沖繩6日5夜自駕遊： Day 4

第 4 日一早，終於見倒太陽，天朗氣清。終於見倒對岸酒店，仲有清澈既海。遺憾既係當日訂呢間酒店本來打算有 2 日可以享受呢個酒店私人沙灘，但由於打完風，岸邊有大量被沖水岸既珊瑚化石，超吉腳。亦因為之前被困酒店，好多行程都未去，唯有去沙灘影吓相算數... 

Check out 後再去尋日冇開既黑糖廠，終於可以入去，但發現冇咩啱心水，空手而回。呢到其實係真正既'廠'，可以响後門入去參觀成個制黑糖過程。

下一站：美國村。歷史因素下美國一直於沖繩有個美軍基地，因此有大量美兵駐集沖繩，美國村多多少少都因為咁出現，而地標就係呢個巨形摩天輪。

美國村內有食店，商舖，AEON，酒店等等，同埋一排七彩既建築物，同岸邊畫滿 graffiti 既堤壩，加上人唔太多，影相一流。

美國村玩左一輪，响南部進發。今日終於可以上 IC （高速公路），入收費段自助式停車按掣取票：

到左所需出口，比現金既排 ‘一般’ 車道排隊比錢。如果架車有 ATM  （即香港 autotoll）就可以直行直過，但租車時問過 OTS 佢話冇得租，所以唯有次次比現金。

出 IC 後好快就到 琉球王國 （付費），主要為左個玉泉洞。相中見天陰陰咁，但實際都相當熱。

玉泉洞就係鐘乳洞，行吓影吓相約需半個鐘可以行完。温度比室外底 '少少'，但絕對唔駛加外套，反而建議帶帽同防滑鞋。玉泉洞內不停有水滴落，唔知係鹹水定淡水，最重要係唔知乾唔乾淨...  真心建議戴帽行！洞內都幾靚的，但主要要靠燈光。奈何佢內置既燈光設計時開時關，唔知佢想點。

離開玉泉洞可以去參觀水果園，再到 '琉球王國體驗村'，裏面有一間間琉球特色小屋，可以試（付費）同睇各種傳統工藝。包括漂染，琉璃 （玻璃）製作，三線琴等等，尚有做酒廠同蛇穴（呢個冇睇）。

離開琉璃王國後直往首里城。當中有個小插曲：去到首里城，揾極都揾唔番部細相機，醒起臨離開琉璃王國時去 toilet 將佢掛左响門後，於是一支箭番去揾，問過失物認領話冇，再入去自己揾一次都冇，打定輸數之時醒起離開琉璃王國時見架車好亂執左一下.... 最後，於放响車既大袋揾番，開心番晒。

話時話，第一程琉璃王國去首里城只要半個鐘，但由首里番去揾相機時不停紅燈，接住塞車同跟住架超慢車，開足四十五分鐘，心入面其實好緊張，驚去到人家關門了。人家琉璃王國 5：00 唔比入，我地5：05 分先到，好彩仲入倒去.... 雖然係自己大頭蝦，其實相機一直响附近....

再次番去首里城既時候大概剛好係放工時間，再次體驗沖繩既塞車，今次心情唔同了，反正首里城收八點，慢慢啦。

首里城位於首里市中心，為當年琉球王既住所，被列為古跡。入首里城為免費項目，但要入中間既主殿就每人要比 800 日元，而呢個主殿至今燒左4 次，除左個基坐外基本上都係重建的。

呢個就係要付費先可以入既主殿模型：

首里城有幾個觀景台，可以飽覽整個首里市：

首里城入口 '守礼門' 入去時周圍都係人，臨離開時見已經冇咩人再番去影番張相.... 雖然已經天黑了...

當晚打算食一間琉璃傳統食店，但跟 GPS 去到發現係個住宅，最後去酒店附近 AEON 食food court, 順手買第二朝早餐。再次番 Mercure Okinawa，依然唔包早餐，但間房比第一日大好多，主要因為訂房時細房已經冇晒... 番房後記得仲有半包煙花未玩... 點算呢？上網搜尋一輪，發現沖繩要放煙花都要去私人沙灘，一般酒店都比 '住客' 放，但外人就未必得。

時已夜深，決定偷偷地去公園放。好彩淨底既都係小型煙火，但有一個係會爆上天的，最終放棄了... 我地呢啲都係做唔成壞人架勒。不得不提，細心既日本人响煙火包內其實提供左一包類似香既物體，幫助點火，同一個大垃圾袋比我地玩完執好再棄置... 可惜我地放晒先見倒呢包野 >.<

放完煙火番酒店休息，期待第 5 日既浮潛之旅！

待續......

