小欖燒烤樂園

朗豪坊後街小巴站出發，四十五分鐘之內到達屯門小欖燒烤樂園，場內有泊車位，揸車去都冇問題：

是日周六，成日入場 HKD99一位，另加開爐費 HKD30 一個爐。好似比以前黎時貴左，但實數真係唔記得：

於入口處比錢，包括人頭費，開爐費... 入口處右邊有一大堆爐等住你, 比左開爐費張收據佢，哥哥仔會根住送個爐去你想去既地方：

場內有大蓬位同露天位任君選擇：

工作人員就係用呢個手推車响場內將個點著左既爐四圍推：

 揀左位，放好爐，再拎另一張人頭費收據去食物部拎食物，再用另一張單去換一人一罐既飲品，最後就係配給既餐具，包括燒烤义，鐵义，膠碟，密糖連掃，紙巾同手套。紙巾用完要憑中間個筒去另第二筒，當然可以拆左個筒出黎先預先去換 :P

基本上每圍都係得一隻銀碟，放生既食物，理論上係食完再去拎。但眼見唔少人拎到成座山咁番埋位...

準備就緒就可以開始燒。今次我地係貪方便帶個人去，冇加料。四周好多人帶蔬菜，海鮮，薯仔等等食材入去，好豐富。

唔想拎住燒可以去食物部隔離買 30 蚊一個燒烤網，放晒上去燒，又或者用錫紙包住食物放响爐邊烤熟佢，各適其式。

 好鍾意啲炭燒到白晒中間透火咁，好靚～

要走既話，燒烤場門後有一部小巴，但車要先經深井荃灣，再去旺角，探過幾次係到荃灣已經想落車，再自己轉車... 車費每人HKD19.  今次搭左 52X 去旺角，經深井，長沙灣好，四十五分鐘左右就到旺角～

講得係樂園，除左燒烤外可以租單車踩，場中有個空地比小朋友玩波，吹皂水汽球，有人玩啤牌，打麻雀，附近仲有個小型攀爬架比小朋友玩，但略為污糟都破爛，個人唔會玩。

以前樂園可以直通沙灘的，但尋日見到閘落左鎖，過唔倒去了。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
後記：

可能係任食既關係，好多人係一次拎好多食物番去。首先係唔係樣樣都好食，拎番去發現唔好食最後係變垃圾；其次係就算天氣唔太熱，生既食物就咁放响枱都唔應該放太耐。

去拎食物時同職員講要 X隻雞翼，X 條腸咁，佢基本上都係一手拎比我，冇理我講咩，其實我都係唔想浪費，但佢已經放上個盤，後面成條人龍，唯有照拎走。同埋食物九成都係肉，都幾滯... 最浪費既係好多食物燒完發現唔好食，濃左，未熟等等，結果都係變垃圾。感覺上成個燒烤場係就係好方便，就係不停製造大量垃圾咁....

尋日由下晝三點幾燒到九點幾先走，走時成身（主要係頭髮）成陣烤肉味。朋友話佢搭車番屋企時有人聞倒佢陣除彈走左， haha~

食野途中朋友 facebook 左一陣，有個朋友去左塔門露營。諗起自己露營前要計好晒食幾多，食咩，買幾多，可唔可以唔雪，罐頭都要方便開咁。由於拎多左要拎番轉頭，一般都唔會買太多，同埋就算多左都成日諗住：拎得咁辛苦唔係唔食嘛。因此露營既日子反而冇甘浪費，重點係比較知道要’珍惜‘。