多氏亂遊：4日3夜台中 （準備篇）

呢期好少寫 blog， 因為忙於做 research, 去旅行， yeah~

定左 4 日 3 夜 台中自遊行，兩晚清境 ＋一晚台中組合，有冇人去過台中？中途有咩境點推介？

好... 悶.... 呀....

 如題。。。。。。

Gotmail: The Shadow in the Temple 潛藏在正堂中的影子 (170 points)

主角與朋友發現藏寶，中途朋友去取工具，主角跟隨 ‘影子’到了一個密室....

十分易玩，分唔多既唔建議用分換黎玩

Gotmail: Unrequited Love 渴望的戀情 (Free)

母親大人嫁入豪門，兒時好友由毫無血緣朋友頓變親人，一日帶女主角去豪門別院，並困住女主角～

Movie: 怪誔黑家族 Dark Shadow

女巫女傭愛上靚仔有錢太子仔，得不到手將佢變成彊屍，發動村民將佢困於倌材，彊屍少爺一瞓差不多二百年。

彊屍被地盤工人無意救出，番回家族大宅，發現只得四丁人口，而家族生意已被不老不死的女巫公司打殘。彊屍少爺想儘辦法復仇之餘同時拯救家放生意，想 Collin 一族重生。

自從上次套 "Alice in the Wonderland' 已對 添布頓 ＋ Johnny Depp 既組合冇咩期望，但响近期冇咩戲好睇之際都算無選擇中既首選。

人物角色分明，服裝及畫面都有好鮮明既對比，女巫主角幾靚，其他嘛....

雖說故事改篇自一套幾十年前既美國 classics，當中情節都相當 old school。拎個二百年前故人到現代對各種 ‘科技’好似 車，McDonald, 電視劇意做既笑位太濫了，都唔知咩叫見好就收。Johnny Depp 雖說係一隻彊屍，都可以換吓衫掛.... 另外，跳崖死既阿未婚妻鬼揾阿補習老師幫咩忙呢？阿姪女無程程變人狼都幾 “O” 咀，唔知原著係咪都係咁 ‘怪’ 呢？ 總之，一睇無妨但唔好太大期望。

Rainbow Day~

今日 facebook 好多彩虹相，因為香港好多地方同好多人都睇倒彩虹，我自己都見倒，一個好完整，好靚既半圓形彩虹橋，咁大個人第一次見咁靚既彩虹，好開心～

上圖係 facebook 朋友 share 既圖，係今日見過最靚最特別既一張 double rainbow~

大掃除～

以前食完飯就上網打機，打到咁上下基本上就去瞓覺，自從冇玩 facebook 既 RC 同 Sims, 番屋企對住部電腦既意欲細左，頓時發覺可以用既時間多左～

呢期工作上密集式做 report 同開會，做到有啲呆呆哋，放工唔出街食飯行街的話，呢期响屋企最常做既事，竟然係：執野

一個星期之內，清理好鞋櫃，衣櫃，雜物櫃，化粧箱，最大“成就”係整理好超過五年冇處理過既各類型賬單，月結單，稅單，保單等等 N 類型紙品，足足整理出3 大個文件夾，分好類，排好日期，完成後見倒地上有好多袋 ‘垃圾’， 頓時有種難以形容，如釋重負既滿足感。

整理文件期間，好似番過去走左一轉，完成左一次快速搜畫，記起自己曾經買過啲咩，幾年前成日去 Physical 做 gym, 去過既 Ceaser Beauty 好似執埋，响邊間公司做過咩，有年稅局秤錯稅，第一次出 bonus好開心，03 年減人工，揾番幾張升職既信，老闆比信時既時情境瀝瀝在目....

執完一大堆野之後，尚在打算之後沒有網上遊戲既晚上如何渡過.... 或者可以諗吓去跑步 ：P

Gotmail: The Dark Dating Party （Free)

完全 load 唔倒........

19/5/2012..... 其實我到而家都 load 唔倒個 game, 下載左但一按 'play' 只見個白圓形响畫面中轉 （LOADING).... 見 IDAC 出左個用分買既攻略，比分買左， screen shot copy 如下：

刪除再下載 Gotmail 後，終於玩倒.... 女主角參加一個識人派對，中途發現派對背後係個販賣人口計劃，途走中被困密室... 又要走呀走 ... 

第一，攪左幾日先玩倒，離晒譜

第二，場境多，但亂，一個畫面得一兩個野要做，轉到頭暈但好浪費時間

第三，多 bug....

容易玩但好死煩的一個，玩到我好忟 >.<

How old are you?

