我諗吓先，一係你留底電話我有需要打比你
S：其實你要諗咩？你用左我地公司好多年勒喎，呢個 PLAN 好抵架喎，舊客先有... （下刪幾百字 ），咁我下星期再打比你跟進丫，星期幾你方便？

佢未講完我已收佢線。

唔知點解聽見佢話 ‘其實你要諗咩’ 既時候已經無名火起，我要諗咩關你咩事，用開就要繼續用你個台？用夠十年終身免年費？9 月都到期，要出電話留响你公司到時做埋續約就可以，點解而家未到期要比你困住？一定要簽你公司咩？ 九唔搭八。由於剛剛瞓醒，唔記得問佢貴姓同職員編號，冇打去電話公司投訴。

2. 餐廳篇

隨即諗起本來聽晚食飯轉左後晚，要打去改 BOOKING。電話長响了 2 次，等到冇耐性，搞其他野再打去，响左好耐差唔多想收線時有人聽了，隨即講明來意...

R: 餐廳職員 ； D＝我

D：聽晚 6：30 booking 改後晚，姓 X， 3 位。
R：小姐等等，我查 booking... 姓X， 電話係咪 9XXX XXXX？
D：係，都係 6：30 三位，但改星期二。
R：好的，改時間，係咪改做後日星期二？要 8 點還枱喎，OK？
D：係，3 位 6：30。8點 OK。
R：小姐幾多位？
D：3位.....
R：幾點？
D：6：30
R：X小姐 4 位星期二 7：30 OK 架勒，要 9 點還枱喎，OK？
D：唔係4 位，係3 位......，同埋係6：30.......，8 點還枱 OK.,..

天呀，我係咪打錯去精神病院呀！ 講講吓我都差啲搞錯時間同人數... 只記得8點要還枱囉。

3. Shopping 篇

去某小店想買碎粉，店員好好咁問我揾咩，我講左要咩後見佢去左攞，由於當時有位大客仔買好多野，睇黎冇咁快搞掂，於是睇吓舖頭其他貨。見差唔多，再去排隊比錢，等佢 check 貨比錢，差唔多到我時另一店員問我要咩，講完後該店員表示冇貨，要留電話，番貨再通知。可能因為今日全日都病病哋加上處於忟忟哋狀態同天口熱（whatever)，本來行到出門口諗住算數，越諗越慶，突然失控地行番轉頭問職員攞投訴電話。

職員不停話叫我留電話，番貨第一時間通知我，但我再次表明唔係個碎粉有冇貨既問題，呢個世界大把碎粉，就算佢唔再出我都可以買其他牌子，係個店員知道我要個粉，冇貨，見我响到排隊做咩都唔話我知？浪費時間。身為投訴專員（經常性去投訴），機械性問左店員名同職員編號，另一店員不停表示：唔好意思，呢位係新同事。唔知點解佢越講我越慶，佢新唔新同佢點處事有關係嗎？冇貨唔駛話人知？你明知佢新唔睇住佢？ 最後另一店員比左張咭片同個 email address 我。

反正一行出店我就用電話 email 左去投訴，氣消了，但坦白說換轉係平時我應該係 “哦，咁尤得佢啦” 就走左去，只能話呢位店員黑仔，遇正我谷左一日既怨氣...

好耐冇試過咁燥底，自己都唔知點解... 睇黎要認真揾方法提升日漸下降既 EQ...

Movie: 銀河守護者 Guardians of the Galaxy

明明係一班鼠輩為錢為報仇走埋一堆，無端端變左銀河守護者。劇情都 OK 流暢同快，鍾意睇浣熊，特別喜愛只識講 ‘I am Groot’ 既樹人，殺完一大堆敵人後既天真笑容，變出光點，到最後為保護其他人後變成一枝柴，再响花盆重新既 Groot~ 

微盆景

早於大半年前偶然於生果日報副刊見倒有間銅鑼灣門市舖賣龍貓盆景已經大愛，適逢母親大人生日，買了一小盆番去送禮。

前排去 PMQ，裏面有一家賣瓶中森林，索價都幾高，睇中一盆要 $680，心諗：好靚呀，好想買，但一棵植物啫，唔係好甘心比咁多錢買喎... 重點係小女子身為植物殺手，有殺冇賠，真係唔知可以 ‘維持原貎’ 幾耐。

