真實逃脫遊戲

網上版逃脫遊戲玩左不少，近日走左去玩真人版逃脫遊戲。尊重保密條款，唔會公開遊戲內容，只講玩後感。

今次玩既係 8 個人一齊玩既遊戲，場景都落本，認真製作，同時體會到咩叫人多手腳亂，人多意見多。重有既係好多提示比 APPNAVI 更離奇同夾硬，但同一班朋友一齊玩不失為一個有趣經驗... 個人都係比較鐘意網上版，自己估吓估吓... 冇計，宅女嘛～ 有機會都可以再去玩既，但冇上癮既感覺。

離開時有識員話：如果日日都咁多人玩就唔駛炒人啦.... 查實香港現時已經有好多間類似既密室逃脫遊戲，競爭都相當大，做落去都有相當難度呢～

西藏十日遊

拉薩，布達拉宮

今次跟團 （EGL），比左團費後開了茶會，大安旨意等出發。到機場，領隊提供最終行程表時，紙上既地名都幻化成文字，只知西藏大概位置，其餘林芝，日喀則同青海，完全聯想唔倒呢啲地方响中國地圖上邊一度，亦都冇打算去 google，反正有導遊領隊帶住嘛 ~

每日行程就唔多講了，重點如下：

1. 行李篇
由於高山地方温差大，紫外線超強，日間有太陽好熱，早晚冇太陽偏涼。部份行程上到海拔五千多尺雪山附近，茶會時旅行社代表已提醒團友們帶厚衫。基於以上因素，今次帶了個約三十寸既喼，三份一位置放了兩件厚衫，一件羽絨，厚薄外套各一件，加上少許食物，大量防晒... 本住跟團唔駛自己搬行李既偉大宗旨，有殺錯冇放過咩都拎，結果未出發個喼已爆 =.=

旅程完結，發現只有厚薄外套同防晒有用，大部份物資都得個拎字.... 好彩跟團上車落車唔駛搬！！

2. 食物篇
此團包晒早午晚三餐，本應唔駛理食呢一環。但開茶會時旅行社代表話佢自己剛帶團於西藏番來，據說全程冇啖好食，強烈建議團友帶乾糧，特別係唔食牛羊既朋友....

最後全程二十多餐，除左其中兩個早餐盒（太早出發，酒店未開始供應早餐）同一餐响青海湖既午餐之外，基本上都幾好的，好多餐都有魚有肉有菜，蔬菜都好甜好好味。就算拉薩至青海既通宵火車上晚餐同早餐都好冇問題。只係部份比較長既車程，沿路跟本冇食市，令餐與餐之間相隔時間有時頗長，團友們都會拎乾糧出來食吓咁。到了行程尾聲，唔少團友發現帶去既乾糧好多都冇食，最後都送比當地小朋友同尾程司機。

3. 保健篇（ 高山症）
高出症大概係大部份去西藏既人担心之重點。個人黎講總覺得去高山地區，真係有高山症都可以於當地吸氧氣或者買藥食，如果根本冇事做咩要食紅景天食成個星期先。於是決定零準備挑戰高山症。

今次行程香港去成都，再轉機去西藏小江林之稱之林芝，於二／三千海拔先適應兩日，再向拉薩出發。由林芝機場開始旅行社安排了於西藏地區都有隨團醫生跟團（今次仲係個靚仔醫生喔～），醫生隨身有個手指公咁大既小儀器可以測量血含氧量，上限 100，90﹣100 為好，80﹣90 為正常，80 以下越低越差。

於林芝第一日，旅行車一度駛上超過海拔三千米之地區，好幾個團友都覺得頭暈同心跳好快，我都唔例外。隨團醫生幫有關團友量過血氧量後建議部份團友可以食高山藥 ‘高原康’ （血壓正常先可以食），同行朋友都少少唔舒服，但由於佢血壓偏低，醫生建議佢食另一隻藥。兩隻藥都係早晚飽肚後各食1﹣2粒，一盒 RMB50（10 粒）。據醫生講呢啲藥可以幫助增加血氧量，而我同朋友食完都冇咩負作用，第二日開始就冇再出現高山反應徵狀。

4. 廁所篇
西藏基本上大部份地方都係比較原始，特別係廁所！除了部份靚既餐廳同酒店範圍內既廁所，其餘廁所基本上都係一條深坑，中間有度矮牆分格，冇門，冇沖水，冇水洗手，有既基本上只係臭味同烏蠅！重有係呢類原始廁所門口若果有人收錢都要比錢的，公價一蚊，冇人收既就唔駛比錢。十日以來，只有一個收費 RMB2 既中途舖廁所係冇臭味同埋可以稱為乾淨的.....

