順德兩日一夜之旅

咩計劃既順德之旅， 由太子上車搭中港巴士， 三個鐘左右就到達順德。到埗第一件事做既， 就係食番碗雙皮奶， 黄色既係姜汁， my favorite ~

周圍都見既 ‘李禧記崩沙’， 真係梗有一間响左近。間間都話自己係百年老舖，唔知邊間先係真。但我地確實唔係太有興趣硬崩崩既崩沙， 所以冇買到呀。 

行行吓， 見有間個新疆人買羊肉， 試左一串。。。。味道只係覺得好重味精， 唔係太好食。

順德街頭， 唔講以為响外國呢。

第二日， 瞓覺又食。簡單小菜， 但全部都好好味。乳鴿皮香肉滑呢。。。

食完飯就去搭車番香港， 沿途見好多呢啲自助租單車，好想試吓租， 但要拍卡比按金， 所以租唔成。如果香港都有既就好勒。

Aptitude Test

今日山長水遠過海去做個 aptitude test, 結果係 ﹣ 超挫敗。由細到大自己數學都唔好， 估唔倒個 test 會咁難。身邊同場做 test 既人好似好快又做完一頁， 超速。。。雖然唔知啱唔啱， 但始終好過我响到發呆。

話時話， 呢份 aptitude test 比我之前考 CRE 嗰份深好多， 似考數多過係 aptitude test ...

New Hair Cut

習慣過年前都去剪髮， 今年都一樣。但去開既髮型師生仔放假去， 歸來無期， 唯有另揾高明。幾經明查暗訪 ，尋日去左試朋友既朋友推介， 响尖沙咀既一家Salon。呢間 Salon 其實响我經常去既利時附近， 好易揾。如約五點到達， 諗住番工時間比較少人， 點知發現 ﹣ Full House， 仲驚有排等。好彩等左一陣就有人幫我洗頭， 洗完頭就開始剪。

對上十年八年我都一直保持做 Perm, 只因頭髮太薄， 又軟又幼又無力，面又圓，唔電總覺得頭髮貼住晒個頭冇咩頭髮咁。但係， 長期電＋染髮既結果係髮尾打晒 ‘KICK’， 梳都梳唔順。同埋， 最最最恐怖係出現左 ‘脫髮危機’。大半年前有一日， 媽咪同我講屋企地下多左好多 ‘長’ 頭髮 肯定係我甩出黎， 搞到我即刻去睇醫生， 但好似冇咩用， 仲要比醫生寸唔好電同染咁多。 上網查左一輪， 又走去試吓 Nioxin 既 product。用左三個月左右， 問題開始改善， 但搞到我都而家都唔敢再電或者染個頭。

今次一剪終於剪走晒我之前電同染既頭髮， 變左到膊， 又黑又碎既直髮。都唔知幾多年未見過自已咁乖乖女樣，其實效果都 OK， 但總係睇唔慣。本身已經 baby face, 加埋個咁既頭， 去見工有冇問題呢？  希望Interviewer 唔會覺得我係死靚妹就好， 唯有衣服打救。

話時話， 呢間 Salon 收左我三十蚊話新年附加費， 細個聽講過， 但我都係第一次比呢個錢。

打邊爐

喜歡打邊爐， 喜歡打邊爐時加大量醬料。一向偏好沙爹窩底， 近年愛上麻辣窩， 但一食完第二日就喉嚨痛， 萬試萬寧。寧記麻辣窩同譚魚頭番茄窩都好味， 但價錢唔平。小肥羊近年都有百幾蚊既任食打邊爐， 但食過幾次都少少趕客。

去年朋友介紹去尖沙咀德興火窩任食邊爐， 百三蚊個左右 （唔計另加醬及飲品）。食物幾新鮮， 好少漏單 （出面好多間都會寫十樣上少幾樣）， 同唔會趕人走。雖然食物來來去去都係基本既野，冇咩特別， 但唔會有人催你走， 同朋友一齊食， 吹吓水，玩吓笑吓， 輕輕鬆鬆又一晚。

P.S.： 試過其他分店德興， 得尖沙咀呢間坐得舒服啲同好似食物新鮮啲。推介蘋果湯底， 佢既麻辣窩底就初時唔夠辣， 但越食只係越鹹， 唔係好得。

失業記

九月開始了自願失業既日子， 呢次自願失業冇一個明確原因， 只係覺得同一份公做左十年， 好厭， 好攰， 好想轉. 