相對於之前銅鑼灣買既一盆，其實銅鑼灣嗰間比較靚同平，於是幾日後又忍唔住去睇，巧遇人家做八折，開開心心又拎一盤走。隨盆附送既一粒卡通公仔今次揀了史力奇～

買左番屋企，發現佢好寂寞喎，於時又去到萬能既淘寶打算幫佢揾個伴。嘩， 今次不得了，淘寶多左好多微盆景同卡通公仔，好多都好靚，但要自己砌。好想買，但問心唔知搞唔搞得掂，於是買了一棵盆景同一大堆姆明同龍貓卡通公仔番黎試玩。好快寄到，番淘寶 LINK 揾製作示範，十五分鐘內完成，原來好易! 整完呃得吓人喎。

轉頭 post 左上 facebook 荼毒一眾好友， yeah！

盆景公仔多數為龍貓，及一啲不知名卡通，真係要慢慢揀心頭好。温馨提示：响淘寶揾 '龍貓微盆景'有大量選擇，建議唔好買封頂原球款，因為盆景內都係真正既植物，會生長，封頂款會影响生長。

另外為節省運費，最好於同一間舖內選擇唔同物品。一套盆景內其實已包植物，已選款式之卡通圖案同所需工具。我家中之前買落既盤景同公司植物部份已死，變黄，今次順手買了幾份菁苔同其他小植物自行換了，植物都好似重生了～～

The making of :

Movie: 戰神 : 海格力斯 Hercules

用半人半神同完成十二件艱辛任務包裝既戰神其實都係人一個，身體會受傷；家人被殺會傷心；對朋友有情有義；同樣為錢而工作。

娛樂性足夠的，發現被騙後要撥亂反正係預期中事，但幾個人就咁衝去對付一大堆 trained soilders 就顯得太過不智，為做而做。

女箭手幾型，預言家老頭子好笑，反而海格力斯一般般。

題外話：

1. Free Coupon: 近期睇戲都話優惠唔用得，VIP 冇折只可以儲分，coupon 又唔用得，好彩今次可以用，一口氣用晒續會既 2 張 coupon！！

2. 觀眾群：越來越多老人家/ 中年人一個人去睇戲呀！（冇好或者唔好既意思，純粹一個現象）

PS: 每次見到呢位男主角 Dwayne Johnson 都諗起歇子王...

沖繩6日5夜自駕遊： Day 6 及後記總結

第六日，3：30 PM 機番香港，冇行程可言，目標：hea 時間。

上晝起身 check out 後將行李寄存酒店大堂，去通堂拉面食 brunch。人家原來開 11：00 AM，我地10：30 到左於店外行吓影吓相，等吓等吓就開門 。

佢既拉面分男湯同女湯，其實係豬骨（男）同雞湯（女）湯底既分別。呢間拉面面質煙靭，相當足料：

免費茶水任飲，尚有各種調料，大愛佢既 garlic。當日面向廚房，睇住師傅煮面過程相當認真，每個部驟都計時，放材料上面都十分講究，排好次序。

離開通堂拉面就去對面 AEON 行街涼冷氣，颱風過後既沖繩極之晒同熱，唔可以長期留响室外，好掛住架車呀！

Hea 到十二點左右番酒店就立即去機場，同樣要經過國內 terminal 再去國外 terminal。温馨提示，要最後衝次 shopping 買野就响國內 terminal 搞點，因為國外嗰邊係咩都冇架。

話咁快 6 日沖繩之旅就完結，出發前上網做一大輪  research 好似去左一次旅行，自己實際行一次，今次寫 blog 又好似去左一轉咁，感覺歷歷在目。

旅程完結，做一下總結：

1. 酒店篇
今次兩晚住 Sun Marina, 本來打算做基地玩北面同方便去浮潛，又可以享受酒店私人沙灘，可惜人算不如天算遇着打大風，結果可以話浪費了呢兩晚合共六千幾蚊既酒店。重新計劃既就 5 晚都住平少少，因為確實好少時間响酒店，寧願比少少錢入人地酒店玩。如果 IC 冇封既話查實由那霸市去其他地方都幾方便，亦可以考慮住美國村，往南往北都方便。

2. 租車篇
租車公司：沖繩一般推介 OTS，今次住 Mercure 好大程度因為佢樓下就有 OTS 租車 counter 方便取/ 還車。必須一讚佢地既老實，我地本來第二日先拎車北上轉酒店，遇正打風驚佢 counter 第二日唔開，決定提前一日拎車，諗定要加錢的。點知 OTS 只要我地買多一日保險，冇額外收錢。