沖繩6日5夜自駕遊： Day 3

第三日一早，依然狂風大雨中，食完早餐先算。點知食完早餐發現已變微雨，酒店職員都忙於清理路上因颱風做成既垃圾同積水。我地與酒店內住客都蠢蠢欲動，番房拎行裝準備出遊，亦有好多人趕 check out。

第一站殘波岬，一個延綿兩公里既懸崖，離酒店二十分鐘車程。去到入口，職員剛剛先將封住入口既長欄移走，泊好車興奮落車之際仲有少少雨，但隨即被風吹後幾步。朋友仔前日响便利店買既著明透明長遮一開即爛埋! 行出殘波岬之際有個職員尾隨而至，表示太大風唔可以出去。無辦法之下唯有上車走。轉頭有駕車到，一位外藉男仕 9 秒 9 拎相機衝出去影相，朋友仔話驚我地唔會再番黎，佢又跟住跑出去影相。影左一陣就開車番殘波岬入口前既手信店大購特購，再到附近既 Aquagrace Chapel 影吓相（影左幾張就比職員阻止叫我地離開）。

影完相後發現有架旅遊車上殘波岬，決定博吓跟人入，於是再開車番去，今次終於可以行出去影吓相了～ 早前叫我地唔好出黎既職員冇呃我地，確係好大風，天色又隨時落大雨，因此冇行去睇傳聞中兩公里懸崖，轉頭往下一個景點出發！

殘波岬附近有間黑糖廠，本來打算去行吓買手信，當日第二次被職員通知離開，又冇開！咪又唯有走囉。黑糖廠門口既大牛牛都被颱風吹跌，大概人家都係忙於善後。

行程緊湊，下一站到萬象毛（日本路標係：萬座毛），當真主要影呢個景，快既幾分鐘可以走了。到左呢個景點明顯好多遊人已經出動，仲撞口撞面都聽倒廣東話同國語～

下一站： 元祖海ぶどう 。大量旅行書同 blogger 推介既食店，店舖裝修好有日本傳統風味，出名海葡萄飯（下圖左上角），味道尚可，但 not really my cup of tea, 朋友仔既鰻魚飯相對吸引。另外點左刺身同燒帶子，都係一般般～ 

食完飯，冒險往美麗海水族館進發。話 ‘冒險’係因為由 Sun Marina 去水族館要差唔多個半鐘車程，而酒店職員通知今日水放館唔開。本來唔想白行一場，但朋友仔話：水族館响室內，唔會唔開嘛。加上若果我地搬番那霸先去就要差不多兩個鐘車，所以決定博一博。睇倒有相都知博倒啦～

去到剛好2：30左右，有餵魚同海豚表演，但興趣不大，影左幾張相就走左。水族館呢個到此一遊項目都相當雞肋，去既都係為左個大水族館景，其餘嘛.... 要花個幾兩個鐘專登去就唔太值咁囉。 

到左水族館其實就已經到左沖繩本島既北面，順道開車一遊全日本最長的不收費大穚：古利宇大穚。本來古利宇沙灘可以落去玩的，原本打算去古利宇島上食海胆的.... 但計劃趕不上變化，雖然不氣冇再好似前一日咁狂風大雨，但風依然好大，太陽依然不見，好多舖頭依然未開... 

於古利宇大穚上走左一轉，時間唔早了，打算開車番 Sun Marina。見旅遊書上指住苦瓜園於回程路上，臨時決定加插行程去一轉。苦瓜園真係有苦瓜架，仲有好多.... 蚊：

當然唔少得各類型同苦瓜有關既手信，我就買左幾包苦瓜茶，甘甘地都幾好味：

本來當晚打算食海鮮的，但去到發現又冇開.... 於是轉戰旅遊書推介既 '恩納豚'。入座時老闆娘講明當晚只有 SET，响好肚餓既情況決定照食可也。而呢餐係全程最貴既一餐，每人連飲品差唔多 10000 日元一位，但亦係我最鍾意既一餐。呢個套餐主打係頂級 '石垣牛' 同 '阿咕豬' 紅涮鍋，點餐時其實打算點個 4000 日元一位餐，但老闆堅持推介個 8000 日元餐。基於人一世物一世，叫左個 8000 幾日元既餐，事實 （我）亦冇後悔。

頭盤已經有齊沖繩明產：豬耳，海葡萄，苦瓜，海雲。凱撒沙律亦好好味，另外叫既梅酒都好好飲。主菜上場，有manual 教你每個食呢個紅涮鍋既部驟：先食既石垣牛，入口即溶，好香；飲一啖湯底，微辣但醒胃；再食一片阿咕豬，香；依指示將所有配菜同肉下鍋，再飲一啖湯底，變得香濃；老闆同老闆娘經常巡視，見火喉唔啱會幫手調教；見肉煮老了乾脆關火，睇得出佢地對食物同品質既執著。食完後，老闆將湯底加飯同芝士，响我地面前用火槍燒成脆面，身位芝士精既我大愛。開心滿足既一餐，第一次覺得旅遊書推介 OK 喎～

仲記得 Day 1 買左既煙花嗎？當初打算响 Sun Marina 沙灘放的，但前一晚沙灘因為打風封左，今晚食完飯後去睇吓，咦，出倒去喎，於是衝出去放煙花。點知.... 風太大，點火都難，放左半包後決定留番之後揾地方再玩。

待續......