其實份工唔錯， 同事幾好， 番九點半放六點， 同埋有時要出差同周末 ＋ 紅日要番工比較攰， 試過個幾月無假放， 又試過個幾兩個月要留响大陸做野， 做到病入醫院. 辭職前冇任何事發生， 淨係記得嗰一刻自己好想走， 三分鐘內打好辭職信， 比埋老闆.... 

老闆收信時有少少呆左， 再問我： 諗清楚未？ 點解？ 做得唔開心？我只答左佢： 諗左好耐， 諗清楚， 想試吓其他野， 公司同同事都好好. 老闆最後講， 咁好啦， 你如果改變主意話我知. 禮成.

過程比我想像中快， 但我仲記得我比信老闆當時對手有少少震， 同番埋位有少少想喊. 想喊既原因.... 只因好多回憶湧番出黎， 手震原因， 我都唔知.

Last day 後去左旅行， 之後一直間中都有揾工. 但係， 唔知太耐冇揾工定過去既工作經驗其實冇用， 又或者我份 CV 寫得差， 目前為止只見過四次工，三次仲係見agent. 身邊朋友， 屋企人都問， 點解你咁耐都唔番工既？有時都唔知點答， 有既我都會番， 但真係未揾倒， 點番？ 基本上我 model answer 都係， 快架勒， 過完年揾工.... 一切都過完年再算啦. God bless~ 

深圳一日遊記

今日下午一時許與我媽無聊在家， 突然決定上深圳按摩， 下午四時半我倆已躺於深圳東門九 X 城廣場某按摩店內. 我爸十多年前因腰背勞損， 喜歡以按摩舒緩， 十多年前已經常一家人到深圳按摩食飯消費. 自從幾年前我爸走了， 我媽也很久沒去深圳按摩， 按了三個鐘她說好似輕鬆了很多 (RMB100/3 hrs). 我只按了兩個鐘 (事實上自己比較喜歡泰式或推油， 中式按得我肌肉痛), 之後去了修甲. 

大概是周末吧， 所有修甲店都人滿為患， 插針難入. 跟我媽約好去四樓找我， 我只也能在四樓修甲店找個位. 轉了兩個圈，終於有個位， 隨手拉住個修甲小妹妹幫我修手修腳＋腳去死皮， 不到兩分鐘她已開始幫我修腳， 還叫了另外一個小妹妹幫我修手. 這個店三個舖位， 一共超過三十過位， 但都坐滿了人. 除了我， 都是做水晶指甲的. 幫我修甲的二個小妹妹都說早上九點上班都沒休息過， 中飯也沒得吃， 超忙. 我自己帶了甲油 （我最愛的 chocolate brown)， 只塗了手，發現我手甲油沒乾， 沒法打開銀包拿錢。   剛好我媽到了， 幫我比了錢 （三十蚊 ＋ 二十蚊小費）我們就走去食飯. 食完飯， 在東門附近遊盪一陣， 再搭車番香港. 輕輕鬆鬆又一日.

去斑 ＋ 去印

對於面上既一粒粒暗瘡， 自問十分忍唔倒手.  照鏡見到有白粒就想消滅佢， 就算流晒血都唔留手. 瞓瞓吓到半夜無端端摸倒一粒粒又忍唔住手去搞. 結果暗瘡醫好了， 換黎一大堆暗瘡印.  大部份既印都集中响面既兩邊. 加埋我本身既無數雀斑， 簡直係...慘不忍睹.  所以暗瘡好轉之後， 我又開始另一輪 research -----去斑同去印.

試過無數去斑去印 product, 但成效真係.... 唔多覺. Obagi 既換膚 set, 好似有少少效果 ﹣＞主要根據用左三個月後番去 Reenex 用機 check 番用前／後效果比較， 肉眼睇只係好似斑淡左少少咁....