想去既話建議帶口罩或者頸圍巾，於門口準備好所有TISSUE 同錢，以 9 秒 9 速度完成離開！！

5. 購物篇
由於出發前冇做資料搜集，去到先發現唔知買咩手信好。唔知係咪呢個團唔算平團，冇咩購物行程。直到行程中間去大昭寺，外面有條八角街好多路邊小舖，向來唔叻講價，但為左唔好做大水魚，落車前問好導遊好幾個較多人買既手信如披肩，經輪，電話繩，肉干等等大概價錢，於有限時間內極速掃好比家人同事朋友既大部份手信！開價到成交可以講到25﹪ 就成交的... 好誇張...

買完小手信，唔好以為西藏有錢駛。十日行程只有兩個官方購物點，第一個藏藥院：聽完一輪講解，有駐場藏醫免費會診，有團友就咁留低幾次蚊買了幾個月藥。更多團友係買藥材，幾個太太團友表示藥材係幾好質素的，但價錢就唔算平。而最多團友响出口既書櫃買書... 幾十蚊本，主要關於西藏，佛教等主題....

第二個購物點係天珠同水晶.... 本團女團友眾多，大部份團友可能咁多日來冇咩買野，大家都滿載而歸。估唔到既係買天珠同水晶都可以講價.... 有團友以8 千多人民幣請左粒開價六萬多既火供天珠，據說係結緣價...

西藏出名藏豬同耗牛等肉干，依照導遊建議於酒店附近超市買就好了，唔駛拎咁遠，價錢差不多。品質比較好既係香格里拉牌子。

6. 防晒篇
紫外線的確好強，朋友揸了防晒，半日短袖衫都晒到兩截色。太陽眼鏡一定要有，唔係既話真係晒到打唔開雙眼。四眼既我出發前於戶外用品舖買了一副可以掛上眼鏡既太陽眼鏡，好方便喔～

7. 護膚篇
一個字，乾。日日敷一層厚厚的補濕 MASK，LOTION 揸身，未揸完 MASK 已經吸乾！乾到鼻好痛，酒店已經有放濕機，加埋兩杯水放床頭，濕毛巾放房都唔得。

8. 觀光篇
西藏主要睇風景，個天藍到你唔信，翠綠或者藍色既湖水，冇人工化，大量幾千年歷史既寺廟，每粒磚瓦都有一個故事... 西藏人對信仰既堅持，獨特既衣著都極之誘人。

由西藏回歸差唔多兩星期，影左二千多張相尚未有心機整理，快速睇左兩次懷緬一番，所有相仍然冬眠於電腦中。總括黎講係不枉此行，全程都好開心，風景好靚。可能過多幾年去已經見唔番呢個原始既西藏。

今次好好彩有個講故事超好聽既導遊，佢對每個寺廟，每個地方都熟到不能再熟，由佢身上體會到咩叫敬業樂業。團友八倒佢今年年尾會結緍了，送上無限祝福～

Movie: 超人：鋼鐵英雄 Man of Steel

向來唔鐘意超人，一直唔明何解戴副眼鏡又冇人認得出佢係超人；又唔明點解佢成日响個袋放咁大套超人衫，難到個袋冇其他野放？點解去電話亭換衫呢？透明架喎！何解要將條紅色底底著响外面呢？而且換完衫個髮型都唔同埋既？ 好的，睇故唔好駁故... 

今日入場主要因為天氣太熱唔知做咩好，再睇戲去也，反而... OK 喎！

今個超人癲覆一向模式，由出世於外星球講起，劇情將一切變得合理化～ 超人依然靚仔，仲冇左條紅色底底著响外面；劇中奸角將軍好搶，臨死前既一段讀白好得... 好悲....

 最後想話，點解睇睇好似變左睇龍珠真人版咁既？原地超飛既氣場，空中分段打斗同加速.... 冇錯我呢個宅女細過連龍珠都煲的 :P

西藏行準備篇

西藏，唔少人如我總覺得一世人總想去一次，亦有唔少人覺得攞苦黎苦。難得近日同舊友飯聚一拍即合，決定同遊西藏。

年紀大唔想煩，決定跟團去也。團已報，旅行社確定人數已夠可準時出發，但逐漸發現雖然跟團都要準備唔少物資咁既..... 死火....

