海鹽潄口

話說自己經常有牙肉腫同生非滋既問題，隔一段時間就出現，當中最有效既方法以加促治癒合既方法係早晚用一小茶匙海鹽加水，潄口1﹣2 分鐘，據說可減輕牙周病。有需要不妨一試～

iphone 5 正式啓用

iphone 5 終於到手，眾所周知機身長了，輕了，顏色鮮了，映相快了，相片解像度高了。由於之前電話約滿，今次轉機連續約，到了電訊公司指定地點取機，等了十分鐘左右，簽了一大堆名，用信用咭 HOLD 數，前後二十分鐘就拎走部機，好似一蚊都冇比過就拎走部機，有少許兒戲～

由於部 3GS 比我用到五勞七傷，差不多唔記得可以直接按左邊機身掣調較大細聲，轉個掣可以 MUTE 部機，而唔駛入 GENERAL 設定去較係幾咁方便～ 

由 3GS 跳去用 5，感覺好快，顏色好 SHARP～買完機趕住去星際買殼同防花貼，雖然市面上已經有唔少殼賣，但冇個睇得啱，求其買左個 BUMPER 用住先... 比完 ＄98 蚊，盒都未拆，行過兩間舖見倒 99﹪相似既 BUMPER 賣 ＄35.... 再過一間舖賣 ＄30.... 頂....

防花貼，同一牌子磨沙，＄45，＄60，＄35，＄30 都有，今次以最低價 ＄30 入手，但都 COVER 唔番買貴左 ＄60 既 BUMPER 條數。

番到屋企，邊充電邊 BACKUP 舊電話，再將 BACKUP DATA 過入新機，由於電腦中之 ITUNE 為舊版，要裝新版方能同步 iphone 5，好彩整個過程都於 30 分鐘內完成，yeah~

3GS 將留做後備機，或者番大陸時用下，話晒用左三年幾都好有感情架。

無聊用家人之 iphone 4s, 幫 3gs，4 & 5 合照一張, cheers~ 

陌生朋友

 大部份番工日子都搭過海特快車，該車中途不停7﹣8 個站，加上少左燈位同上落客時間，到站時間比非特快車快10﹣15 分鐘到我要去既站。搭非特快車番工可能遲少少番到去，但實在太唔鐘意晏少少番工行番入位時來自四方八面既奇怪目光，儘量都唔想遲到。

每朝只有兩班特快車，差不多每朝都於車站遇到5﹣8 個搭同一班車既 ‘車友’，大家互不相識，但熟口熟面。

話說近期公司比較清閒，心態上放鬆了，雖然心知 MISS 左班車可能遲到，但不由自主地出門口時間越來越晏.... 但得意地班車好似同我一樣越黎越遲到，每次到車站，見倒幾位 ‘車友’，就知班車尚未到站。

誰知今日準時到站，一個車友都見唔倒，心諗... 唔通班車今日早到走左？說時遲那時快見倒架非特快到了，內心掙札到底要唔要上車之際，見倒兩個車友施施然步向車站，突然放心了，相信特快車應該未到，只係車友們都同我一樣越來越遲出現而已。另一個車友應該以為今日晏左搭唔倒架特快車，從老遠跑黎車站想追架非特快車，臨上車之時見佢視線掃過特快車車友們，佢突然停步冇上車，冒住遲到風險決心同我地一齊賭下架特快車係咪遲到... 十分鐘過後，該特快車施施然到了，車友們如常隨隨上車番工去... 一班陌生人因搭同一班車而生之默契，都當相玄妙....

其實，咁多人之中可能得我一個咁諗，但於平淡生活中發掘啲開心事自娛一下都幾好丫～

Movie: 一路向西 Due West Our Sex Journey

一路向西係一個人稱高登仔既 “向西村上春樹’ 既網路作家，以第一身方式寫香港男人北上尋歡既故仔，由網版到出書，再搬上大銀幕.... 真係有晒天時地利人和。

套戲整體比 3D 肉浦團好的，但裸路位同 SEX 位多到好似睇四仔咁... 奇怪既係戲院女觀眾好多，朋友話男仕可能比較鍾意响屋企睇呢套喎戲喎 ：P 

睇完套戲，可以知到底男人北上做啲咩？咩叫獨龍轉，冰火，同空中飛人等等，睇完明晒～ 有位女性朋友話：好想揾個男性朋友一齊去睇，去睇吓佢有咩反應.... 真係估佢唔倒.... 

另外加載：女性專用場既 TRAILER

一生人總要有一層樓.....?