2012 年 5 月4 日 11:30p.m.
寫 blog 時成日會諗，到底睇緊既係咩人？咩年紀，男定女？做野定讀書？會唔會係自己身邊熟悉既人或者仇人？

好耐冇用個投票功能，麻煩按吓呢個 blog 左上角個投票啦 ^.^






_______________________________________

5 月12 日更新結果：


投票結果出黎勒～ 多謝大家陪我玩  ^.^

懷舊 Starbucks

早前睇雜誌得知呢間洗衣街懷舊 Starbucks, 睇完戲未夠鐘食飯，決定去行吓。

聰明既 Starbucks 响唐樓做既懷舊舖，打正旗號慳成本做懷舊氣氛，由門面到入面裝修都有 ‘舊香港’ 既感覺。

大門口：

From OpenRice.com

唔少人玩既懷舊磅：

扮舊式戲院既燈箱：

成間 Starbucks 有兩層，相對其他店舖座位冇咁迫之餘，好多客人拎晒相機不停影相。响旺角貴租地帶都算好難得。

鍾意飲咖啡又鍾意去 hea 既我，相信於炎炎夏日得閒都會番去攤吓。

Movie: The Cabin in the Woods 屍營旅舍

SKII 日於朗豪坊換左兩張屍營旅舍戲飛，星期日睇了，基本上滿座，而劇情都幾 “意料之外”...

初段係類似奪命狂乎既追殺戲碼，五個年青人去渡假，有去冇回，一個一個被追殺。而追殺背後係一班由幾十人既神秘團隊於幕後控制，製造呢一班 ‘貢品’ 被虐殺既機會，因為佢地唔死，世界會被個‘神’所毀滅...

當中好多與傳統驚憟片唔同既地方，好似‘貢品’們原來係响自己八掛翻開人家地窂中物品時，正在選擇自己死亡既方式... 而選擇之際，神秘團隊就用佢地既選擇去大賭特賭...

後來，死淨女主角同另一個因為長期索 K 而對神秘團隊落既藥免疫既 K 友，竟然响荒山野岭揾倒個電梯，去到基地... 而又唔知點解可以咁易放晒所有妖怪出黎，徹底催毀左個基地之餘，女主角同 K 友選擇左一齊等死.... 好灰既選擇，但都有少少寫實

總括黎講，呢套戲可能因為冇期望，特別劇情加上意外結局，OK 收貨。而呢套大概就係所謂既 'cult 片’

Gotmail: Keys and Pieces 棋子和鑰匙 (Free)

特攻進入造地下武器工場搜證途中被困...

Escape Game: The Chapel of Chance 重逢的教堂 (USD1.99)

主角半年前結婚當日未婚妻失蹤，自己又被困住，婚禮告吹了，未婚妻不知所踪。一日，收到封不知明白信叫主角去未婚妻最愛的玻璃教堂...

劇情係咪好熟呢，咪就係 “被褫奪的幸福’ 及 ‘寂寞的受害者’ 大結局，都有少少難度但又合理的情節

自動反擊機能

自細知自己燥底容易發脾氣同人嘈，加上牙尖咀利，同人嘈起上黎成日都一發不可收拾。近年來儘量收歛中，但呢幾日唔知搞咩，日日發作...

今晚食完飯搭車番屋企响巴士站等車，覆緊個 whatsapp message 時有架紅色小巴停底，上緊幾個客時我去車頭望個牌確定左可以送我番屋企，上車...

尚未坐低，第一排坐左個大叔，下稱‘八公先生’， 講左句：（X），搭幾蚊車都要睇幾錢，唔 （X）係呀 (X 代表粗口字）

在下對號入座，自動反擊機能啟動，本來打算坐後排，突然轉彎就座响亞八公先生正後面（即第二排），大聲回應：人地係睇架車去邊，唔係睇幾錢，唔知就唔好响到扮代表

講完之後先回神，心諗，唉... 忍吓口駛死咩... 全車 dead-air， 但我聽倒後排有人偷笑。突然司機講左句：條線都咁多年，間中都仲有客上錯車架, 哈哈... 司機講完後，全車回歸一片死寂，只有收音機聲

自己正在盤算如果前面位八公先反擊我仲駁唔駁佢咀好呢？腦中閃過十萬個可能出自佢把口既回應，但係，八公先生只講左句：街口有落...

完場，坦白講有少少期待佢出聲，可能耐冇同人嘈，口痕發作。八公先生落車了，腦中閃過：忍一時風平浪靜....

到底有咩方法可以提昇 EQ 同忍口呢.... 唉....

又係電訊公司....

相信我同電訊公司八字相沖，就黎各間電訊/ 上網公司我都投訴過...

今次又投訴，係因為 3 月轉左個電話 plan，取消兩個合約指定一定要加，但好廢既增值服務， 月費應該大概 HKD250。

前排出差比較多，好耐冇查月結單，對上一個月突然醒起要上網查吓，發現上兩期電話費單仍然出現兩個增值服務收費，雖然唔多錢，但我明明取消左你扮冇收過 request，再老屈我比錢就唔多啱咁囉。驚打去問兩問聽倒白痴答案會扯火鬧人，於是利用 3ichat 網上即時同 customer service 問吓，點知...

