鹽來鹽去.....

前兩日去左順德吃喝玩樂加揼骨，原本三個鐘既車程，由於中途有架大貨車車上貨品散晒咁跌左响路上，搞到大塞車，結果成四個鐘先番到黎。

番到香港，急不及待上網睇吓有咩新資訊，一上 facebook 好多人話 ‘搶鹽’，但冇講內容，真係睇到頭都大埋。番到屋企，媽咪就話，今日去超市買廁紙，見啲鹽，豉油，連雞粉同蠔油都比人搶晒，好誇張。呢個世界啲人真係鍾意危言聳聽，有人話鹽可以防輻射，又有人話遲啲啲鹽會受污染。啲衰人又鐘意揾埋呢啲災難財，超乞人憎。搞到啲公公婆婆見人搶佢又搶，幾蚊包鹽變左比多十賠錢先買倒.... 離晒譜。

但好鍾意 ‘盲搶鹽’ 呢個名，食字食得好正 ～

311 日本地震

尋日下晝出街睇戲，臨出門口見有線電視講日本地震，本來諗住日本地震都唔係新鮮事，間中都震架啦，所以冇咩睇詳細內容就出街了。但係番到屋企後，睇倒電視有關日本地震既畫面完全好似拍末日片一樣，真係好心噏....

一向好鍾意去日本旅行，特別係北海道，本來打算呢幾個月去多次，但今次既情況，恐怕今年內都唔駛去。

新聞片不斷更新，更多關於今次地震既 video 同相出現，不得不佩服日本人既文族性。地震教育好好，地震後日本人十分有秩序，冇亂，冇嘈，冇趁亂搶劫。微博資料，話日本而家所有便利店食水免費派發。有線新聞話今日一早，日本既民眾好安靜咁等便利店同超市重開.... 唔係黑心, 如果今次地震唔係响日本而响中國或者其他地方，傷亡數字肯定比而家嚴重好多好多。

衷心希望日本早日恢復元氣，死難者早日安息。God bless Japan~

可愛朋友

身邊有位自細玩大既朋友，佢同我同年，都年過三十，但思想有著一份不合符佢年紀既天真同可愛，暫稱佢為 ‘A’ 小姐，好多時同佢講野都令我 ‘O' 晒咀。以下係近期佳作：

1. 'A' 小姐對政府派六千蚊既回應：萬一打仗香港咪冇錢養軍隊囉
我答：香港唔會有軍隊，只有駐港解放軍
'A' 小姐：但係世界末日政府咪冇錢將香港人移民太空囉... 

2. ‘A’ 小姐：報紙賣 ipod 第二代咩黎？
我答：係 ipad 第二代， 唔係 ipod，你睇報紙或者上網 search 啦
‘A’ 小姐再問：哦， 咁ipad 可以上網嗎？點上網？
我答：用 wifi 或者上台比月費
‘A’ 小姐： 咁咩叫 wifi？ 佢係個實體定個網絡供應商既名？如果我冇買wifi 又唔想比月費上網咁點上網？ 我可以插我張電話咭入去上網嗎？
我答：你個幾十蚊電話月費包上網？就算包你過用量都要另外比錢
‘A’ 小姐：唔知呀，但公司電腦都係插線上網，咁打倒電話都上得網啦...
我答：你公司部電腦插既係 lan 線唔係電話線
‘A’ 小姐：是但啦，咁即係我用屋企條電話線插入去佢就上倒網？
我答：唔得... 唔同既線。其實你買左 ipad 定諗住買？
‘A’ 小姐：唔係呀，我唔會買
我答：咁你問咁多做咩
‘A’ 小姐：冇呀，好奇問吓....咁即係咩叫wifi？
我：.......

3. 身為基督徒既佢，每個月都會比錢教會，佢話：我比越多教會，神收倒越多，咁神比番我既野越多
我答：你當買保險，買大啲死左賠多啲？
'A' 小姐回應： 係架，你都快啲開始供啦 （信教），就黎世界末日架勒

4. 背景資料：某次陪 'A' 小姐買左啲化粧品，其中一個係揸眼蓋位令膚色均暈啲同 eye shadow 貼啲。
'A' 小姐：個眼膏都唔遮瑕
我答：佢唔係遮瑕膏
'A' 小姐：咁佢個色同遮瑕膏差唔多咪應該遮倒瑕，我嗰日試都遮倒眼袋同斑
我答：唔係，佢嗰日係用另一個遮瑕膏同你做底色遮瑕，個 BA 問你駛唔駛買埋，你話屋企有冇買
'A' 小姐：咁又係，我屋企有幾個遮瑕膏
我答：咁你唔用嗰啲遮瑕膏遮瑕，又去用嗰個眼膏遮？即係你唔可以用個筲箕去裝水，都唔係比你咁用
'A' 小姐：咁好啦.... 但佢個色真係玉色，點解唔可以遮理瑕...
對答再次重覆。。。。

以上對答每日不停重覆中，有時都幾好笑，但有時都比佢激死....