香港結婚，潛台詞係要買樓或者組樓，為的是二人世界也。但以兩個人月薪共三至四萬，計生活費，差餉，雜費，水電媒，管理費，保險，電話，上網，飲食，等等等等，七除八扣後到底有幾錢剩？

有樓在身的朋友話：買樓保值；有樓有安全感；幫人供樓不如自己供樓；點可以同父母住架，好唔方便架，相嗌唔好口嘛；租屋隨時被人焗搬走，揾屋好麻煩架....

冇樓既朋友話：到期咪搬，可以四周住吓，住死一到好麻煩；租樓住間屋有時揾業主，唔駛自己煩；無程程揹幾百萬債响身，唔好玩啦；買樓會令生活冇晒質素架....

你又 BUY 買邊呢？

iphone 5 騙案？？

http://www.apple.com/hk/en/iphone/

話說星期三中午有人打黎，自稱係 3 既職員，問我要唔要 iphone 5， 我話要，佢話 ： OK架勒，最遲十月初有機，到時再通知我。

今日，心血來潮，諗諗吓佢又唔知我要咩色， 16/ 32/ 64 GB 咁，佢留咩機比我呢？於是打上台問。結果係：冇紀錄，職員即刻幫我落ORDER，27 號有機拎。

到底星期三打黎話幫我留機既係咩人？佢點知我用 3？係騙案既佢又點解要呃我呢？全程我冇講過任何個人資料喔～ 好謎....

喜愛夜跑

近日間中晚飯後去公園慢跑，慢跑既人相當多，但慢行既人更多。若果慢行既人可以唔一字形咁排開霸晒條緩跑徑咁就好勒...

雖然近期天氣轉涼了，跑十幾分鐘都一身汗，好爽～

下屬 vs 朋友

一日，上司話：知你同班細既好好感情，但有時要惡啲同保持距離咁先可以管好佢地...到底下屬同上司之間係咪一定唔可以，或者唔好做朋友呢？

自問天生唔鍾意擺款，經常同各同事閒話家常，同事間亦不少爛 GAG 王，番工對我黎講基本上係開心既事。為左營造一個上司地位要自我隔離，真係唔太做得出。相信條條大路通羅馬，比較想做出一個和諧開心既 TEAM WORK ENVIRONMENT 多過成為一個人見人怕既 DEVIL 上司...

公共交通篇之：最怕遇到既族群

身為無車族，日常出入依賴公共交通工具，最怕遇倒：

﹣大聲講野／講電話一族：仲要坐响自己後面或者隔離
﹣異味一族：大汗味尚好，狐族同口氣..... 只好急練閉氣功
﹣冇腰一族：鍾意成個人俟晒落條柱，唔理其他人企唔企得穩
﹣死都要上車一族：常見於地鐵，唔知係咪搭遲一班車會死，人多時段每次臨關門都要夾硬衝入車
﹣拉車仔一族：唔只一次，比佢地撞過碌過隻腳.....

重有冇？

Movie: Resident Evil: Retribution 生化危機之滅絕真相

生化危機系列，即係喪屍片系列，由第一集開始都唔記得已經睇左幾多年，大概年半至兩年至出一集。今次有2D及3D選擇，貪方便唔想去 IMAX，寧願睇 2D。

劇情：繼上次救出一班人之後，ALICE 被 UMBRELLA CORPORATION 捉左，今集主題只係逃出。感覺似打機，一個個場境好似一關又一關咁過版，不停打呀殺呀撞呀衝呀。今集加入李冰冰同幾個男角去救 ALICE，但係點解個個女子都咁打得，相對男角好似陪襯咁？總括黎講冇咩冷場，但劇情上比上幾集都弱咁。

Movie: The Possession 陰魂轉讓

通常驚憟片都係 TRAILER 係全劇精粹，今次都係被 TRAILER 引去睇。劇情：細女買左個木箱，內有惡靈，一開木箱即被上身，老豆為救個女願被惡靈附身，最終嘛，得年青 JEWISH 神父出手相助，但又唔係大團圓得晒喎～

套戲好有驅魔人既感覺，温情戲份唔少，驚位好少，兩個女好入戲，最後隻魔好似魔介隻Gollum...