車型號：極力推介 Aqua 環保車款，朋友仔解釋係時速 50 公里下係可以自動轉成用電行車，時速 50公里以上先用 fuel。結果我地玩足 5 日，只於還車前入一次油，埋單四千幾日元，即係三百幾蚊港紙。加上租車約 千六港紙，又方便又抵玩。比我揀多次都揀自駕遊。當然响有團友有車牌既情況下～

交通狀況：那霸市內小路多，第一日靠 GPS 帶路好易過路口，雖然佢會帶你行番第二條路去到目的地，但都建議要轉彎時慢駛。另一樣要小心係當地人要轉彎時經常臨轉嗰2 秒先打燈，停唔切堅係好易撞架，所以沖繩行車真係唔好跟車太貼。最後就係沖繩確係自駕人既天堂，大量雪藏牌/ holiday driver （如我自己）解凍，多次見有人泊車另一人落車幫手睇位，還車當日都見之前架車車尾撞爛晒，所以真係要小心路面情況，同埋記住租車時買埋保險！

除左打風嗰幾日，日日都晒到死，架車簡直成為我地既流動雪櫃。行到熱辣辣衝上車開行冷氣，爽呀！

3. 行程計劃篇
自駕遊想提前計劃好，知道點與點距離時間好重要，建議用 google map 幫手。輸入出發地及目的地，基本上佢可以提供基本所需時間，當然遇到好似 IC 冇開同塞車佢係唔包的。

自駕遊的話強列建議上網揾定 MAP CODE, 電話號碼時不時都錯。若果真係要用電話號碼， 輸入後一定要 check 多次，差一個數字可能都去左另一個地方。試過一次係由 Mercure Okinawa 去 清洞，入極號碼都指示車去南行，而我地好肯定係錯，因為青洞响 Sun Marina 附近係响島既西北方。於是停車熄匙再重入 GPS 先可以指示正確路線。

4. 航空公司篇
港龍與香港航空都有直飛沖繩，但港龍一星期幾班，香港航空就日日有機。機程只需兩個半鐘既情況下我既唯一要求只係準時出發，而今次好彩來回兩程都 OK 準時。雖然去程遇氣流，但相信與航空公司冇關。

5. 食物篇
與東京/ 北海道相比係比較差，全程得恩納䐁係堅覺好味，其他嘛試過就好了。

~END~

沖繩6日5夜自駕遊： Day 5

第五日一早前往沖繩行最期待既節目，青洞（ 青之洞窟 Blue Cave) 浮潛。青洞位於真榮田岬，其實由 Sun Marina 出發只要 7 分鍾，但由 Mercure Okinawa 出發加上塞車就要差不多一個鐘了。

行程計劃之初係 Day 3/ 4 住 Sun Marina 既時候去浮潛，由於出發前一星期已經知有颱風，一直未敢 book 呢個節目。今次 join 呢間浮潛公司係網上見倒，賣點係工作人員識講英文，價錢都算公道 (5000 日元一位，另加稅）。Day 1 到埗後了解過個風應該於第 2/3 日就走，驚佢打完風水流急同唔清，諗過放棄呢個節目，但最終胆粗粗 book 第 5 日。

整個 booking 用 email, 負責人 Yas San 都算覆得快，每日覆一次。只要提供人名，酒店名，電話同參加者既身高體重後，要於參加前一晚 16：00﹣18：00 打比佢 reconfirm, 大概佢驚啲人甩底。之前一晚剛好我 '以為' 唔見相機，走來走去之時塞塞吓車番首里城路上突然記得（大概 6：15 左右）先突然醒起去打電話，好彩佢都有聽，唔係反而係我驚到時去到冇得玩!

今日再次北上，IC 開了，塞左一陣車上到 IC 後好快就到目的地。天朗氣清藍天白雲，邊坐車邊食早餐，心晴大好！約左 9：00 AM，我地 8：45 到左左真榮田岬，去停車場揾倒佢地架車：

揾倒負責人，填份表 （主要寫名同簽名）同比錢（只收現金），佢就比套 ‘裝備’我地，包括潛水衣一件 （包晒身，手同小腿），手套，蛙鞋，mask + tube。心諗：駛唔駛咁重裝備呀，浮潛啫，同埋: 早知個身唔揸防晒啦！！

Booking 時對於要提供身高體重呢一環我一直都好迷，佢問第三次我先比，因為以前浮潛咁多次都係比個 tube + mask + fin 我地就自己浮潛，佢到底點解要知身高體重呢？謎底終於解開，係因為要預備套潛水用既衫。唔知係咪之前有一轉玩完番黎，全套裝備都好濕，但冇所謂啦，轉頭落水都係濕。