六千蚊

近期無論 facebook, 報紙，微博都不停有人講呢六千蚊點用... 好似捐左佢，話夾埋買番條東西隧，去旅行，買衫買野買 ipad, 又有冇得分既新移民話比人岐視因為佢地冇得分... 

其實，一早退稅咪得囉，交稅既人只係攞番佢應有既野，天公地道，低收人既人再另行安排補助。而家搞派錢，今年派左，出年唔派啲人又嘈，又派？香港政府點有錢又派得幾多年？咁派法有咩意思？

六千蚊，派比香港班巨富分分鐘都未夠食餐飯或者買件衫 ；18 歲以上讀書既，相信大部份都係促進香港通脹多；頭先電視個十歲靚仔話佢都係香港人佢又要分，大佬，你貢獻過個社會咩野呀，12 年免費教育，搭車同書簿津貼唔係錢？憑咩問政府拎錢？老馮架？？呢六千蚊，除左再一次証實呢個係個白痴無能低 B 政府之外，仲睇倒好多人性既貪念好恐怖...

最討厭既係一班議員，將派錢變左做佢地既功勞，個社民連搞到香港七國咁亂，跟本唔應該比呢班人連任!!!!!

蜂皇漿後記

前幾個星期見屈臣氏做減價，買左啲 mini 裝既蜂皇漿丸番黎試。起初幾日都冇咩反應， 瞓覺又唔見好瞓左， 但到左一星期左右就出事，塊面爆左3﹣4 粒紅腫但冇膿既瘡，摸落去會痛，咀唇仲有幾粒好似水 ‘pop' 既野，嚇得我即刻去做 Facial 睇吓有冇事。幫我做 Facial 個美容師見倒都問我搞咩，有冇轉護膚品或者食左咩... 由於嗰幾粒瘡都冇膿，清唔倒，唯有等佢自已消失，同時美容師叫我唔好食蜂皇漿住，睇吓會唔會好啲。

當時都唔確定塊面搞成咁係同蜂皇漿有關，但我停左食之後幾日，面同唇既瘡都平左，但仲有啲結焦。睇黎無論啲蜂皇漿幾好，我都唔敢再試住勒....

鳴門日本料理

尋日約了九龍灣番工既朋友食番，去左試 鳴門日本料理，剛好有個壽司定食做特價，原價 HKD128 減到 HKD85，所以我地叫兩個。呢個定食優惠好似係每個月最後兩個星期一都有，全場大部份人都係叫呢個餐。由於太多人叫既關係，司傅跟本做唔切， 我地13：10坐底，等到13：56 先有得食。周圍不停有人催單，但你有你催，大家依然要繼續等。

由於朋友趕住番工，我地以極速十分鐘內食完個餐，但其實啲壽司好好味，魚生好生鮮，飯剛剛好，有時間慢慢食就 perfect。個餐有十件壽司左右， 有三文魚，吞拿魚，油甘魚，玉子各一件，三件吞拿魚腩卷，仲有幾件唔記得係咩，面鼓湯，前菜兩小碟，同甜品 （雪榚）。 減價後其實真係好抵，唔怪得咁多人食。

P.S.: 昨日食完飯諗住行吓 Mega Box, 搭條超長電梯其間，不停聽倒落電梯既人高談闊論一單新聞...

路人甲：你十四歲發緊夢，人地已經做緊野，所以人地可以廿幾歲就退休....
路人乙：唔好話三十億，比一億我都願...
路人丙：冇亞媽有咩所謂丫，有錢就得啦...
路人丁：你估係咪一早協議左生完分手丫拿...

路人甲乙丙丁係四堆唔同既人，有男有女，有老有少，睇黎大家關心名人分手多過個垃圾財政預算