片尾唔知係咪有 hidden ending，由於我肚餓一彈字幕就彈起身走，但其他人八成坐晒响到.... 有人可以話番比我知有片尾既知話係講咩嗎？

Movie: The Expendables 2 轟天猛將 2

故事簡單的，只係一班以史泰龍為首既僱傭兵於一次任務中失去一個拍檔，於是 FULL TEAM 上陣去報仇。劇情極之簡單，結局唔多講，反正都估倒，套戲特別之處係老牌 HOLLYWOOD 動作巨星出晒咁滯，除左史泰龍，仲有 I'll be back 既 阿諾舒華苦力加，DIE HARD 布斯韋利士，尚格雲頓同只係初段出場既李連杰等等。

套戲既特點係回歸原始，吓吓揾真車同飛機去爆，大量埋身肉搏，冇咩特技效果咁。但係無程程加個女角入去，雖然打得，但總係有少少格格不入咁。

亂夠了～

今日寫呢段野可能會引起部份人仕不滿，如有意見請理性留言，任何惡意攻擊都會被刪除！

連日見到中國反日‘暴亂’，只覺得心痛。仿如時光回流過百年前反日示威遊行，五四運動等等，讀書時要讀中國歷史，唔係為左唔好重蹈前人覆徹嗎？點解可以打著反日旗號就可以肆意攻擊，破壞同搗亂？現今受傷既係平民；揸日本車既中國人，人家都係真金白銀買架車番黎，何罪之有，你打爛架車，只會令日本人多單生意 ﹣ 因為要買過；所謂日本生意大多由中國人民經營，多以 ‘日本’為號召而已，打爛間舖對反日有咩意思？平亂既警察，軍人都係中國人，你動粗，人家還擊，結果傷既只係中國人。所謂反日，明眼人都知係藉口。呢啲就係國民教育教出黎既愛國？盲目愛國，人家出黎話反日你又跟人去，人家破壞你又跟人地破壞，以為自己愛國，有冇實質諗清楚其實愛國仲有好多野可以做，點解要揀個最冇用既方法？？

你有你亂，你反，人家日本生活如常，當你中國內亂睇戲一樣，到底咁樣反日有咩作用？嚇走晒日本公司，外資卻步，邊個失業，苦既係邊個？

你反日本，決定要買起個島既只係一小撮政壇中人，唔係全國日本人，點解要一竹篙打死晒全部生於呢片土地上既人？日本都有和平之仕，與中國既日本人都係為做生意為謀生，打傷打死佢地有咩用？

有本事做個比日本強，比日本好，強大既社會出黎，取代日本響世界既地位，令人想去旅行都想去中國唔係去日本；有本事清晒所有毒奶粉，地溝油等等影響民生既劣質產物；有本事革晒所有貪官壞官；有心既用時間做多啲原創發明，取代 IPHONE/ SAMSUNG GALAXY 等等既受全世界受歡迎 PRODUCT，做倒全世界第一大國，總比拎個釣魚台番黎有用掛。

中國政府就算唔係幕後操縱都隻眼開隻眼閉，大概想用民間力量比壓力日本，他朝一日出兵都可以聲稱得到人民支持。中國政府有心低調處理，跟本唔會比新聞咁報法，今日幾十個城市反日示威，第二日又幾十個反日活動，咁公開流通反日活動消息，中方若有心封殺點會唔封鎖消息？怕只怕一發不可收拾。十幾億人口中間既貧富懸殊問題，活於社會被壓抑，生活於清貧狀態既一群本死無大害，輸無可輸，同你一舖反動反埋你中國政府肆意周圍搶野黎舖全國暴動就死。

希望可以儘快平亂，可以儘快回歸正常，釣魚台問題留待給政治層面解決吧。其實釣魚台一個小島，可以簽個約大家都放棄可以嗎？唔係有啲就快陸沉既國家？捐比人地重建可以嗎？地球本是一個家，一個地球村，可以和平相處嗎？

順帶想講，香港人靜坐，絕食，和平遊行比人話激進；現今出現燒車，拆屋，搶奪就為之愛國表現？搞不懂？！敢問邊位官員再敢講吓中國呢一撮人處於咩狀態呢？？

May peace be with us~

Movie：低俗喜劇

其實响幾星期前，套戲剛上畫已經睇左，但近來實在太疏於寫 BLOG，呢期會努力補番 ：P

套喜用杜汶澤做電影監製之慘痛經歷做主題，但賣點係由頭帶到尾既粗口，廣西大佬鄭中基，同‘騾仔’。難得港產片全場爆滿咁滯，又唔多明點解一出粗口啲人會狂笑。

個人比較鍾意 FIONA，傻大姐之餘總覺得佢好入戲。當然，鄭中基一出，真係由頭帶到尾，唔多靚仔既佢卻吸所有人既視線，勁。至於個女主角 DADA，其實真係唔太識佢，有朋友話佢係前幾年抗議書展禁止𡃁模入場去跳海既其實一個，戲中既佢又唔討厭喎，OK。