著好裝備，工作人員將我地份成浮潛同潛水兩組，聽工作人員用啲唔大流利但都聽得明既英文解說。細心既日本人每人派組鏡時幫所有人噴埋防霧， 教人點用 tube 同 mask，記住唔好攝頭髮入去唔係會入水，tube 同 mask 入水又點算呢？佢都有教到。之後到左好耐人尋味既一刻，佢話：唔好帶任何野响身（將身上所有野鎖番上車，但條車匙點算啦？好彩佢可以幫手鎖响佢車上）；蛙鞋落水前要掛响左手，再掛個 mask 連 tube响左手；落水要扶住個水泡（圍住有一條繩比人拉住），要聽指示咁... 最後話：有少少 climbing.... 

响一堆謎既指示下，行向海邊時都明白了。清洞其實就响岸邊，唔駛搭船的，行落一條長長既樓梯後，工作人員幫每組人拍照留念，再爬過約二十步岩石就可以落海。岩石好峰利，所以要帶手套同著潛水衣；要右手扶住行，所以鞋同 tube 要扣於左手上。落水後工作人員指示拉住個水泡，响佢拉動下一組 5 個人齊齊去青洞浮去。當日雖然天朗氣清，但極之大浪，中途工作人員會幫每個人戴上蛙鞋（其實著蛙鞋冇咩意思，全程基本上都拉住水泡游）。

工作人員會於'浮'往清洞途中比少少面包我地餵魚，好快就到左青洞。於洞內游一轉後，大家指一組組人去綠光位置附近影相就出番去 (總覺得水下有打燈)，就沿同一路線浮番上岸邊。沿途工作人員都有幫大家影吓相，而佢影既相就幾日後 email 條 dropbox link 比我地自行 download 番。

由 9:00 比錢到玩完 10:00 上岸全程約一個鐘。眼見好多人潛水，2 個人一組有教練帶住... 勁後悔當日冇聽 Yas San 推介當日去潛水 >.<  今次浮潛見倒好多魚，水都算清，但大少少太陽就更好，結論係都滿意同開心～

反正濕身了，而我地今次既沙灘酒店因天氣關係冇得玩水，於是臨時加插行程去人家酒店玩！ 每人比幾百日元加停車場費就可以入， 呢個亦係咁次沖繩遊唯一一個沙灘節目...

藍天＋幼沙沙灘＋ tiffany blue 海係我腦中既沖繩標記。好彩都可以臨走時見一次。朋友仔玩左一轉 wakeboard (15 分鐘）同陪我玩左一次 sea biscuit (即係坐响相中右下角個 'super mable' 度由水上電單車拉出海，左穿右插拋來拋去咁）全程約十分鐘，開頭覺得太短，玩玩吓覺得：幾時完呀，但其實都幾好玩既。响呢個沙灘 hea 左一陣，食左同飲左少少野再去一個冇 plan 既行程出發：魚市場。

原先諗住沖繩係個島，所有海鮮刺身應該都好食。點知到左第 5 日食過既海鮮都頗為失望的。而呢個魚市場買既刺身可以話係全程最正的！特別係個頂級大 toro 魚腩，連唔鍾意食魚刺身既朋友仔都讚好。其實仲有 2 隻麻麻地既生蠔同一板都幾正既海膽刺身，食完都唔記得影相呢～ 市場內少量枱櫈可以比人坐底食的，但我地選擇上車開行冷氣飲住可樂食～

離開魚市場，就向 Outlet Mall Ashibinaa 進發。途中路牌指住 ‘金城町疊石路’，記得呢條係旅遊書提過日本百年古路之一，都想去睇吓，行行吓到左，原來就响馬路邊.... 同埋原來係首里城其中一個出口... 到此一遊之後直去 outlet～ 

出發前睇 blog 好多人都買倒好多野，但唔知點解我睇極都唔啱，又熱又晒，決定回程番酒店。因為今日 6：00 前要還車了～

番酒店還車後回歸單軌車既懷抱，買左張一日票咁第二日可以用埋番機場。將旅遊書放低決定隨意行埋今晚，回到國際通行吓買吓，行到攰攰地有個居酒屋女仔派傳單，見好似食物都 OK 就走去食了。食物確實唔差，啤酒仲好平 100 日元一支，但店內好多人食煙，好唔慣。食到咁上下就要番酒店執行李 lu...

待續......

