AppNavi: The Cage of Envy (Free)

臨出差前OT 不斷，剛先番到屋企，遊戲都未 Download.... GinSon 再次出手相助提供攻略，enjoy the gam~

誠徵義工攻略打手 （24/2-10/3/2012)

由於24/2-10/3 將離港工作，唔會得閒打機兼寫攻略，當中應該有兩個免費 game 會出， 有冇人有興趣代寫攻略？ 

諗緊係每星期請兩位朋友寫，兩星期夾埋應該一共會有四篇攻略，寫完 email 比我，我 post 晒出黎，等大家投票出最好的一個：

奬品 AppNavi 價值 USD1.99 paid game 一個，得奬者自行選擇遊戲

＊＊注意：會經 itunes 送 game, 但唔肯定 jailbreak 左既機會唔會有問題而收唔倒，收唔倒恕不負責

冇人回應既當我冇講過，建議作廢，只有一個人參加既自動當選，四個參加名額先到先得，以留言於此文先後為準。 

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

名額狀況更新：

29/2 （即二月最後一個星期的AppNavi 免費遊戲） 1) Shadow  2) ________

7/3 (即三月第一人個星期的 AppNavi 免費遊戲）     1) GinSon   2) ________

my email address: dorstalk@gmail.com

Thank You~~~~ 

AppNavi: Led by a Cat 被貓咪所引誘 (Free)

主角半夜番屋企，被仔貓引左去個公園仔後被困... 好似係第一個戶外場景之遊戲...

頗為覆雜的一個，公事包個鎖好死煩！！！

Google Valentine's Video (2012)

到 google search page, search box 上有個小小應節窩心 video, enjoy~

中銀擠提？！

我家附近有間中國銀行，尋晚已經見一條長長的人龍，好多人用報紙雜紙＋櫈仔放地上‘扮’排隊... 到左今朝，據聞人龍以幾何級數增長了....番公司睇新聞先知條龍係為左換新鈔票...

今日放工，見人龍再現，但由一條一人瘦小人龍變左做一條濶成十個八個人既加大碼肥龍。隨住排隊人數增加，警方亦加入大量人手維持跌序，仲用左無數膠紙圍住人龍，企圖阻止插隊。可惜，區區數十個警察又點敵得過幾千市民呢，你左邊鬧完唔好打尖，右邊又嘈：嘩，打尖呀... 再黎警察點名叫：你，你，你，幾點開始排呀，我頭先行過都唔見你，打尖呀？.... 嘈吵聲漫罵聲始起彼落，實情係一個人排開隊，朋友鄰居行過，一拖三，三拖九，條人龍以病毒擴散般的速度極速增肥，你話人地打尖咩，好老實，我敢講90﹪既人都係痴人條隊黎排，得啲老人家本身係一早自己排開，因為我尋晚見倒真正排隊既九成都係老人家。

其中一個警察，便裝，態度奇差，指住一班人話：排隊買錢，個個都痴痴地，賺得幾多錢呀，你地自己唔駛瞓搞到咁多警察陪你地唔瞓... 老老實實，比你地排唔代表排倒，等陣發現排到冇‘丑’你地唔好嘈呀... 之後指住個婆婆話：尤其係你呀，幾十歲人咁大年紀就番去瞓啦，排咩隊呀你....

我都明警察們可能做到發忟𢛵，但點都唔應該咁話個老人家囉！！阿 SIR， 你用吓腦唸，佢咁排一日分分鐘好過執一個月紙皮呀，做差人做到你痴左？！

仲有，呢啲係咪歧視先，排幾千蚊 iphone 我就冇聽聞過咁亂同會咁比警察鬧，歸根究抵，係中銀都冇諗過會咁多人排隊，冇好好安排，先搞到秩序咁差，排隊者何罪之有.... 除左有心尖既一群！

SOREL Women's Tivoli Rain

舊年已經想買對水鞋，一直睇都係 Hunter 同 Aigle之間，但又唔想買太水鞋款，萬一著出街又好天，咁會又局腳又怪樣... 