旺角街頭

好少出旺角，出去買 XBOX GAME 時發現成條西洋菜街除了電訊同上網公司滿佈外，而家尚有唔少即影 Polarid, 小賣攤檔同街頭表演，短短幾條街各自各精彩呢～

Shoe Dictionary

鐘意買鞋，大概知唔同鞋款有唔同叫法，但唔知會有幾十個叫法，唔係 Shoe 咁簡單... 我只識入面唔到一半呢...

轉發自 facebook:

Electrolux ZTI7635 吸塵機

長期處於鼻敏感同皮膚敏感，真係好煩。早期上網 research 過，台灣好多人介紹用吸塵機吸走床上所有塵蟎，有助減輕各類敏感，雖然唔知對自己有冇效，但當見倒一個一個有關吸塵蟎既吸塵機開箱文，當中大量白色類似香爐灰既物體.... 真係好嘔心... 據說呢啲除左係灰塵就係塵蟎，塵蟎屍體同糞便....

行過幾間豐澤同百老滙，售貨員都只推介 dyson, 係好勁，好型，好靜，但都好貴。$5-7K 一部... 吸塵機，真係唔捨得... 雖然有幾分鐘心動過。

台灣有個團購網 （486 大丈用週記）用各種儀器測試唔同類型電器 （包括吸塵機），又真係好有吸引力。可惜佢响台灣做團購，冇理由香港隔山買牛，運費都唔平，最重要係型號不適用於香港呢，但感覺 Electrolux 呢個牌子應該 OK。

瘋狂做左幾日research，決定買部機有 HEPA過濾，唔駛塵袋（可水洗）即可。本身鎖定 Electrolux ZUA3841 model, price.com.hk 格價後約 $24XX 一部，但有關既售賣商舖唔太有信心... 諗住去 SOGO 睇吓實物，售貨員姐姐表示呢個 model 冇現貨，要訂，＄32XX，若要床褥專用既吸塵扒再另加 ＄5XX... well... 一直以為床褥吸塵扒都係隨機送的，加埋要 ＄4000 咁滯，不如買 dyson！售貨員姨姨話：其實係吸塵機都可以吸塵蟎架，不如買另一款做推廣中之 Samsung 機, $7XX 送埋床褥吸塵扒，平時唔送的。但覺得 Samsung 既話我都係支持佢既電視好啲... 加上 Samsung 部機冇 HEPA。

記起上網時有人話永安電器部姨姨好好，既中肯又唔 hardsell, 於是去永安網站睇吓有冇 ZUA3841 呢個型號，發現另一部 Electrolux 既機做特價中，research 過佢都可以吸塵蟎，雖然吸力冇 ZUA3841 咁大，但係送晒所有吸頭（連床褥吸塵扒)！ Promotion 只限 6 月，於是第二日就去買了，可惜門市冇現貨，訂了，等送，希望有用啦～

http://www.wingonet.com/products/detail/9664/9664/1/pcategory:100/lang:zh_hk

K11

尖沙咀近年好多新商場，包括 iSquare, The One 等，其中最鍾意行 K11。當然，與眾多商場冇分別，都係大型連鎖店為主，但商場既設置好人性化，好似頂層有十數張枱櫈比人座之餘仲有各式免費充電器。

休息夠了，商場地面經場有唔同 FUNCTION， 上周六就有 LIVE BAND 表演，仲有免費 Red Bull 飲呢～ 氣氛好輕鬆，商場職員個個打扮又 IN 又醒神，最重要係好多個都笑容滿面，難得有誠意既商場～

同場加映：之前心動過既 DYSON 吸塵機於 K11 做 PROMOTION， 見人試機，部機真係幾型仔呢....