沖繩6日5夜自駕遊： Day 4

第 4 日一早，終於見倒太陽，天朗氣清。終於見倒對岸酒店，仲有清澈既海。遺憾既係當日訂呢間酒店本來打算有 2 日可以享受呢個酒店私人沙灘，但由於打完風，岸邊有大量被沖水岸既珊瑚化石，超吉腳。亦因為之前被困酒店，好多行程都未去，唯有去沙灘影吓相算數... 

Check out 後再去尋日冇開既黑糖廠，終於可以入去，但發現冇咩啱心水，空手而回。呢到其實係真正既'廠'，可以响後門入去參觀成個制黑糖過程。

下一站：美國村。歷史因素下美國一直於沖繩有個美軍基地，因此有大量美兵駐集沖繩，美國村多多少少都因為咁出現，而地標就係呢個巨形摩天輪。

美國村內有食店，商舖，AEON，酒店等等，同埋一排七彩既建築物，同岸邊畫滿 graffiti 既堤壩，加上人唔太多，影相一流。

美國村玩左一輪，响南部進發。今日終於可以上 IC （高速公路），入收費段自助式停車按掣取票：

到左所需出口，比現金既排 ‘一般’ 車道排隊比錢。如果架車有 ATM  （即香港 autotoll）就可以直行直過，但租車時問過 OTS 佢話冇得租，所以唯有次次比現金。

出 IC 後好快就到 琉球王國 （付費），主要為左個玉泉洞。相中見天陰陰咁，但實際都相當熱。

玉泉洞就係鐘乳洞，行吓影吓相約需半個鐘可以行完。温度比室外底 '少少'，但絕對唔駛加外套，反而建議帶帽同防滑鞋。玉泉洞內不停有水滴落，唔知係鹹水定淡水，最重要係唔知乾唔乾淨...  真心建議戴帽行！洞內都幾靚的，但主要要靠燈光。奈何佢內置既燈光設計時開時關，唔知佢想點。

離開玉泉洞可以去參觀水果園，再到 '琉球王國體驗村'，裏面有一間間琉球特色小屋，可以試（付費）同睇各種傳統工藝。包括漂染，琉璃 （玻璃）製作，三線琴等等，尚有做酒廠同蛇穴（呢個冇睇）。

離開琉璃王國後直往首里城。當中有個小插曲：去到首里城，揾極都揾唔番部細相機，醒起臨離開琉璃王國時去 toilet 將佢掛左响門後，於是一支箭番去揾，問過失物認領話冇，再入去自己揾一次都冇，打定輸數之時醒起離開琉璃王國時見架車好亂執左一下.... 最後，於放响車既大袋揾番，開心番晒。

話時話，第一程琉璃王國去首里城只要半個鐘，但由首里番去揾相機時不停紅燈，接住塞車同跟住架超慢車，開足四十五分鐘，心入面其實好緊張，驚去到人家關門了。人家琉璃王國 5：00 唔比入，我地5：05 分先到，好彩仲入倒去.... 雖然係自己大頭蝦，其實相機一直响附近....

再次番去首里城既時候大概剛好係放工時間，再次體驗沖繩既塞車，今次心情唔同了，反正首里城收八點，慢慢啦。

首里城位於首里市中心，為當年琉球王既住所，被列為古跡。入首里城為免費項目，但要入中間既主殿就每人要比 800 日元，而呢個主殿至今燒左4 次，除左個基坐外基本上都係重建的。

呢個就係要付費先可以入既主殿模型：

首里城有幾個觀景台，可以飽覽整個首里市：

首里城入口 '守礼門' 入去時周圍都係人，臨離開時見已經冇咩人再番去影番張相.... 雖然已經天黑了...

當晚打算食一間琉璃傳統食店，但跟 GPS 去到發現係個住宅，最後去酒店附近 AEON 食food court, 順手買第二朝早餐。再次番 Mercure Okinawa，依然唔包早餐，但間房比第一日大好多，主要因為訂房時細房已經冇晒... 番房後記得仲有半包煙花未玩... 點算呢？上網搜尋一輪，發現沖繩要放煙花都要去私人沙灘，一般酒店都比 '住客' 放，但外人就未必得。

時已夜深，決定偷偷地去公園放。好彩淨底既都係小型煙火，但有一個係會爆上天的，最終放棄了... 我地呢啲都係做唔成壞人架勒。不得不提，細心既日本人响煙火包內其實提供左一包類似香既物體，幫助點火，同一個大垃圾袋比我地玩完執好再棄置... 可惜我地放晒先見倒呢包野 >.<

放完煙火番酒店休息，期待第 5 日既浮潛之旅！

待續......