之後， 去醫生到打彩光 （好抵， 朋友介紹去的正牌醫生， 幾年前五百蚊次）， 做左五次左右， 頭三次效果比較明顯， 深色既斑係去左好多， 但淺色既斑同暗瘡印都只係淡左少少，冇退走晒， 最後兩次去見冇咩效果， 冇再去了.  當時我一直都有去做 facial, 試過佢哋部打光機都冇用. 到舊年年尾， 响一間去開既泰式 massage 舖 （十分乾淨 ＋ 正經的）， 佢地新增 facial 服務， 因為係 massage 舊客， 有試做優惠， 試過都幾好就 join 左個 basic facial. 加上當時既 massage coupon 就快用完又 renew 左， 兩套新 coupon 加埋， 舖頭好豪咁送左次打光 treatment 比我. 試做完個打光發覺， 咦， 有啲淡既斑都甩左.... so magic.... 於是好敗家地， 又 join 埋個打光 treatment. 到今日已經打左 6﹣7 次，斑基本上得番少少， 印都淡左好多. 只因自已又手多多企圖消滅新瘡， 順理成章舊印未清新印又黎. 但 so far 對我黎講效果最好既去斑去印方法都係用機打光.

Facebook Games

Facebook 用了兩年多， 差不多每天都登入都為了各種遊戲. 起初為了遊戲 upgrade 要不停加朋友， 令到 friend list 中出現大量 ’陌生朋友‘.  幸好初時用 facebook 既 real friends 唔太多, 所以好白痴地開多另一個 accounts， 只 add real friends. 原來既 accounts 淪為遊戲專用.

眾多遊戲中鐘情 Restaurant City, 幾年來無間斷咁玩到宜家 Level 90， 差 7 個 raspberry 就 all done. 當初為左食材另外開左兩個 accounts互送食物... 到今日今時每日登入送食材， gourmet king又送， 種田又可以拎香料， 甚至比錢買都得咁， 食材四方八面地湧埋黎， 諗起都相當唏嘘.  但時至今日， 我都冇用過真錢買遊戲入面既 item 或者食材， 因為 ﹣ 買得幾多丫， 個 game 個個星期二都有新菜要整， 星期四又出新 item 比人買. Restaurant City's production team 的確好勤力， 但有冇諗過玩既人既感受？若果改為2 星期 update 一次相信會好啲， 個遊戲既新 ’花臣‘ 實在太多... 過多...


Facebook 中仲會玩既遊戲仲有 Bejeweled Blitz, 博雅鬥地主, Texas HoldEm Poker, My Kingdom (中文板， 英文版add玩既人比中文版慢好多), Happy Farm, Little War. 以前都有玩 Cafe World, Pirate Ahoy, Hotel City, Farmville 等等， 但發覺真係太 time consuming. Facebook 入面既遊戲實在太多， 自問無可能玩得晒.

Satys' Lotion M & Handybio

有少少購物狂既我, 家中護膚化粧品一大堆， 見雜誌網頁介紹話好， 又走去買買埋埋一大堆番屋企， 約五年前左右試左枝响 Joyce Beauty 買既成千蚊既 mask 就出事， 塊面即腫要去睇醫生， 仲比醫生寸話冇咩特別就洗吓面同揸 lotion 就可以， 唔好搞咁多野.... 比完四百幾蚊， 先係故事既開始. 其實唔知係咪真係關支 product 既事， 但自此之後我兩邊面就勁爆暗瘡， 高峯期成塊面有直徑兩厘米既皮膚係冇事， 個個見倒我都問我搞咩， 但其實我都唔知自已點解會咁. 睇左無數次醫生， 買左好多好多野揸， 到宜家都唔知邊樣野有效， 但持續左年半左況先開始緩和 . 其中一個買黎用既醫暗瘡 product 就係呢套 handybio 機， 話說係我某日出街聽住 903 既收音機， 佢地某節目介紹話對暗瘡好好， 我番到屋企就立刻上網查資料， 查倒就撲去買.

From: http://www.handybio.com/skin/skin02.aspx

因為我當時‘情況危急’， 用太多 product, 到宜家好番晒 （touch wood!!) 都唔知關邊樣 product 事. 呢套機我宜家仲 keep 住用黎做清潔， 但由初期勁用一星期 2﹣3 次變成 一個月 2﹣3 次， 同埋冇用暗瘡個導入. 塊棉花好明顯比剛剛用時冇咁灰黄.

當中一個意外收獲就係呢支 Satys' Lotion M, 一支保濕產品， 當時好似係 sales 姐姐介紹， 講兩講我就買左 （我以前係痴痴地， 見個 sales 姐姐態度好好， 佢講吓講吓我就買好多野). 唔好見支野細細支， 都相當耐用. 初時我係用 Handybio 清潔完， 沖水， 再揸少少 Lotion M, 再用暗瘡個導入精華. 但我二個月唔夠就用晒清潔同暗瘡精華 （可能因我皮膚實在太乾， 好快吸晒， 要不斷加精華先用得咁快），但支 Lotion M 仲有好多. 剛好之前支用開既 B5 用完 (一支 60 ml 既 B5 我用唔倒個半月）， 就拎呢支野出黎早晚用. 