至於杜汶澤嘛，戲中佢係交倒功課但唔可以話好突出，題外話：近年有留意佢既微博同訪問，鍾意佢既做人態度，同佢同太太田蕊妮既 SWEET SWEET 生活。

總括黎講：諗住輕鬆笑吓可以一看

題外話，粗口係人都識講，有人講一百個字有九成都可以係粗口，有人好勞氣先講，但其實有幾多人真係知粗口字既內容呢？中學時有同學好鍾意講粗口，簡直出口成文。有個中文老師，佢上堂時問：你地成日講粗口，不如你話我知啲字點解丫... 全場淨左，老師之後話：其實你明白字既意思，你拼入你講既說話中就知自己講野幾咁唔合邏輯幾咁亂黎。當然今時今日既學生未必適用，但我今時今日都仲記得佢呢番話喎～

有興趣可以睇吓： http://evchk.wikia.com/wiki/廣東粗口五大字

iphone 5

終於等到了，9月12日發佈，9 月21日香港有得賣。用開既 ‘3’ 台早於 12 號打比黎問要唔要留機，講左句留，據說 9 月尾就有貨... 聽住先啦。

手上依然用緊既 3gs 由 2009 年 12 月陪我到而家，估唔到真係等倒 iphone 5 喎, hohohoo, 我都覺得部機好叻，比我瘋狂用黎打機同不停跌都仲用得。但其實都五勞七傷架勒：SIM 咭近 EARPHONE 括位已崩左，左邊調較大細聲個鐵片甩左，屏幕少少花左，相信賣出去都唔值錢了，應該會留黎當做後備機。

秋風起，去露營～

最愛既秋天似乎又黎左，希望唔會突然間又熱番晒。

趁住秋涼，近日計劃去露營，四周搜集資料同買物資中。宜家尚久個營幕，又由同朋友都冇去過露營，要搭要落營釘驚搞唔掂；好似有自動彈出唔駛落營釘既又既唔穩陣.... 有冇好介紹？

露營地點想去塔門，仲有冇其他入門好地方露營地點介紹？

自製 LONG WEEKEND

趁住公司唔多忙，尋日拎左一日大假，自製左個 LONG WEEKEND。打吓機，睇吓書，去食左個 WEEKDAY 下午茶，過左個輕鬆悠閒星期五。

撤回國民教育＋＋＋

http://www.blackpaper.com.hk/p/1664

國民教育搞邊科，只要留言吓新聞同時事，再唔係上網揾吓，肯定資料多到幾日幾夜都睇唔晒，在此不再多談。

到目前為止，身處香港，感受既係自由，安全同社會兼容性好大。社會容納各種聲音之餘，市民可以絕食，集會，反映民意。政府雖然掩耳不聞，你有你講，佢有佢選擇性回應，但始終市民可以去支持，去靜坐；雖然新政府總部就位於解放軍營附近，大家 ‘暫時’ 都唔駛驚會有鎮壓行動...  但點解會變成今日咁多人去絕食靜坐，完全因為政府莫視民意，完倒因為香港未推行國民教育！當日邊個話五十年不變？1997 至2012， 點計都未到期掛！

或者各位已經畢業多年，未婚，冇仔女又或者唔打算生仔女而會覺得國民教育係同自己無關，而呢個亦係我當初既感覺。但近日政府反應之差，不理民意，我行我素，揾人作出挑釁行為，ATV 不知所謂既節目，正正將本來置身於局外之人，如我，推向支持一班默默保衞香港既呢一群人。真心欣賞學民思潮等人既勇氣及對社會既承擔，佩報各位到場支持者既無私支持。感謝呢次行動令我再次見到香港人既美麗：團結，無私，冷靜，有思想。

然而，政府似乎低估左市民既反應，市民亦高估了民間力量。說到底，政治從來都係一個角力遊戲，現今情況就如雙方正响賭枱到賭大細，政府正正握有無限資金，等待市民一方一出錯就一舖清佢袋，總之危機四伏。此時此刻，各個議員，政府官員為保職位身份，邊個走出去講句公道話？請唔好再話市民學生被利用，明眼人都睇得出係無恥之徒在不停抽水！真正比人操控既根本就係香港政府！真正既國民教育唔係迫人愛國愛黨，而係培育國民良好既品格素質，有個人思想，而唔係教出一個個行屍走肉既國民！

政府總部既反國民教育集會，香港人網上既言論正正係一場活生生既國民教育課。無論大家去唔去政府總部，只都想有緣睇呢個 BLOG 既香港人 9 月9 號記得去投票，當然唔好投比民建聯，建制派呢啲已被洗腦既一群，否則佢地用蛇宴盆菜買番黎既鐵票令佢地一定當選，香港前途只會更灰暗。無論大家支唔支持國民教育科，香港確實要更多真心做野既人入局做野，而唔係一班亂吠，只知搞破壞，視議員身份為副業既人！國民教育只係第一部，仲係影響深遠既一步。大家再置身事外，下次未必再有機會置身事內！

Please safeguard Hong Kong, don't let go!

Love~