沖繩6日5夜自駕遊： Day 2

第一晚沖完涼，街上其實已經横風横雨，街上行人明顯有遮都冇用，吹到向後行。企近窗邊都感覺倒玻璃震緊...  諗多無用，瞓醒先算。

第二朝一早風雨交加，問過酒店可唔可以遲少少 CHECK OUT， 職員堅持 11 點必須離開。無辦法，同朋友仔商量一輪，响朋友仔堅持而我又冇更好既提議下決定冒險轉酒店。

Mercure Okinawa 泊車係類似電梯，三個大入口，要職員用系統轉出架車先可以於早前泊車既同一個入口取車。我地通知職員要取車離開時職員都表示 'really?'.... 酒店大堂有一大堆 '滯留' 既住客見我地拎行李出去都眼望望，眼神表示 'Good Luck~'。

朋友仔去取車（好型咁遮都唔拎，話拎都冇用.... 都係....)，我就拎住兩件行李於大門等，一出酒店兩個行李輪流吹走，我個人都被吹後幾步，好彩一上車，關門後感覺踏實同安全好多。GPS 表示 49 分鐘可以到可以到下一間沙灘酒店，位於沖繩本島西北部之 Sun Marina ，全程由駕駛技術比我好百倍既朋友仔開車，還好沿途街上其實都有少少車，感覺 we are not alone。

按 GPS 指示行約十分鐘，發現.... GPS 指示要上高速公路 （IC），但 IC 因強風關閉！！以為我地行另一條路可以令 GPS 帶我地唔行 IC 都可以去到 Sun Marina, 但無論我地點行，GPS 都不停要我地上 IC！！躁底既我無奈到不停鬧部 GPS （我知我好白痴....) 冷靜既朋友就表示按照 GPS 上既紅線 （由目的地到我地架車既所在地拉成之一條直線），加上一直向西北行就可以到。鍾意睇恐佈片/ 驚慄片既我响朋友仔開車途中，不停想像架車會唔會被大風吹走，會唔會山泥傾瀉，架車近岸邊會唔會一個大浪連人帶車捲走... 好彩呢啲電影情節冇出現到，只係途中馬路上間中有樹枝同垃圾，間中要避一避。

最終，離開 Mercure 個半鐘後安全到達 Sun Marina，職員都問 '你地點黎架？！' 朋友仔响大門放底我同行李去 check in先，佢就去泊車。必須一讚細心既日本職員，佢地開車尾隨朋友仔，等佢泊好車後馬上車佢番大堂入口呢！

上到房，露台本來放左 2 張長椅同一個茶几，由於太大風都被搬入房中。露台望出大海，感覺好恐佈：雨水基本上好似瀑布咁打横吹，沙灘差唔多被打爛咁，好多沙被捲入海中，岸邊變成啡色；對岸酒店只可以依稀見倒，好似窗外既景物都加左層磨沙....

到左 Sun Marina 差唔多下午一點，開車去酒店時沿途都發現冇咩舖頭有開，朋友仔亦因為聚精滙精開車都好攰，唔想再開車出去，於是決定响酒店內食 lunch。大概酒店都怕食物存量唔夠，只提供 buffet 而不提供 a la carte。而佢既 buffet 都唔太貴，約 二千日元一個人，質素還可以。座响窗邊位，一邊食一邊睇住窗外狂風暴雨，實在忍唔住担心：到底個風打到幾時，同埋個風對之後行程到底影响成點。第二日本來打算去萬座毛同殘波岬等等既行程已經全數被 cut.... 到底之後會甩幾多行程呢...

