身邊好多朋友都已經結婚， 所以拜年好多時已經變左做團拜。今年其中一圍團拜既主題係 ﹣ 蜂皇漿。講講吓已原來好多朋友都食緊蜂皇漿或者蜂皇漿丸, 仲一齊研究邊個牌子好。由於對蜂皇漿冇咩認識，當時都冇留意聽，只聽倒佢地話皮膚好左，少左好多暗瘡。
但第二日去另一個朋友度拜年時，佢無端端又提起蜂皇漿，話食左之後精神好左， 瞓好左（佢之前成日瞓得唔好），佢都係見佢家姐食完精神幾好咁先跟住食，但佢就跟家姐响深圳買，比香港平好多... 唔知真係以為佢地夾埋 sell 我 ~
網頁寫既功效：
- 美化皮膚、減少皺紋
- 增強活力、免疫能力、安定神經，促進睡眠
- 調節血糖、降膽固醇、消除疲勞、加強記憶力
- 舒緩女性週期不適、減少男女更年期不適
- 有助於新陳代謝，緩慢老化速度
- 提高淋巴腺和腎上腺分泌，壯陽
我呢幾日不停上網揾資料， 諗緊自己係咪都要買番啲黎食呢... 朋友們主要都係食 Comvita, 見過 Jusco 有， 但要 HKD999／ 300 粒。上網見 HKD499／300 粒，同一牌子... 但信唔信得過呢？
今晚食完飯， 時間尚早， 走左去睇 非常外父3 (Meet The Parents : Little Fockers)。睇呢套戲只因時間配合倒 （食完飯行陣街就入場）， 同埋..... 實在諗唔倒咩戲想睇。
首先， 3D 戲基本上少考慮， 除左價錢貴之外，本身係四眼妹既我戴埋副 3D 眼鏡睇真係好唔舒服。新出左副 clip 响眼鏡既 3D 鏡片，問心嗰句， 邊會記得次次拎去睇丫， 又驚佢整花副眼鏡 ...唔睇 3D, 朋友唔鐘意睇賀歲片， 又唔想睇劉華，XX俠侣又好似好胡鬧，非常外父3 似乎係呢期唯一既選擇。
呢集仍然不停講 trust circle 同 I will be watching you (watching me - 呢集新加）。中間都有笑位，Jessica Alba 主要做個大花瓶，Robert De Niro 過氣特工顯得好鈍..... 感覺都係走唔出續集冇咁好既命運， 點解唔見好就收呢。
期待下期新上畫既好戲。
前幾日到 itune store 睇吓有冇新野玩， 見倒個 ‘ ゆけむり温泉郷’ ， 有個試玩版， 玩了一陣上左癮， 結果尋日比 USD4.99 download full version 黎玩。
由於呢個係日文 game, 好多仔細位都唔明佢講咩， 但玩左個試玩版基本上就明佢既操作。簡單黎講係要管理個温泉旅館， 要不停起房，餐廳， 温泉， 最重要係多起植物同擺設， 咁先可以賺多啲錢同令客人滿意。宣傳要不停轉新既客層， 咁會有新既房可以提供，仲要不停做投資， 先有新既 ITEM UNLOCK。
但呢個遊戲有幾個問題：
1. 好食電， 好快就玩到冇電
2. 起左既任何野唔可以移動， 只可以 delete
3. 只有温泉可以轉方向放， 但其他擺設或建築物都冇得改方向放
4. 始終自己唔識日文， 好多野都係估估吓， 但都 OK 既
結論係， 但遊戲會上癮， 玩玩吓就停唔倒手 。我玩左兩日玩到 14 年2 月， 但唔知點先叫玩完呢。
話咁快就到左年三十晚， 執吓屋， 整呢整路， 聽日就係兔年勒。希望新一年大家都 ﹣
心想事成
龍馬精神
最重要
日日都開開心心 ^O^
星期六， 同朋友一齊去左車公廟附近睇流年， 由於不設預約， 我地只好去到登記好， 再去附近食野， 夠鐘先番去。呢個師傅係我朋友同佢屋企人睇開， 而朋友家人其實對風水命理向來有研究， 都話呢個師傅好準， 所以決定一試。
本來預約左 12：30 同 13：00 （半個鐘一個）兩個 BOOKING， 但我地 12：15 番到去， 坐左一陣已經可以入去睇。由於朋友之前話過可以拎屋企平面圖去比師傅睇， 可以要放啲風水物品响屋企， 咁問師傅會準啲。我好乖咁用 EXCEL 準備了， 而師傅一見我坐底就叫我拎幅圖出黎睇吓先 （其實我都唔知佢點知我有準備個圖）， 佢問我屋企地址， 叫佢助手 PRINT 左個坐向表出黎， 就見佢計呀計， 劃呀劃， 結論係 ﹣ 我屋企風水好差。所以我本來黎睇流年， 結果變左睇風水。。。。
間屋最嚴重係主人房， 師傅話床頭同主人房都向東， 病位 （番屋企上網睇， 2011 東面係五黄位），同問我係咪父母身體好差， 屋企人係咪成日發脾氣好忟憎， 財來財去冇錢淨。實際上幾年前爸爸因病過身， 之後媽咪身體一直都唔太好， 而佢講既 ‘特徵’都好係講緊我屋企。。。之後師傅叫我响屋企幾個地方放啲風水物品， 好似媽咪房東面要掛銅畫，門口要掛銅風鈴或者銅畫仔， 電視側要放水動既擺設， 另外加安忍水咁。雖然， 風水可以話信則有不信則無 ，但我寧願駛啲錢求個心安， 因為佢話媽咪今年 7﹣8 月會入院， 唔係輕病咁... 聽到我超擔心， 所以我周末就四出去準備。
其實師傅舖都有銅畫賣， 但八百幾蚊一張我又覺得太貴， 諗住出油麻地啲風水舖實有同會平啲。結果我尋日街左成個下晝， 好難先買倒塊手掌咁大純銅既銅片。至於銅畫， 原來好難揾 ﹣ 有啲話係銅畫， 但顏色都唔似 （銀色又有， 淺金又有）， 有啲底塊木就厚， 銅就得少少。。。 諗住放棄番師傅度買既時候， 我行左入一間舖仔， 個老細好好人， 佢話佢冇銅畫賣， 但介紹我可以買一對銅片， 番去自己加工。開頭我都聽都頭都大唔明， 佢一拎出黎我先知， 佢講既銅片係响舊式既木門拆出黎, 但好肯定呢塊係純銅片， 同埋個圖畫好靚。我見倒就好鍾意， 於是就買左佢， 然後去十蚊店買左個相架。拼吓拼吓就整左呢幅掛畫出黎。我自己都幾鐘意架。
搞咁多野都係想屋企順順利利， 媽咪健健康康。希望開開心心又一年， 一切順利， 好快揾倒工咁啦 ^O^
