Happy Birthday... again~

尚有不足二十四個小時，又到一年一度的生日.

每年生日都會自我 review 一下，而今個生日，做左個中期檢討， 因為如果我有七十歲命，人生都行左一半...

自細我都好死好彩，唔太鍾意讀書又比我考試考得 OK，HKCEC／ HKAL 一直都無驚無險。雖然唔係名校畢業，但都叫讀完大學。任性但唔係含住金／銀鎖匙出世既我，中五暑假話要跟個同學去加拿大讀 summer course, 二十四考媽媽又比我去，自此開拓左我得閒就要離開香港既習慣。讀大學揀左一科冷門科，為的就係明正言順有一年去歐洲‘讀書’既機會，當然讀書為名，中間穿插大量長短途旅遊。

讀完書，順利揾倒第一份工，做左幾個月唔鍾意，轉了另一份，一做差不多做了十年。

大概年半前，我離開左一班差唔多共事左十年既同事同環境，離開既原因其實只係當刻有好深感覺我要離開，唔想再重覆做呢份工，想離開生命中呢個安全網，想去 explore 一下生命中其他既可能性... 一個隨心又任性，而又唔太多人會明白既決定。

決定辭職後，用左五分鐘打辭職信，老闆收到一刻都好錯愕，但尊重我既選擇。之後，我亦決定比自己一個悠長假期，預定半年。

無宗教信仰既我，其實一直都相信命運，相信生命係一場 programmed 既遊戲，一切無必要太計較，太執著，因為我自小長大既環境同際遇，發生過太多事堅令我感受倒‘整定’ 呢兩個字... 所以我一直都好隨遇而安，我好相信我一定會揾倒一份工，問題只係好唔好。當中都矛盾過：要揾番份人工有番咁上下但繼續好辛苦既工，咁我當初又何必要走；要揾份人工差過以前但冇咁大壓力，冇咁忙既工，但見過幾份類似既工都比人話我 over-qualified... 諗過係咪要做份假 CV 寫做十年 clerk 就算，anyway, 冇咁做過，始終相信係我既始終係我既～

半年過去，雖然越黎越發覺自己好有做宅女既潛質，hea 足半年仲未夠皮，反而係身邊既家人朋友不停問：點呀，揾工揾成點呀，想揾咩工呀...

家人朋友群眾壓力下開始揾工，見過幾份覺得幾好既都無消息，曾經一度好 down，好彩有輕度老人痴呆既我幾日後又唔多記得，又冇事再繼續上網揾揾工，間中見見工，繼續行街日飯既日子，而呢段時間我亦瘋狂打機，玩番多年冇玩既 Command & Conquer 等等電腦遊戲，同 AppNavi 既 games. 每到 AppNavi 差唔多出game 既日子，我就一早起身瘋狂 reload 睇有冇新 game, 一出game 就 9 秒 9 download 同打完佢，打完無聊去 forum 話比人知點過關，越答越發現好難揾番條題目之餘 forum 內都好亂，於是開始响呢個 blog 寫攻略，建立左一個屬於自己既秘密空間，識倒班好 sweet 好好既 ‘網友’ 們... 本來，我身邊其實冇人知道我寫呢個 blog... 除左我其中一個表妹因為一幅我响 facebook 同呢個 blog 都 post 過既數字油畫，同佢有睇過我呢個 blog 既同事無意中串連倒我就係佢表姐 .... 到宜家我都覺得呢件事好搞笑～

於呢段我人生中半退休既時間當中，AppNavi 既遊戲成為仲我每星期十分期待既節目。亦都因為响呢個 blog 寫攻略，好多人會留言比我，幸運地大部份既留言都係善意既，收到每一個留言我都會好開心 ^o^

相信最近幾個月都發覺我出攻略慢左，因為我 hea 左一年三個月之後我再次回歸朝九晚五既生活，番左一份 freelance 工。合約期本來到四月尾，本來打算做番幾個月宅女再揾工，但剛剛公司確定轉我做另一個 permanent post, 而我都幾鍾意個新 offer, 所以黎緊相信要正式告別我宅女既生活，但唔排除我會拎幾個月 no pay 假去hea 一排。

希望我黎緊既生活都繼續可以 hea 下去，希望自己同身邊既人都‘身體健康，開開心心’，呢啲就係我最近幾年既生日願望～