新寵： XBOX 360 + KINECT

近日得閒就開始身痕想買野，近日戰利品之一： XBOX 260 + Kinect 250GB版。

查實數年前 XBOX KINECT 剛出已經想入手，尤其睇中個 型可秀 GAME，奈何當年尚在悠長假期中，拎套野番屋企肯定比母親大人哦足 7 日7 夜，所以冇買到。直至上個周末行經沙田一田，有 counter 做 promotion，又勾番起條筋，問左價錢，＄3099 送四個 GAME， 但由於耐冇做 research 唔知市價，又驚買左番去唔玩，於是冇買就走了。翌日，路過豐澤 ﹣ 現貨只有 4GB同送一個 GAME，但都 ＄2499 ；吉之島 ﹣ 直頭冇貨 ； HMV ﹣ 有 250GB， 但最多送 2 個 GAME.... 越行越覺得一田套機好抵... 於是.... 山長水又遠又死番去沙田買機～

番到屋企即晚裝好，試玩，一手一腳搞掂晒，開心又滿足～ 我都知 play station 出新 game 後 XBOX 都好快又出新版，但呢套機對我黎講都係新野，有排玩，況且不停追又追倒幾多新機丫～

後記：當日跟機送 4 隻 GAME 都冇我當初想要既 “型可秀”，一田買機時售貨員都話冇現貨，訂都唔知幾時有同會唔會有，有都要 ＄2XX，建議我 ONLINE 買，好似 ＄119。早幾日出旺角，去先達，當年玩緊 PSP 時經常去既 GAME 舖已經變晒電話舖，唯有去信和睇吓。點知有個紙袋裝既 “型可秀2”，仲要係 ＄69 ！好抵。於信和再睇幾間遊戲 GAME 舖，賣 ＄99 又有，要訂貨都有，心諗好彩唔係撞左入間最貴既先。回家試完，OK 冇問題，yeah~~

iphone apps: Snapseed

近期愛上了用 Snapseed 將 iphone 影既相轉 tune, 易玩易用呢～ 靚唔靚好主觀，享受個過程就好了～ 有冇其他好玩影相 apps 介紹？ Let's share~

Download link: https://itunes.apple.com/hk/app/snapseed/id439438619?mt=8

再遊大澳

難得涼爽既端午節，瞓醒，朋友提議去大澳。原來上一次去已經係 5 年前了，當真時日如飛... 搞一大輪去到已經下午兩點多，唔知係咪因為端午節，好多食市都休息了，撞入了一間兩邊門其中一邊掛了‘休息’ 牌但店中好似仲有人食野既冰室門口，侍應話：要食就快，今日就收爐... 極速坐低食個每人差唔多五十蚊既快餐後，番左出入口遊船河，全因賣飛阿姐話：今日潮脹，有海豚睇！！

二十蚊一個人，朋友潑冷水話：佢話有啫，出去冇架勒.... 結果.... 十分鐘左右船程，我見倒 2 次，冷水朋友見倒 5 次！！！ 由於海豚一閃即過，掛住睇冇影相，只於大澳街頭偷影了一張相留諗。據說佢就係中華白海豚，粉紅色的好可愛喔 ～～

開心睇完海豚，見路邊在賣超大尤魚，＄35/ 杯，但得幾粒，食就冇食，總覺得咁大既生物已經有靈性....

行行重行行，於棚屋中穿梭瀏灠，輕輕鬆鬆。由於到大澳太晏了，龍舟比賽已完，但隨處可見唔同龍舟 TEAM 既旗飄揚 ； 扒完龍舟既居民，互相問：你第幾呀；番黎探 XX 呀？食唔食埋飯先走呀；於渡橋上尚見兩個色彩繽紛既龍頭；於碼頭上鐵皮屋尚有一大班人响到食飯飲酒唱懷舊金曲 K，感覺成個端什節好 WARM 呢～

離開是巴士番到東涌，遇見日落，冇影相，用眼用心記住了～開心愉快既一日！

夏天來了！！！

年度最憎既夏天鬼鬼崇崇就到左，好似濕立立既回南天今天冇黎過咁，一黎就成三十幾度，想點呀！熱到好似個人就黎溶，就黎暈咁... 咁熱去露營唔知會唔會熱死呢？身痕想去添....

Movie: Iron Man 3

大概鍾意睇戲既都已經睇左，只想講 Tony Stark 呢個角色係為 Robert Downey, Jr. 度身訂做，第二個做都唔會咁好睇。

另外，世界確實唔公平的， Robert Downey 越做越型， Gwyneth Paltrow 越來越殘了... 

最後，由於睇 7 點幾場次，睇到 9 點幾，太肚餓，再多冇睇個 hidden track 就走了... 有人可以講番比我知嗎.... please.... 