今日行尖沙咀 SOGO，本來冇諗住買野，但行過 SOREL counter 見 'upto 50﹪ off' .....SOREL 係加拿大牌子，主打雪靴，超過100年歷史既老牌子，品質有保證（雖然都係越南製 ：P）為左達到雪靴要求，基本上都防水潑，鞋底防滑耐磨，其實佢好多款有毛毛同絨，真係有保暖效果，但我已經有對 rubberduck, 所以揀左對冇保暖設定既款，夏天一於當佢水靴著：

http://www.sorel.tw/on/demandware.store/Sites-Sorel_INT-Site/default/Product-Show?pid=NL1691

呢款仲有紅，黄，藍等顏色，我買呢對原價 HKD1400，折後 HKD749。其他尚有十多款做緊 五至七折，真係好抵。

SOREL official website: http://www.sorel.com/

AppNavi: 秘密裏屋敷 （2012年1月31至2月22日 期間限定）- 下篇 之 攻略

密碼頗多，唔係純日文既相信唔太難玩，但玩到攻略中既第 15 點，自己有盲點，死數錯角既數目... 冇得唔認數學白痴 >.<

遊戲再次有好壞結局：

壞結局：從書枱後的窗逃出

好結局：粉紅掛畫左方多了條白繩，按下繩，從屋頂逃出

PS: 多謝Alex 幫我解迷..... ^.^

AppNavi: 秘密裏屋敷 （2012年1月31至2月22日 期間限定）- 上篇 之 另一遊戲下載

‘

純日文遊戲，目的係要人先 download 另一日文 apps " RaremetalWar ". Download link: http://itunes.apple.com/hk/app/the-raremetal-war/id491265914?mt=8

據說，期間限定結束後，成功完成者可有 1000 points rewards.... 

如果唔識日文，下載呢個遊戲本身已經好有挑戰性，因為自己都唔識日文，靠中間既漢字估估吓... Next 完一輪，入完玩家名，第二版面有上下兩個欄位，下格係入邀請 ID， 方便既話，邀請 ID 請入我呢個 ucv4cUCO（因為我想睇吓係咪 1000 分係呢遊戲 referral 出黎）。完成登記，按左下角畫面，見中間出現一組橙色密碼：

拎完密碼（RaremetalWar 可以刪除），番 AppNavi 首頁，落到最底，見右下角橙色框  'New Point Page'，click 入：

如果之前未於 'My Page' 設定 'email' 同 ‘密碼’，要先輸入，方可進入以下版面。再點 ’Promotions':

於 'Code' 欄位輸入 RaremetalWar 中取得的一組橙色密碼：

完成，可以正式開始玩。唔做完呢組步驟，秘密屋裏敷中就會不停 hang 機不能繼續進行遊戲。所以乖乖地先做功課啦...  

完成了，攻略見下篇～

利時商場 之 百物騰貴？

利時係我既最密 shopping 地點，初時十年八年前去既時候商場內好多獨特小店，但到左今時今日唔少都變左‘阿徐舖’，但呢個 style 又有幾多人 carry 倒呢... 而家去到，都係有目標地去某幾間相熟小舖，朋友形容為‘巡舖’。

話說，今日悶悶地又走左去，入左一間平時少入既舖，拎左一件黑色外套望，店員馬上上前介紹：呢件好抵，今日先做特價。我好奇一問：咁即係幾錢？店員回覆：一六八零，日本番架....（下刪數十字介紹）我聽完，呆幾秒再確定問多次：一六八零？店員答：係呀，啱既平多少少比你啦。

聽完，再摸摸同睇吓件衫，拒絕熱心店員試衫建議，走了。故事重點：件衫唔係大牌子或名牌子，質地一般，黑色一件簿身外套，冇款，冇特別，可能係我唔識欣賞，但响商場中一件外套賣到呢個價錢，我好想知係咪真係賣得出...

Shopping 覺得一件野抵唔抵好多因素，今時今日相信唔會有人因為冇衫著先去買，睇款，睇價錢，睇心情，睇 sales 態度之餘，個人會考慮地點。呢件衫放响連卡佛或者 I.T. 之類既地方，可能行既人覺得太平唔會睇，但係放响利時，咩人會買？真係好迷。

之前一次，睇倒件衫簿身米色上衣，店員表示件衫 HKD298，覺得 OK，但冇意欲買，放低，走了。幾日後，金百利，遇見100﹪一樣的衫，好奇睇吓幾錢，答案係 HKD499... 相似事件無數次，金百利同利時差唔多既 style 衫情況下，普遍都貴過利時好多.... 同樣推理下，件 一六八零去到金百利咪分分鐘過二千？

AppNavi: The Hidden Truth 被封鎖的真相 (Free)

主角去被殺的刑警爸爸房間想調查爸爸被殺的線索，當然，門再次被關上了.......

遊戲提示同謎都算正常，唔難揾答案，但有BUG， 中途幾次 items 都不停閃唔郁，要完全關閉遊戲重開先可繼續.