咁多年黎我用過既保濕產品包括 Skin Ceuticals/ Bicelle 既 B5, Dr. Wu, IPSA, Bobbi Brown 等等等等， 呢支都算抵用. 只要倒少少落手心， 雙手搓一搓再揸上面，拍吓， 吸收相當快.

From: http://www.handybio.com/satysa/product_03.aspx#2

iphone apps

自從用左 iphone, PSP 同 NDSL 都被打入冷宮， 雖然畫面 PSP 係靚啲， NDSL 既 GAME 又多完化啲， 但 一部 iphone 始終方便啲. 身邊既人都話我用壞幾部電話都係打機打得太多所致.... 我諗都係原因之一掛....

iphone 好多 free apps, 但始終我最鍾意玩既幾個 games 玩完 lite 版之後我最後都乖乖咁比錢買個 full version ....

1) Fieldrunners (USD2.99) : 炮塔防守戰，賺錢買同加強裝備唔好比對手入侵. 目前增至 8 個大關卡，每關有 classic, extend 同 endless mode, 再分 easy, medium, hard 三種程度.  冇記錯既頭一關唔駛錢， 之後每一關都要比錢買. 我最後兩個都冇買 （好似 USD0.99 一關）， 玩過既關卡入面最鍾意玩既都係 ‘Frostbite'， 玩完可以再玩， 睇吓點可以設計個防守陣式好啲, 真係玩到會上癮架.

From: http://fieldrunners.com/media/

2) Angry Birds (USD0.99) : 遊戲十分簡單， 用幾種唔同特性既 angry birds  （放炸彈， 加速， 超巨鳥等等） 去打死晒另一面敵人， 最成功應該係佢既配樂. 我又次响診所等睇醫生， 自己戴住 handfree 玩緊 angry birds, 突然從我既左面傳黎 angry birds 既音樂， 原來係有個小妹妹見我玩佢又叫媽咪比佢玩. 轉頭坐對面有兩個男仔， 可能聽見小妹妹既背景聲， 佢地又拎出黎玩， 搞到成個診所都係 angry birds 既聲， 場面都幾搞笑.

玩極都過唔倒關既時候， 可以去 youtube search 'Angry Birds + 關數', 應該有片可以教你過關 

3) Diner Dash (USD2.99)：一個我由讀書年代玩 PC 打爆左既遊戲， iphone 見倒 lite 版就 download 黎玩吓， 但 lite 版得幾關， 結果都係玩到比錢要個 full version, 玩到大部份都係 expert 級數. 其實遊戲好簡單， 一個人負責招呼人坐位， order 食物， 拎比廚師煮， 煮好再送到客人個位， 食完要收碟， 不斷重複. 唔同關卡有唔同突發狀況會出現， 好似倒瀉水， 要包， 要甜品， 或者客人等太耐走左咁. 要拎高分唔難， 就係一次過做同一樣動作好多次， 即係當有六 張枱， 就得六張枱 order 完食物， 再一次送晒比六張枱， 咁分數就會 x2, x3, x4 咁上， 中途做左其他野就冇得咁賠數拎分. 同系 （Diner) 仲有好多 wedding, hotel 等等既遊戲， 我只玩左 HotelDash, 有冇其他推介好玩呢？

From: http://www.playfirst.com/diner-dash/

4) Bejeweled 2 (USD0.99)： 寶石方塊遊戲， 通常都 LINK 入 FACEBOOK 玩 Bejeweled Blitz, 一分鐘睇你玩到幾多分.  我最高紀綠都係七十幾萬分咋， 真係唔知啲人點玩到百幾萬分呢

5) WhatsApp (USD0.99)：唔同台既朋友 sms, 一次過比完 USD0.99 就唔駛再驚比 HKD0.5/sms msg 錢， 當然你朋友都要有先得