Movie: 狂野時速 6

不知不覺狂野時速做到第 6 集，只記得第 5 集最後兩架車偷走個巨型夾萬，仲因為咁我嗰期狂玩一個有關既 iphone game，但1 至4 集嘛....應該有睇，但堅唔記得晒講咩.... 

今集入場，其實咩都唔記得晒，故事一路做先稍為有少少記憶，但仍然鍾意睇飛車部份，最後一段有少少誇，亦明顯為第 7 集舖路～

Movie: 嚇鬼亞嫂

近年泰國間中都出鬼片，質數一般，總覺得笑片成份居多。去到戲院見時間幾啱，再次支持泰國鬼片去～

不出所料笑片成份唔少，但結局出其有唔少感動位，故事都有頭有尾，OK 喎，比預期中好。但係... 唔知點解戲中人個個啲牙都好黑的... 

出差後在公司渡過的一天

出差十多日，雖然休息左一個周末，精神同肉體依然處於行屍走肉狀態，魂魄好似尚未歸位。一早起身唔記得晒 CREAM 同防晒放左响邊；番到公司先發現唔記得帶公司咭；公司電腦唔記得 login password ; 臨出發時唔記得揾人幫手淋“草”，枱上唯一植物尚幸未死。反正感覺諸事不順，決定過一個唔用腦既星期一：瘋狂清垃圾～

多月來積聚出來超多文件同雜物，塞滿一個又一個垃圾桶，感覺好爽，就好似自己個腦都在同時清空中。與此同時，揾番多月前買落又未睇過既雜誌，加上一份又一份買雜誌送既記念品，決定拎番屋企當新書慢慢睇。

執到差唔多，LOGIN 一下久違既 MSN，一直以為已經唔可以用，點知尚有大量朋友 LOGIN 中，紛紛彈出黎話好耐冇見我上線，所以逐一聚舊一番，互相 update 近況，吹吹水。時間飛逝，轉眼夠鐘放工，久違了天未黑就番到屋企既感覺，打從心底感恩～

非人生活

出差歸來，離港十幾日，連續做足10﹣12 個鐘，每日都揹住做NOTEBOOK 同一大叠文件不停走來走去，電話費都打左成千蚊，番到屋企感覺個人散晒，精神體力都嚴重透支，把聲都沙晒。

以前成日出差，訓練出極出完成 PACK 行李，但至今都極之討厭要番黎要清喼呢個動作，特別係攰到死左既時候。尋晚唔到 9 點就去左瞓，但今朝七點唔夠就自動醒左，大概因為出差咁多日都係要七點起身，証明個人仲未完全放鬆。

整體黎講，忙左咁多個月，完左場 SHOW，感覺雖然好 X 攰，但都幾滿足，亦表示黎緊我可以享受大半年既悠閒生活了～

iphone Game: Candy Crush

相信唔駛講咩係 candy crush, 已完成電腦版  350 關，可以話 hea 住過，得閒玩幾舖。尤記得過年時家人拜年，人人一機在手，四出互 ADD FACEBOOK， 只想攞多幾條命是也。最攪笑係人人比部機我想我幫佢過關... 最堅既係老中青三代齊齊玩，頓時覺得一個遊戲拉近大家既距離，促進感情。

Candy Crush 過關，個人感覺關鍵在於三分運氣，三分時間，兩分朋友同兩分技巧。只要不停玩，總會過倒關，所以搭車見人玩，行路見人玩，番工都見人玩，總之日日周圍都見人玩。一聽倒個背景音樂聲自然好似機癮發作咁有啲想開機去打。家中老媽拎住部 IPAD 日玩夜玩，兩個半鐘五條命玩一次，中途去煲劇，仲識問人拎命，押車飛過關，有命再繼續玩，誠心佩服！

你今日玩左未？

Dor's Back~

好耐冇寫 blog 了，原因只有兩個：忙，懶！

公事上好忙，keep 住 OT，大慨要到 5 月底先可以告一段落 ; 番屋企精神上減壓法 ：candy crush! 自己玩到 345 關，間中仲要忙上癮既媽媽過關。

依然 keep 住睇戲，今日睇完 “攻完 2077"，個結局都 OK，有少少拖長黎做，依然大 Tom Cruise 主義。仲有浪費左個戲情既 Mama, 超拖時間既 “白宮淪陷"，比較適合小朋友既 “魔境仙踪”，OK 既黄秋生版 “葉問”，好配合近來世界政局既  "GI Joe II"， 同近期比較鍾意睇既係 ‘北京遇上西雅圖”， like 戲里戲外既湯唯，仲有幾套但唔記得戲名了...