提供左一堆私人資料核實身份，我心平氣和地問：我 2 月轉plan 時同時取消左兩個增值服務但電話費單所見我仲要比呢兩個增值服務？
3：系統顯示服務冇取消，你係咪要取消？
Dor: 係，要取消，但我响 2 月已經取消左... 咁我而家比多左兩個月增值服務點搞？
3: 我地沒有取消紀錄，而家係咪想取消增值服務？
Dor: （重覆）係，要取消，但我响 3 月已經取消左... 咁我而家比多左兩個月增值服務點搞？
唔係一直話為保障服務質素以下對話會比錄音咩？你冇紀錄既話查番我邊日轉 plan 就可以，再去聽錄音。

响公司邊做其他野同時，半小時後睇番視窗，發現對方一直無回覆，對答視窗亦因為超時登出了.... 最終發現自己剛才應該同電腦講野中，只有改打電話... 好快接到去有關部門，反映問題，職員表示要問上司。等了五分鐘，職員表示：為左感謝閣下長期使用我地既服務，我地公司會無條件回贈上兩個月既增值服務費用比你，總共 HKDxx, 會响下期賬單顯示...

雖然唔知係佢真係聽左錄音發現收錯錢，定真係因為 customer service 角度而減番，佢地响十分鐘處理成件事基本上我都收貨。正當我欣賞緊之際，不到 24 小時，就係三個鐘頭前左右，收倒個不知名電話，見2字頭諗住唔係廣告電話，聽左，聽音樂，想收線就有人出聲話係 “3” 打黎，即管聽佢講咩。

3：有個 iphone 4s 低價送比指定客戶，用信用咭扣起 HKD4XXX 信用額，每個月供 HKD20， 兩年約就有一部 iphone 4s
Dor: 唔駛勒唔該，想轉 iphone 5
3：吓，iphone 5  唔知幾時出喎，你等到幾時 <--- 拿，佢想點呀！！ 等到幾時掛你叉事？佢都痴痴地
Dor: 咁 OK 啦，我要出 iphone 5 都唔會响你個台出 ... (收線！！）

工作 工作 再工作？！

身邊九成朋友都不太滿意現有工作，好可惜，工作基本上係大部份人生活既一部份，大部份，甚至全部。

有的抱怨懷材不遇，部份認為自己人工過低, 亦有不少認為身邊同事上司老闆唔好唔公平，工作性質唔好又好悶，冇前途，冇機會... 但係到底番工為左咩呢？大都認為自己番工係為份糧，有糧出邊到番工都差唔多。

當大家咁唔鍾意自己份工，大部份人口中掛住句 'slogan' : 要轉工，但一直都冇實際行動，咁咪即係座以待斃嗎囉。時間唔等人，‘想’轉工先整好份 CV， 再‘揾’ 工同 “SEND” CV.... 唔係既話 ... 為自己諗清楚：

當...  轉工成為一個口號，而激唔起你實際行動，除左證明自己懶之外，都顯示份工唔係咁一無可取。

而... 轉唔倒工或者唔轉工，又要响同一間公司打滾，何不諗吓可以放大吓公司既好處？好似：同事老闆幾好？工作自由度大？可以遲到早退？準時放工冇甩拖？公司福利唔錯？人工都幾好？BONUS 好多？識倒好多人？番工時間可以做好多私人事？做野有滿足感？

或者，可唔可以同上司傾轉工作崗位，轉部門，或者改變部份性質／職務？覺得自己人工低又有冇同上司／老闆反映過？太多野做會唔會可以响部份程序上作出改變？

要留低就唔好成日挑骨頭，明知公司各樣事係咁，不停投訴，不停呻有咩幫助？响各樣不滿中發掘幾樣好處出黎就夠了，將好的放大，學懂欣賞生活中的各種不圓美...  咁做人都會開心啲。

坦白的說，轉工尤如賭博，好唔好要做落先知，冇人担保下一份工一定係好，工作好同事又未必好，同事都好可能要成日出差成日 OT。個人意見係做得開心，人工同工作量取得平衡就可以，記住人工/ 職位唔可以代表一切，知足先可常樂。然而， ‘知足’ 呢兩個字有少少知易行難。

上文致身邊成日同我訴苦又講左 N 年想轉工既‘朋友’們。

Goodbye AppNavi ﹠ Hello Gotmail

AppNavi 尋日出左個新 update, 要先 delete "AppNavi，取而下載取代既新程式 : gotmail, 唔係既話會開一次彈一次

改動：

﹣‘新’ apps 於開始時出左個動畫介面，但入到去同舊既分別不太

﹣可以用 ‘真錢’買 points, 再去玩當中本來用分先可以換既遊送

﹣加左內置 ‘影相 ’功能 

﹣相信遊戲所需記憶空間細左，因為我 sync 部機時發現 apps 佔既空間細左唔少 

到底改左有冇好到？真係 no comment....