食完午餐，於酒店內四圍行。Sun Marina 酒店有一個私人沙灘，本來由大堂可以出去，由於強颱風關係出口都被封了... 出口側邊係一間比住客做小手工既小舖，亦因為打風，大量住客被困酒店，呢間小舖亦基本上都滿座了。小手工包括為沖繩吉神小獅子上色，貝殼上畫圖案等等。

朋友仔對手工冇咩興趣，我地轉移目標去玩桌球同足球機：

玩左一輪，番房 '睇電視' 同睇 '（颱）風景'。一方面都想知打風打成點，實際上係冇野可以做。電視不停播颱風消息，雖然唔識日本，但重覆睇左幾百次後都知係十幾年來打沖繩既最強颱風，直吹日本本島。

鐘意影相既今次朋友仔今次全副武裝，腳架，燈架，長短鏡全部上陣，無聊下於酒店影沙龍，亦好彩酒店有 wifi, 打吓機玩玩下又到晚餐時間～

完成午餐後都大概估倒晚餐都會極其多人，所以三點幾已經去訂位食晚餐，連續第二晚食烤肉。質素 OK， 份量略細，亦講明冇得散叫。因為食完飯都冇野好做，所以慢版慢吃。窗外天色漸黑，依然聽倒出面恐佈既風聲。

食完飯又去酒店內既小店行下，去酒店門口睇街外颱風景。基於今日唔知聽日事，唔知聽日會咩環境，唯有早啲瞓。

香港經常打風，以為早已習以為常。但今次也許身處沖繩，真係唔知日本打風會點，會唔會好似香港咁 8 號風 / 黑雨就全市停工？加上風暴消息都係日文，好多時都係估估吓，不安感都幾重。

待續......

沖繩6日5夜自駕遊： Day 1

07：35 早機由香港出發，香港航空，5XX 閘口登機。雖然唔駛搭無人駕駛，但要搭接駁車由地面行上機。唔知係咪暑假，大量小朋友同機，心諗：今次大鑊了，嘈死！

等登機時突然狂風大雨，人生第一次收到航空公司派既透明雨衣，但好彩落車時已經冇雨。航機順利起飛，但經歷一生另一個第一次：飛機急降，大量物品飛到天花板。當時空姐們正派包做飛機餐，見唔對路即係跪低，全機尖叫，感覺正過過山車～

難得機上小朋友冇大喊大叫，反而一班外藉人仕玩得興起玩人浪，降落時全機拍爛手掌，場面相當搞笑。

落機後完成入境手續，直接往單軌列車站進發。入境 terminal 為國際機場，出機場要右轉一直行約 5 分鐘進入國內機場，上二樓就到達單軌列車站。入閘前會見到 ‘日本最西端之駅’ 標誌，可謂落機第一影相點。

第 1，4，5 晚都住 Mercure Okinawa, 貪佢近車站 （壼川）同租車公司 OTS。由機場到壼川只要幾個站，約十二分鐘車程。出車站兩分鐘即到酒店，超近。

放低行李後已經中午時份，搭幾個站單軌列車到 '國際通'（牧志站）。國際通係一條長街，兩邊都係唔同類形既舖頭，手信舖為主。由街頭到街尾快行都要約半個鐘，未計行入國際通內既 ‘平和通商店街’。

平和通商店街內有著名既 ‘牧志公設市場’，即係街市。周圍都有路標好易揾。

市場地面一層係賣海鮮雜貨：

可以响地下海鮮店買好海鮮再上二樓任何一間食店 ‘來料加工’ 每人比幾百日元就可以。

或者直接响食店 order 任何食物。老實，食物質素一般，好多人叫龍蝦刺身，細隻約 HKD300，但 2 個人未必食得晒，所以只簡單叫了個刺身，炸魚等。埋單約 2200 日元。

食完開始四圍遊盪，第一次遇見整棵 ‘枝豆’呀！

由於第 3 ﹠ 4 晚住海邊酒店，諗住玩煙花，所以順手買了一包，約一千日元一包，有約 10 款唔同既煙花，都唔算貴。

行到五點幾，隨住颱風迫近，街上越黎越大風，本來打算第 2 日先開始租車，但驚打風佢 counter 唔開，決定提前一晚租車。預左比多少少租車錢，點知只要加多1 日保險就可以，日本人做生意真係好老實 （可能佢地收 5：30 點後第 2 日都開 9 點，我地提前少少拎車冇再額外收我地租）。

順帶一提 OTS 租車時可以用折扣價買某些景點門票，每張平幾十蚊港紙。

OTS 網址： http://www.otsinternational.jp/otsrentacar/cn/okinawa/

取車後再番國際通附近揾食，信旅遊書推介去‘守礼’。食物尚可，每人約 4000 日元一個餐。舖內有一太太用三弦琴伴奏唱歌... 個人感覺少嘈 :P

餐廳好少客，炭爐烤肉油煙極大。

食完飯，夜晚街上其實已經好大風。回程酒店之前特登去牧志站附件 AEON 買定食物同飲品，因為真係唔知日本打大風會唔會冇舖頭開，食都冇得食。成晚就煩惱第 2 日颱風下行程應該點搞... 由於成餐飯不停聽住首日本民謠，好熟但唔記得係咩歌，揾左一輪响 YOUTUBE 揾倒佢 ﹣ 花心（沖繩民謠版）：

待續....