再次有好壞結局 ﹣

壞結局：取鎖匙後於和風小門出去，趕住走去報警，證據不足，警察不受理
好結局：取鎖匙後，點玩具車，睇完長篇故仔，去第一場景小枱上睇多次張相，認出是爸爸的伙計，出門就見他，一切皆由他設計，想主角知道爸爸被殺真相

總統商場

曾經有一段時間成日都去銅鑼灣總統商場，入面有間賣貓貓精品既小舖，幾間寵物用品舖，好多銀器手飾舖，修甲舖，數間假髮店，時裝舖（但冇行過），同好出名買 bra 要排幾個鐘既 “蔡太” 內衣舖。幾個月前去過，已經淨底幾間舖，好似被田生收購晒，今晚再路過，整個商場都結束了....

今時今日小場商買少見少，個個商場都好似倒模，場內舖頭大同小異，總統商場呢種‘小舖林立’既商場大概就快絕種....

冇記錯的話，全港第一間莎莎就响總統商場呢～

iphone game: The Lost City (USD0.99)

前幾日完成了 The Secret of Grisly Manor 後，今朝買左同公司既出品 The Lost City.

故事內容：著明考古學家嫲嫲在主角小時經常跟他提及歷險故事，其中有一個有關迷失古城，據說迷城內的人能改變四季時節。原來嫲嫲年青時真的去過迷城，更從取走了一塊石頭，數十年後的今日，年老的嫲嫲想主角代她去古城歸還有神秘力量之石頭，於是，乖孫主角搭上歷險旅程。

依然有靚畫面，數十個場景，音效唔錯，亦係我鐘情之 puzzle + 推理遊戲，一步步解迷。遊戲一開始主角已抵達迷城，用住遊戲中提供既地圖加上提線，唔難玩，但路痴可能會頭暈：P 總括黎講USD0.99 好抵玩... 相對於 AppNavi USD1.99 既遊戲～

Download link: http://itunes.apple.com/hk/app/the-lost-city/id414835676?mt=8

Movie: Chronicle 奪命異能

三個主角偶然機會下得到異能， 可以隔空控制物件移動，甚至可以飛。起初貪得意練習異能，後來發現能力越來越大，其中一個長期比亞爸虐打加上極度自卑既主角 Andrew 到最後失控了，反被異能控制，錯手殺左另一異能朋友 Stephen, 最後大鬧西雅圖，異能表哥無奈出手殺左佢...

成套戲既特技其實唔錯，用異能整估人都好笑，但因為劇情中好大部份係由 Andrew 第一身拎住部機拍住咁交待劇情，好多位都睇到好暈，尤其係山洞內一段... 睇得好辛苦。總括黎講，睇 trailer 好睇過去戲院睇.... 因為我覺得好睇既片段都基本上trailer 出晒

iphone game: The Secret of Grisly Manor (限時免費）

限時免費遊戲，畫面靚，聲效各方面都唔錯，有Antrim Escape 系列既影子，遊戲稍短，但線索及提示相當明顯，唔難玩的一個遊戲。

天才發現家爺爺突然神秘失踪，主角收到一個由爺爺寄出的信叫主角去找他，破解一系列謎之後得知爺爺秘密...


Download link: http://itunes.apple.com/hk/app/the-secret-of-grisly-manor/id384282298?mt=8

                     

真實逃脫遊戲 in Taiwan

甘米撈撈 tag 左我 facebook 個 post, 張 poster 幾吸引喎～

重有好多世界各地真實逃脫既資料，可以睇睇呢到：

http://www.facebook.com/realescape.tw

http://www.plurk.com/realescape_tw

http://www.comma9comma.com/realescape/

如果香港有既話，唔知又有冇人會去玩呢？

iphone game: 逃出速 8 酒店 - 车內逃脫 3 外传 (Free)

剛剛 itune 睇有個 ‘逃’字既遊戲，原來係車內逃脫系之一，幾分鐘玩完.... 無聊可以一‘逃’

Download link: http://itunes.apple.com/hk/app/tao-chu-su8jiu-dian-che-nei/id495538244?mt=8

逃出重點：
﹣去廁所用風筒吹乾電筒柄
﹣組合電話數據線，機身，電話機身至聽筒的線，聽筒，再打去 room service
﹣拎水煲去廁所裝水，再去書枱煲水
﹣垃圾桶拎提示紙，再點熱水煲....

AppNavi: On the Brink of Death 死亡的深淵 (300 分）

修車技工主角被困於滿佈天拿水的密室，為保命一定要逃...

一直以來儲左六千幾分，終於可以用勒... 三百分換一個, yeah~

呢個遊戲越來越煩，迫人整好個抽氣扇先，天拿水啫，聞吓都唔會死啦，又唔係漏煤氣.... 同埋，個死人鏍絲批好難先用倒想用的一枝....