Download link:
http://itunes.apple.com/hk/app/gotmail/id425592223?mt=8

沒有回覆的留言

幾分鐘前先發現留言有一項分類叫 'spam', 當中有十幾個留言，剛剛 'unspam' 了，但當中既留言我都冇見過，所以一直冇覆過 >.<

唔知咩準則會比 system 歸類為 spam comments.... 基本上我收倒既留言都會覆的，但如果我一直冇覆過，相信係被 spam'ed'，唔係專登唔覆架... 而我而家亦唔知响邊揾番呢啲 released spam comments...

唯有同留過言又冇覆過既各位講聲 : sorry ar

AppNavi: The Devil's Playground 鬼的遊樂場 (Free)

主角半夜去探靈，點知又被困...

Movie: Lockout 拯救太空一號

之前睇過 救參 96 小時，幾鍾意，見呢套類似片種同一導演，但搬左上太空既戲之前都有少少期待，但結果...

男主角被屈殺死某個身懷軍事機密之朋友被捕，被捕前成功將 ‘秘密之行李箱’ 交給拍檔，滿以為尚有一線生機，但同時男主角同拍檔已分別被捕同安排送往太空一號。

同時總統個女為人道事宜到訪太空一號，一個冰封位差唔多五百個犯人既太空監獄。當然為左有戲做，其中一個監犯走甩，整醒所有人之餘，得知總統個女响太空一號，各人設法捉佢諗住拎黎同總統講價做籌碼。順理成章，主角被派拯救總統個女，不斷走呀走，追呀追。

其實，除左某幾個太空景之外，都差少少唔記得故事背景响太空。好多位都攞黎做，好似個犯搶總統個女保鏕既槍... 點解呀保鏕要企過去呢？？ 點解响咁多重犯既監獄無程程自己可以出黎叫自己做大佬話事呢？？ 最後，由太空跳番落地球.... 太空層既熱度靠件太空件就捱得住，跌落馬路就有警察拉男主角？？？  搞咩呀

响唔帶個腦睇戲，又或者睇戲唔好駁戲既情況下，男主角極度口臭，都做左唔少笑位。另外係最後，原來個黑人警察先係奸既，少少估唔倒咁啦....

得閒無聊睇吓既話都 OK 既，但唔好太大期望.

2012 Hockey 5's Hong Kong @ Mega Ice

對於冰上曲棍球既認識限於多年前睇木村拓哉主演既日劇 PRIDE。今日為左去睇戲去 Mega Box, 未夠鐘入場，被四起歡呼打氣聲吸引，發現 Mega Ice 打緊比賽，反正有時間，決定留底睇吓。

比賽由小朋友組別開始，每組連龍門有六個人，十二個人仔滿場飛其實幾得意，雖然小朋友們年紀細，起初都懷疑佢地平日行都唔太穩喎，但响平上如履平地，有幾個仲好快就緊貼個冰球一直滿場飛，堅快。至於比賽規則，睇幾場就大概知，唔難明。

比賽節奏都好快，一場完結另一場好快就開始，在場堆滿打氣既家人朋友，同未打又或者已經打完既球員。各式各樣既冰球裝備袋四散，好多人影相之餘由於好多都係外國人，個個大聲叫，大聲支持場中小朋友，好熱鬧，十足成個嘉年華會咁。

場次由小朋友漸漸轉成青年組，成人組，越打越有水準。加上有來自北京既組別，同一堆相信來自不同國際學校既小朋友同家長們，相對於平時好靜既 Mega Box，今日出現新面貎～

比賽仲未完，有興趣可以睇吓： 

http://www.megaice.com.hk/index.php/events-a-activities/443

別了 Sims Social & RC

Facebook 遊戲中，Restaurant City 可說係我既至愛，冇記錯既話，由佢一出就可始玩，無間斷地支持左佢三年幾。最終，忍受不了一星期出 N 碟新餸要做，無數任務要完成，仲要出新食材同擺設等等引買家去用真錢買，宣佈：別了 RC

另一個早期狂玩既 The Sims Social, 亦同時放棄，不思進取的本人實在追不上個個星期新增要 upgrade 既無數技能。

兩個程式徹底從專為玩遊戲而開的 Facebook accountsss 中移除，呢個遊戲專用戶口變得冇用了，唔駛為玩遊戲而 switch accounts 竟然感覺輕鬆了～

＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿

更新：

剛剛為左刪取為玩 RC 開既一個賬號，再次登入，竟然發現 RC 原來都會於 6 月 29 日自己了斷 .... 

RC 臨別可愛插圖集：