蘭香麵家

某日偶然於電視上見倒個節目介紹呢間麵家，馳名雞腸同牛柏葉。幾毎月後的一天偶然路過，剛好食飯時間，決定一試。試了雞腸同牛柏葉，唔錯但唔係想要 encore 再食咁，反而牛腩好好得，加埋豉油＋辣椒油好好味～

南記

從前响灣仔番工，成日幫襯地鐵站通去會展天橋下既南記粉面，機本上只會叫 3 號（豬腩肉小窩米線）加春卷＋豆漿，當年（大概 4/5 年前）係 ＄23 一碗粉，另一豆漿一杯 ＄5，即係三十蚊唔駛就有一個餐，個粉仲好大碗，食完一定飽。

自從轉工了，好少機會食倒，雖然銅鑼灣都有幾間分店，但總覺得灣仔食開嗰間最好食。但上星期去會展附近，專登走去食，人依然好多，好了個阿姐 ‘指揮人流’，排隊﹣比錢﹣等叫號碼（已經唔駛再比飛水吧～），等了十多分鐘，春卷依然好好味，但份量好似細左，味道比記憶中差左，同埋貴左好多，依舊三號餐＋春卷＋豆漿要成四十幾蚊～ 

Movie: 無聲吶喊 Silenced (熔爐）

近日上映既無聲吶喊，唔知點解我起碼大半年前就睇左... 忘記了响有線定 PPS 睇，但呢套係一套好沉重既戲。

男主角係咖啡王子一號店既男主角，但今次佢係做一個失意既美術教師，去到一間聾人學校，發現校中幾個學生長期受校長同其他老師性虐待同毒打，決定為佢地出頭告上法庭，可惜最終犯人都係被輕判，其中一個學生仲死左....

睇戲時並唔知呢個係真實故事，被一個作家寫成小說 ‘熔爐’，拍成電影後南韓政府修改法例保護兒童免受侵犯，但原案重審了，犯罪老師依然任教。

成套劇睇完有種無形壓力，好重... 好無奈... 好痛...

心情唔好最好唔好去睇～

Kraze Burger American Dining Gourmet

六月某日於 isquare 行到攰攰地，走左入 Kraze 食下午茶，由於重點係揾地方休息，只叫了一個 burger + 2 杯飲品。餐廳連我地得三枱客，order 時 menu 中好多種 burger，對漢堡冇咩研究既我倆叫左侍應妹妹推介既最受歡迎 KB漢堡後專心休息。等食時上網研究吓，先知呢間係韓式既漢堡包店，但我到食完都唔知同美式有咩分別～

無聊時見枱上巨型 Tabasco （平日都係 mini size)，隨手影吓 ：

Order 後約十分鐘先上飲品 ﹣ 兩杯咖啡，無論凍定熱都係冇咩味的，凍咖啡仲超甜

之後，K.B. Burger 出場，份量唔算特別大，材料好多同埋都新鮮，芝士有少少溶夾埋有肉汁既漢堡扒都 OK好味，但個包卻略硬。

坐了差唔多一個鐘，埋單好似 HKD150 左右，比 BLT 平，但又唔覺得值。我會寧願番 Triple O's or MOS Burger 食。

Movie: The Amazing Spider-Man 蜘蛛俠：驚世現身

蜘蛛俠身世之謎，由Spider-Man 高中時代講起，蜘蛛俠源起，貼身衣創作及演化歷程，包蘿萬有。傳聞系列重新出發只因之前三集既導演同 SONY 翻面，SONY 順勢重拍，片酬大減之餘仲可以走去 MARVEL 英雄滙風格，分分鐘下集 Avengers Alliance 就加入埋蜘蛛俠～

137 分鐘劇情相當緊湊，每個人物都好清楚同立體，就如 Peter 阿叔同阿嬸，就算成日玩佢既同學响知道 Peter 阿叔死左，態度都唔同晒，擺脫傳統美式學校小霸王既討厭形象。

另外，幾 like Lizard man & Spider man 向高中 library 打交時阿伯聽住歌完全唔知咩事咁～

Dislike 位：Peter Parker 幫阿叔報仇時無程程跌入個拳館，同聽個流氓話認得佢個樣咁就當係套衫既構思就好求其；點解去捕 Lizard man 要放部寫左 Peter 個名既相機响到？女主角個高層差人老豆明知去打怪獸，何解會一支公去打呢？全城點解會有咁多起吊機可以响同一條大街舖條路比 Spider man 行？Lizard man 造型好唔得，同埋... 如果可以揾對靚仔靚女做男女主角就好好多囉～

今次 IMAX 睇，畫面幾得，個人意見：一係睇 2D，一係 IMAX，唔好嘥精神同金錢去睇所謂既 3D版。

Movie: The Raven 神探愛倫坡：黑鴉兇殺案

上星期睇完龍舟又未夠鐘食飯，對腳自自然然走左去戲院，揀左呢套就快開場又有 OK 位，又未睇既戲.... 入場唔夠十分鐘，唔知係行得攰得滯定其他原因睇睇吓瞓著左.... 雖然瞓左十幾分鐘，但醒左之後都跟得上劇情...可想而知劇情有幾.. 慢！！

神探福爾摩斯類同之時代背景，但發生於美國，灰沉沉既畫面，文皺皺既對白，有關一個寫連環殺人小說作家愛倫坡筆下小說被變態殺手抄考，於現實世界中不停殺人，仲捉埋愛倫坡未婚妻去迫愛倫坡不停寫小說...

劇中不停有人被殺，但缺少張力，中尾段已經估倒誰是真兇，反而愛倫坡未婚妻未捉後困於地板下既支線唔錯。

八號風球後的天空

尋日搭船過海，由等船到落船不到二十分鐘 ﹣

1）行緊去碼頭，路上陽光譜照熱死人，但海上個天係黑色的，有幾分鐘猶疑過搭船會唔會有問題：

2）入左碼頭，狂風暴雨左幾分鐘，黑雲走了，對岸左邊海面上又見彩虹：

3）在船上：天空左右分明，一邊天晴；一邊烏雲

4）回望另一邊既天空，雲層聚得好低，厚厚既雲好靚～

亂寫完畢～