6) BatteryDoctor (USD0.99): 呢個唔係遊戲， 只係一個月最少一次等電話用到 20﹪ 電以下再啟動程式， 會幫助你部機個電耐用啲 

實用唔駛錢既 apps:
1) PDF Reader Lite： 可以睇 pdf 文件， 冇其他特別 function

2) CJ Lookup: 用倉頡諗唔倒個字點打， 可以查倒個碼， PC 同 Mac version 都有

3) HK Movie: 可以知道邊間戲院有咩戲上，連仲有幾多位都查倒. 影評就唔太可靠

4) MTR Mobile: 我係地鐵白痴， 淨係知金鐘去 TST 一個站，你問我樂富係邊條線我都答唔倒你， 所以我要搭地鐵都會睇吓個 Apps 預番搭幾耐， 同睇定邊個站要轉車咁

5) Openrice：自已對食冇咩研究，早餐食左七年同一間舖， ABCD 餐揀一個加一杯奶茶. 成日同朋友食飯唔知食咩， 就只有拎部電話出黎睇吓附近有咩推介

6) 微博： 自己冇發報過， 只係會睇人哋寫既野

7) 商業電台： 只因小女子係 903 fans, 慣性收聽, 最鍾意聽森美小儀 ﹠1872 遊花園

有一排狂玩 fingergod 同另外幾個已經唔記得咩名既 games, 有好玩或者得意既 apps 或者 games 話聲我知， thanks!

iphone 換機記

宜家用緊既仲係 3gs 版， 由於同電訊公司既合約仲有一年先完， 朋友都話可能我下次就轉用 iphone 5 ， 以 iphone 出得咁快既速度， 都唔係冇可能 ...

用左一年既電話， 其實已經係第三部， 出機後一個月左右， 有日回家打算充電，發現插好充電線後， 畫面仍然漆黑一片， 包括正常充電中應該出現的 ‘apple' icon 都冇出現. 當時仍然冇諗過係壞機， 以為第二朝充好電就冇事。點知第二日發現畫面仍然咩都冇， 唯有拎去電訊公司既維修部睇睇. 等左兩個鐘， 得到以下回覆：

職員：     小姐， 你部機硬件問題， 我地要換過部機比你
我答：      哦
職員：     你部機開唔番，所以入面既資料會冇晒， 有冇問題？
我答：     我可以有咩問題？ 都開唔番

之後有關職員就換左另一部機比我， 好彩番到屋企 PLUG 番入 itune 可以復原壞機前一日既資料. 但上網一查， 原來換番黎嗰部機既機型由原廠機 （ZP） 變左做翻新機（LL）...  網上既人話如果拎出去 trade 價錢會低千幾蚊... 但係， 如果我到時 trade 番比電訊公司又會唔會因為咁平左？ 真係唔知. 

十二月頭又發現個屏幕感應有問題，於是又拎去維修部睇吓咩事.  歷史重演， 兩個鐘後番去拎機， 職員話我知機件問題， 再換左另一部翻新機比我 ﹣ 即係話我一年內換左兩次機， 只可以話幾麻煩， 拎出旺角又要等幾個鐘,  但電訊公司總算係快手， 有問題就換機 ﹣ 雖然唔係真係全新既機.  

一年保養期已過， 我冇加五百幾蚊加長一年保養，求神拜佛部機未來呢年唔好有事啦.... Ah men~

P.S: 我部機响臨過保用期最後一星期，touch screen 有啲失控，好似明明按 左上角個 ICON 佢就開左中間或者其他既 FILE， 拎去整，又係機件問題冇得整，又換過部機比我。CS 姐姐不斷遊說我用 五百幾蚊 加多一年 warranty, 但朋友仔話我部已經係翻新機，唔好嘥錢，所以最後冇續到。

My New MacBook Air

用了 MacBook Air 將近一個月， 開始習慣同越黎越鍾意.  但由於 Mac 機好多掣式同以前用開既 PC 唔同，初時用都成日襟錯掣， 宜家都尚在摸索中。第一日用既時候就連 set 中文輸入法我都搞左幾個鐘，部份倉頡輸入法同舊既 PC 又唔同， 搞到成日打唔倒啲字 （好彩上網揾倒個 CJ LOOKUP 既 iphone apps 可以查倒啲字點打）， 仲未計 restore 番個 iphone data 入 itune, 真係搞到自已好忙咁... 入面有好多 applications 好似 imovie, automator 等等等等， 仲未開始研究，但單講部機十幾秒就開機／ 關機既速度， 連埋個靚靚外表， 一句講晒， I'm Loving it ~

其實我都好鍾意新出既 magic mouse, 超型， 但朋友一直話我用開 multi-touch都唔用 mouse 堅持唔比我買.... 所以， 我到宜家都冇買到....