呢幾個月都去左幾次露營，入門版嗰隻，‘傢餐’ 越買越多... 大鑊...

停寫 blog 既同時，都好耐冇玩 gotmail escape game。仲有冇人 keep 住玩緊？有冇邊個好正我又 miss 左既呢？ 近期有咩發生？

PS: 阿澤，thanks for your email, 係你呢個 email 提醒我好耐冇寫 blog 呢：P 關於旺角既 real escape game，我呢期勁忙，冇時間去玩，你有冇去玩?

Movie: Les Miserable 孤星淚

據說成套戲係現場收音，現場鋼琴依照情劇速度伴奏，戲中既演員都意料之外地唱得好，但相對於現場睇 musical 版缺少了一份震撼。

Hugh Jackman 好稱職；Anna Hathaway 戲份唔多但好搶眼，抵佢拎金球奬最佳女配角；主教二十多年前據說係做過 Valjean 呢個角色；唔太鐘意少女版 Cosette, 反而旅店太子女少女版極為討好，又唱得好 （據說佢本人係 musical 版都有唱過呢個角色）

Youtube 中有全套 musical 版，有時間睇兩個幾鐘既不妨一看，我自己某幾個場口都聽到毛管戙！最尾段集合十幾個全世界十多唔同國家既 Valjean 合唱，幾有意思～

Movie: 一代宗師

向來都睇唔明王家衞電影，但又幾鐘意梁朝偉既戲，奈何王家衞又鐘意拍梁朝偉，結果王大導既戲都睇晒咁滯，發現今次一代宗師算係咁多部王家衞電影中相當淺白易明既一套，亦保持了優美畫面同，打燈都打到個個好靚。

要睇硬橋硬馬我要打十個既相信最好番去睇宇宙最強，一代宗師似乎以 ‘葉問’ 為主，無可否認梁朝偉依然有一套獨特吸引力，但不其然都發現主線去左宮家，加上插入 '一線天' 角色，感覺係一代宗師講既係各家各派之一代宗師而非只講葉問。

响來對章子怡冇咩好感，但戲中既佢確係有份霸戲，打交場面亦交足功課。

大概全套戲拍左幾年，太多片响手，好都片都被剪走；可能宋慧喬戲份本來好多的，但戲院版的她大概出場總數唔夠十分鐘，花瓶角色，任何人做其實都冇所謂；張震飾演八極拳高手 "一線天" 唔太明佢既出場意義。

最後.... 功夫只有兩個字：一直一横... 點解我數極都係四個字既？

多氏煲劇周sss: 步步驚心, 我可能不會愛你

好多日冇番呢個 blog，荒廢左好耐，大概都差唔多發霉了。幾個星期冇玩 escape game，沉迷煲劇中～

煲左﹣
1. 步步驚心: 2011年大陸劇，唔好話我 out, 劇情話一個現代女仔意外回到清朝，去到八爺的家，之後入宮到死既古仔。熟知歷史既佢知道同佢日漸熟絡既各個皇子之將來，反而令佢一步一驚心，想幫佢地唔好跌去一個黑暗既結局... 結果... 發現自己係始作俑者...  個人偏好佢初時開心過日子既劇情，中後成日喊喊喊，我就不停  fast forward。劇中好多靚仔，包括不老的八爺鄭嘉穎，四爺吳奇隆，爽朗既十三爺，以及後期我最順眼既十四爺。順帶一提，女主角最好一直做古裝，佢現代個樣真係好趕客

2. 我可能不會愛你：台劇，林依晨 （程又青 ）+ 陳柏霖（李大人），由中學開始相識的 '好朋友'，由死對頭到最後既知心好友。大概雙方都在意李大人曾經講過：我不太可能會愛你，因為他家中已經有兩個公主要佢服侍，佢估自己接受唔倒第三個又青公主。或許真相係大家太珍惜對方，唔想冒險將友情變質，結果都要透過大家既 '現任' 令呢兩隻舵鳥醒覺。劇中兩個配角: Maggie & Nic 都好 cute 又 靚仔靚女耶。鐘意又青爽直既性格，李大人既温柔細心，特別係倆口子劇中既默契睇到好窩心喔～